Rəqəmsal texnologiyanın ən yeni və populyar trendlərindən biri olan onlayn televiziya - başqa adla desək, internet televiziyaları bu gün dünyada xeyli sayda insan tərəfindən rəğbətlə qarşılanan informasiya mənbəyi hesab edilir.
Hazırda sosial medianın əsas qolu olan elekton kütləvi infomasiya vasitələri - internet radio və televiziya getdikcə populyarlaşmağa başlayıb. Son zamanlar ölkədə həm internet-televiziyaların, həm də radioların sayı kifayət qədər artıb və bu tendensiya artan xətt üzrə davam edir. Müşahidələr göstərir ki, insanlar hazırda efir televiziyalardan çox, internet kanallarına baxır. Bunun da çox obyektiv səbəbləri var. İlkin səbəb ondan ibarətdir ki, axtardıqları kontentləri daha çox internet-televiziyalarda tapırlar. Bu kanallar digər televiziyaların verə bilmədiyi, toxunmadığı mövzuları işıqlandırır. Ən əsası da, həmin televizyalarda açıq fikirli ziyalılara qadağa yoxdur. Bununla da böyük auditoriya cəlb edə bilirlər. Ancaq çox az efir televiziyaları istisna olmaqla, əksəriyyətində ekspertlərin verilişlərə dəvəti qabaqcadan müəyyənləşmiş qanunsuz siyahı üzrə həyata keçirilir. Qeyri-qanuni olaraq TV rəhbərləri tərəfindən tərtib edilən həmin siyahılar 3 təsnifata bölünür: qadağan olunmuşlar, icazəlilər və hərdən dəvət oluna bilənlər. Təbiidir ki, bu siyahı üzrə qurulan efir siyasəti öz yerini yeni trendlərə verməyə məcburdu. Efir televiziyalarının rəqabətdə uduzmaması üçün bu meyarları kökündən dəyişməyə ehtiyac varmı?
“Cəbhə.info” saytının və “Cümhuriyət” qəzetinin baş redaktoru Rəfail Becanov “Bakı-Xəbər”ə bildirdi ki, internet televiziyaların analoq televiziyaları geridə qoyması faktdır: “Bunu bir neçə səbəblə izah etmək olar. Birincisi, rahat baxmaq imkanlarından asılıdır. İnternet televizylara daşınan vasitələrlə baxmaq imkanları var. Yəni biz oradakı verilişləri harada istəsək izləyə bilərik. Analoq televiziyanı isə konkret bir yerdə oturub izləməlisən. Digər səbəb isə təşkil olunan verilişlərlə bağlıdır. Real vəziyyət tamamilə başqa məzmunlu verilişlərin hazırlanmasını önəmli edir. Ancaq biz analoq televizyalarda tam bunun əksini görürük. Daha çox şou xarakterli verilişlərin hazırlanmasına üstünlük verirlər. Nəticədə televiziyalar bir şou bataqlığına düşür. Əsas amillərdən biri də dəvət edilən qonaqlarla bağlıdır. İnternet televiziyalarda sərbəstlik çoxdur. Ekspertlər istədiyi fikri sərbəst şəkildə izləyicilərə çatdıra bilir. Qonaqlar təcrübəli və daha rəngarəng olur. Analoq televizyalarda isə bəlli bir kontingent formalaşdırıblar və ondan heç kim kənara çıxmır. Hər televizyanın öz müəyyən etdiyi bir siyahı var, yalnız onlar efirə dəvət alır. Belələrinə tamaşaçı qulaq asmaq istəmir. Deyir ki, mənim bildiyimi danışacaqsa, mən ona niyə baxmalıyam? Layiqli, savadlı adamların hamısına televizyalar efir verməlidir. Analoq televiziyalar kompleks addımlar atmalıdır ki, rəqabətə davam gətirə bilsinlər. Birincisi, hazırlanan verilişlərin səviyyəsi dəyişməlidir. İkincisi, qanunsuz siyahılar ləğv edilməlidir. Savadlı, söz deməyi bacaran hər bir ziyalıya tribuna vermək lazımdır”.
Məhəmmədəli QƏRİBLİ
