Təxminən iki il əvvəl Masallı rayonundan olan vətəndaşlar “Bakı-Xəbər” qəzetinə müraciət edib bildiriblər ki, rayonun Qızılavar kəndində, Masallı-Boradigah yolunun sol tərəfində Böyük Vətən müharibəsində həlak olanların xatirəsinə ucaldılan möhtəşəm abidə artıq sökülüb.
Bu hadisə ilə bağlı apardığımız jurnalist araşdırması zamanı rayonun bütün qurumları ilə əlaqə saxladıq. Bunun nəticəsində abidənin yerində nəzərdə tutulan ticarət obyektinin tikilməsinə imkan vermədik. Həmin vaxt kənd sakinləri bizimlə söhbətlərində bildirdilər ki, sözügedən kənddən çoxlu sayda sakin Böyük Vətən müharibəsində həlak olub. Abidəyə göstərilən bu hörmətsizlik onları dərindən narahat edib. Kənd sakinlərinin sözlərinə görə, mövzunun bizim tərəfimizdən ictimailəşdirilməsi rayondakı bəzi qurumları ciddi narahat etməyə başlayıb. Onlar özlərinə yaxın olan kənd sakinlərindən “vətəndaş məktubları” toplayıb əlaqədar qurumlara göndərmək istəyiblər ki, guya bu “xahiş” onlara kənd sakinlərindən gəlib. Ancaq kənd əhalisinin böyük əksəriyyəti edilən hərəkətlə razılaşmayaraq Rayon Prokurorluğuna şikayət edib. Hətta deyilənə görə, Masallı Rayon Prokurorluğunda bununla bağlı araşdırma aparılır. Masallı rayon Qızılavar kənd sakini Ağaddin Əsədov yenidən qəzetimizə müraciət edərək, öz haqq səsinin ölkə rəhbərliyinə çatdırılmasını istəyib. Onun sözlərinə görə, üzü ülgüc görməyən minlərlə vətən oğullarının torpağa baş qoyub azad etdiyi ərazilərdə özlərinə pay qoparmaq istəyən yüksək rütbəli məmurları Prezidentimiz xalqa tanitdiqda bizim qələbəmizlə bağlı axıtdığımız sevinc göz yaşlarını qəzəb əvəz edir: “ 90-cı illərin əvvəllərində AXC-Müsavat iqtidarı 9 May Qələbə gününü təqvimdən sildi. Yalniz Ulu Öndərimizin hakimiyyətə qayıdışından sonra Böyük Qələbənin qeyd olunması davam etdirildi. İşğaldan azad olunmuş ərazilərdə Müdafiə Nazirliyinin təqdim etdiyi videogörüntüləri dövlət televiziyasından bütün ölkə vətəndaşları izləyib. Daşı daş üstündə buraxmayan erməni vəhşiləri, nədənsə, nə Cəbrayılda, nə də Laçında Böyük Vətən müharibəsində həlak olan soydaşlarımızın şərəfinə ucaldılmış abidələrə toxunmayıblar. Yaşadığımız Qızılavar kəndində isə həmin tarixi simvolizə edən tarixi abidə dağıdıldı ki, altındakı 2-3 sot torpaq sahəsi satılsın. Döymədiyimiz qapı, müraciət etmədiyimiz qurum qalmadı, heç bir nəticəyə nail ola bilmədik. Abidəni dağıdıb yerini satmaq istəyən həmkəndlimiz Əzizov İlkin olub. O, hazırda rayon İcra Hakimiyyətində çalışır. Kənd sakinləri olaraq abidənin əvvəlki yerində ucaldılmasına yardımçı olmağınızı Sizdən xahiş edirik. Sizin qəzetin müdaxiləsindən sonra dağıdılan abidənin yerində nəsə tikməyə nail olmadılar. Ancaq yerinə bərpa da etmirlər”.
Ümidvarıq ki, əlaqədar qurumlar kənd sakinlərinin bu tələbinə həssaslıqla yanaşıb, tarixi abidənin bərpasına göstəriş verəcəklər.
Məhəmmədəli QƏRİBLİ
