Əksər ölkədə, eləcə də MDB məkanındakı böyük şəhərlərdə parklanma ilə bağlı problemlər çoxdan həllini tapıb. Yəni böyük parklanma ərazilərini, hətta küçələrdə, evlərin və müxtəlif inzibati binaların ətrafında olan park yerlərini vahid bir informasiya sistemində birləşdiriblər, pullu və pulsuz olanları fərqləndiriblər. Məlumatlandırma və monitorinq sistemləri qurublar.
Ancaq ölkəmizdə bu sahədə hələ də heç bir nəticə əldə olunmayıb. Belə ki, uzun illərdir ki, parklanma ilə bağlı problemlər yaşanır.
Bu günlərdə Bakı Nəqliyyat Agentliyinin (BNA) İdarə Heyətinin sədri Vüsal Kərimli media nümayəndələrinə açıqlamasında bildirdi ki, parklanmada yaranmış qanunsuzluq aradan qaldırıla bilər: “Paytaxtda pulsuz olan parklanma yerlərindən pul yığan "parkovşik"lərin BNA-ya aidiyyəti yoxdur. Onların himayədarları var. Bakı şəhərində tariflər tətbiq olunmadan vəsaitlərin yığılmasından söhbət gedə bilməz. Hər hansı parkda duran şəxsə BNA vəsiqə verməyib. Həmin park yerlərində vətəndaşın daşınan əmlakına ziyan vurulsa da, qarşılanmır. Mənə də yaxınlaşıblar, məsələ araşdırılıb və sonu polisdə bitib".
BNA rəsmisi deyib ki, parklanma yerləri ilə bağlı qiymətlər müvafiq dövlət orqanı ilə razılaşdırıldıqdan sonra yaxın günlərdə açıqlanacaq.
Maraqlıdır, paytaxtda pulsuz olan parklanma yerlərinə kimlər himayədarlıq edir, Bakıda parklanma ilə bağlı qanunsuzluqlar nədən qaynaqlanır, bu sahədə yaşanan problemlər necə həll edilməlidir?
Aslan Əsədov: “Mövcud şəraitdə parklanma ilə bağlı problemlər hələ də aradan qaldırılmayıb”
Nəqliyyat eksperti Aslan Əsədov bildirdi ki, mövcud şəraitdə parklanma ilə bağlı problemlər hələ də aradan qaldırılmayıb: “Bakıda tıxacların əsas səbəblərindən biri parklanma ərazilərinin düzgün seçilməməsidir. Parklanma üçün 15 minə yaxın yer seçilib və bu, təxminən 763 sot ərazi deməkdir. Lakin yenə də problem öz həllini tapmır.
Qanunvericilikdə Bakı Şəhər İcra Hakimiyyəti aidiyyəti qurum kimi göstərilsə də, təcrübədə Bakı Nəqliyyat Agentliyi xaotik parklanmanın səbəbkarı göstərilir.
Əslində, “parkovşik” məsələsində hər iki qurumun adının hallandırılmasında maraqlı olan tərəflər var. Böyük ticarət mərkəzləri, insan sıxlığı olan bəzi ərazilərdə parklanmalar var ki, oradakı “parkovşik”lərə görə birbaşa olaraq həmin ərazinin idarəetmə orqanı məsuliyyət daşıyır”.
Elməddin Muradlı: “BNA dəfələrlə açıqlama verib ki, parkinq pulsuzdur, buna baxmayaraq, onlar fəaliyyətlərini davam edirlər”
Nəqliyyat məsələləri üzrə ekspert Elməddin Muradlı qeyd etdi ki, parklanma ilə bağlı məsələ Bakı Nəqliyyat Agentliyinin səlahiyyətindədir. Bu məsələni BNA yol polisi ilə məsləhətləşib təşkil edə bilər: “BNA haradasa parklanma yeri yaradır, amma yol polisi bunu məqsədəuyğun saymır. Ona görə də məsləhətləşmədən sonra parklanma yeri yaradılması mümkündür. Danılmaz faktdır ki, bu gün paytaxtda parklanma ilə bağlı bir çox qanunsuzluq var. Bunlar BNA-nın pulsuz elan etdiyi parklanma yerlərindən qanunsuz vəsaitin yığılması, parklanma tarifi müəyyən olunmamış parkinq sahiblərinin özlərindən parklanma qiyməti müəyyən etməsi və sair məsələlərdir”.
Ekspert onu da əlavə etdi ki, bu gün paytaxtda pulsuz elan olunan parklanma yerlərindən qanunsuz pul yığanlar Bakı Şəhər İcra Hakimiyyəti dövründə də qanunsuz olaraq parkomatlar quraşdıraraq pullar yığırmışlar: “Həmin vəsait də parkinqlərə nəzarət edən şəxslərin cibinə gedirmiş. BNA nə qədər parklanma tarifləri müəyyən olunanadək həmin ərazilərdə parklanmanın pulsuz olduğunu lövhələrə yazıb vursa da, "Avtoparkinq" deyilən qondarma şirkət öz işçilərini xüsusi forma və ödəmə terminalı ilə təmin edərək qanunsuz parkinq xidməti göstərir. Bu şirkətin əməkdaşları hər avtomobilin parklanmasına görə 1 manat parklanma haqqı alırlar. Bu azmış kimi, sürücülərə hədə-qorxu da gəlirlər ki, avtomobilə zərər dəyəcək, cərimə gələcək. Həmin şirkət iddia edir ki, Bakı Şəhər İcra Hakimiyyətinin keçmiş başçısı Hacıbala Abutalıbovun dövründə müqavilə əsasında 120-yə yaxın parkinqi icarəyə götürüb. Dövlətin nəzarətində olan parkinqlərin hansısa şirkətin nəzarətinə verilməsi isə gülünc və təəccüb doğuracaq məsələdir. Parkinqlərə nəzarət səlahiyyəti BŞİH-in əlindən alınanda bu şirkətin müqaviləsi avtomatik ləğv olunsa da, şirkət işinə davam edir. BNA dəfələrlə açıqlama verib ki, parkinq pulsuzdur. Buna baxmayaraq, onlar fəaliyyətlərini davam edirlər".
Günel CƏLİLOVA
