Ağdaş sakinləri onlardan suvarma üçün yığılan pulların çox olmasından narazılıq edirlər. Bununla bağlı dəfələrlə aidiyyəti qurumlara müraciət etsələr də, heç bir nəticəsi olmayıb. Üstəlik, onlara verilən qəbzlərin üstündə su sərfiyyatı yazılmır.
Əkilmiş sahələrin suvarılması üçün su olsa da, təsərrüfat sahibləri bu sudan istifadə edə bilmirlər. Səbəb suyun onlara baha satılmasıdır. Ağdaş rayonunun Xınaqlı kəndinin sakinləri iki ildir ki, təsərrüfatlarda suvarmada istifadə etdikləri suyun pulunun bahalaşdığını iddia edirlər. Sakinlərin sözlərinə görə, əvvəllər pay torpaqlarını suvarmaq üçün ildə bir dəfə 10 manat ödəyirdilərsə, indi onlardan hər suvarmaya görə pul istəyirlər. Üstəlik, supulunu ödədiklərinə dair verilən qəbzdə su sərfiyyatı qeyd olunmur: “Əgər qəbzlərdə su sərfiyyatı yazılırsa, bu, gözəyarı hesablama ilə edilir. Ona görə də qəbzlərin üstünə suyun sərfiyyatı dəqiq yazılmır. Bu da təsərrüfat sahiblərinin narazılığına səbəb olur”.
Sakinlər onu da qeyd edirlər ki, pay torpaqlarından əlavə istifadələrində olan icarə və bələdiyyə torpaqları üçün isə 10 manat ödəmək məcburiyyətində qalırlar.
Ağzıbir Sudan İstifadə Birliyi - Abdulla Əhmədov: “Hər bir təsərrüfata verilən supulu sahədən asılı olmayaraq, sərfiyyata görə hesablanır”
Qeyd edək ki, Xınaqlı kənd ərazisində su təminatı Ağzıbir Sudan İstifadə Birliyinə aiddir. Birliyin sədri Abdulla Əhmədov bildirdi ki, hazırda suya olan tələbat tam ödənir. Hər bir təsərrüfata verilən supulu isə sahədən asılı olmayaraq, sərfiyyata görə hesablanır.
Abdulla Əhmədov məlumat verdi ki, suyun hər min kubu 2 manat 50 qəpikdən hesablanır. Qəbzlərdə suyun sərfiyyatının yazılmamasına gəlincə isə, birlik sədri bunu gah kompyuterdən istifadə edə bilməməsi, gah da işçi sayının az olması ilə əlaqələndirdi.
Günel CƏLİLOVA
