Beyləqan rayonunun İmamverdili kənd bələdiyyəsində sədrlə qazi arasında qalmaqal olub. Adıçəkilən kənd sakini, Vətən müharibəsi iştirakçısı, 30 yaşlı Teymur Kərimov bələdiyyə sədri tərəfindən döyüldüyünü iddia edir.
Qazinin sözlərinə görə, onların arasında mübahisə anasının adına olan bələdiyyə torpağı üstündə düşüb: “Anamın adına bələdiyyə torpağı var. Kəndlilərə 10-15 il müddətinə verilir. Həmin vaxt bitdikdən sonra bələdiyyə 120 manat rüsumla yenidən müddəti uzadır. Bizim torpağın müddəti də bitib. Torpaqda pambıq əkmişik. Sədr Rasim Əliyev də pambıq əkini qaldığı halda torpağı əlimizdən almaq istəyir. Qanuna görə, torpağın istismar müddətinin artırılması üçün vətəndaşa möhlət verilməlidir”.
T.Kərimovun sözlərinə görə, məsələni həll etmək üçün bələdiyyə sədrinin qəbuluna gedib və olay da həmin an baş verib: “44 günlük müharibədə Füzuli, Xocavənd rayonları istiqamətində gedən döyüşlərdə iştirak etmişəm. Bir ayağım zədələnib. Əsa ilə gəzirəm. Aprelin 24-də qollarımdakı əsa ilə getdim bələdiyyə sədrinin qəbuluna. Xahiş etdim ki, səbr etsin, pambığımızı yığaq sataq, torpaqdan istifadə müddətini artıracağıq. Həmin an sədrin bacısı oğlu Vüsal da otaqda idi. Birləşib məni döydülər. Üç gündür Beyləqan Rayon Mərkəzi Xəstəxanasında yatıram".
İmamverdili kənd bələdiyyəsinin sədri - Rasim Əliyev: “Qazini döymək iddiası tam yalandır”
Məsələ ilə bağlı Beyləqan rayonunun İmamverdili kənd bələdiyyəsinin sədri Rasim Əliyev bildirdi ki, qazinin dedikləri həqiqət deyil: “Belə bir hadisə baş verməyib. Qazinin dedikləri tamamilə yalandır. Mən bələdiyyə sədriyəm, uşaq deyiləm. Məni ağsaqqal kimi qoyublar bu vəzifəyə. Qazini döymək iddiası tam yalandır. Elə bir hal olmayıb. Hazırda bu iş polisdədir, araşdırma aparılır. Sonda bilinəcək kim kimi döyüb”.
Günel CƏLİLOVA
