Uzun müddətdir Neftçalada su problem yaşanır. Bununla bağlı sosial mediada şikayətlər yayılır. Artıq Neftçalada su qıtlığı kritik vəziyyətdədir.
Məlumdur ki, bir ildən çoxdur dünyanı koronavirus infeksiyası təhdid edir. Danılmaz faktdır ki, koronavirusdan qorunmağın ən əsas yollarından biri gigiyenik qaydalara riayət etməkdir. Ancaq Neftçalada su problemi yaşandığı üçün həmin bölgədə sağlamlıq, təmizlikdən danışmaq çətin olar.
Artıq rayon sakinləri su problemi ilə bağlı ölkə başçısı İlham Əliyevə müraciət hazırlayırlar.
Hazırda Neftçaladakı vəziyyəti anladan şikayətçilər bildirirlər ki, Neftçala şəhərində susuzluq ən kritik səviyyədədir. Kür çayında suyun yenidən şorlaşması ilə əlaqədar olaraq içməli su ilə bağlı acınacaqlı vəziyyət yaranıb. Neftçala şəhərinin, həmçinin, ətraf qəsəbə və kəndlərin su təminatı yoxdur. Natəmizlik və antisanitariya ciddi fəsadlar yaratmaqdadır. İddiaya görə, son günlər təkcə Neftçala şəhərində yoluxma 60-80 arasında dəyişib.
Onu da qeyd edək ki, rayonda su ilə bağlı yaşanmış vəziyyətdən bəzi işbazlar yararlanırlar. Şikayətçilər bildirirlər ki, Neftçala şəhərindən heç də uzaqda olmayan Uzunbabalı kəndində yerləşən su anbarından gətirilən su "od qiymətinə” satılır. Dövlət qurumlarına və şəxsi insanlara aid olan su maşınları ən yaxın məsafə üçün 20 manat, Neftçalanın özünə 30 manat, ətraf qəsəbələrə isə 40 manata su satırlar. Hazırkı durumda isə bir təsərrüfat ortalama 2-3 maşın su işlədir ki, bu suyu almaq da, təbii olaraq, insanların maddi imkanları xaricinə çıxır.
“Bəzi fermerlər əkin sahələrini suvarmaq üçün şor sudan istifadə etmək məcburiyyətində qalıblar”
Sosial sahə üzrə ekspert Mayis Əliyev qeyd etdi ki, Neftçalada əhali istifadə etməyə su tapmır, çox ciddi içməli su qıtlığı yaranıb: “Aqrar sektorda suvarma problemi var. Bəzi fermerlər əkin sahələrini suvarmaq üçün şor sudan istifadə etmək məcburiyyətində qalıblar ki, bu da səhv qərardır”.
Həmsöhbətimizin sözlərinə görə, son illər müşahidə olunan qlobal iqlim dəyişmələi nəticəsində Kür çayında suyun səviyyəsi azalıb. Suyun səviyyəsinin azalması da kənd və qəsəbələrin su təchizatında problem yaşadır. Bu istiqamətdə çoxlu sayda iş görülməlidir. Nəzərə almaq lazımdır ki, qarşıdan yay fəsli gəlir. Su alınmaqla su problemi həll edilməz.
Günel CƏLİLOVA
