Sosial şəbəkələrdə dövlət tibb müəssisələrində sağlamlıq haqqında arayışın ödənişli olması ilə bağlı məlumatlar yayılıb. Bildirilir ki, ölkədə icbari tibbi sığorta sisteminin tətbiqinə qədər ödənişsiz verilən arayış üçün hazırda 30 manat xidmət haqqı tələb olunur.
Qeyd etdiyimiz kimi, sürücülük vəsiqəsi üçün də tibbi arayış tələb olunur. Sürücülük imtahanı vermək üçün tibbi arayış alan vətəndaş 8 ixtisaslı həkim müayinəsi, 1 laborator müayinə, 1 kardioloji, 1 rentgen müayinəsindən keçir. Buraya həkim-terapevtin, həkim-otolarinqoloqun, həkim-oftalmoloqun, həkim-cərrahın, həkim-nevropatoloqun, həkim-endokrionoloqun və ixtisaslı həkimin baxışı, eləcə də qanda qlükozanın kəmiyyətinin təyini, elektrokardioqramma, flüoroqrafiya müayinələri daxildir.
İcbari Tibbi Sığorta üzrə Dövlət Agentliyi – Aynurə Əhmədova: “Sürücülük vəsiqəsi üçün tibbi arayışa 30 manat, sağlamlıq haqqında iş yerinə təqdim edilən arayış üçünsə 15 manat ödənilməli olacaq”
Tibbi arayışın verilməsi üçün pulun tələb olunması ilə bağlı İcbari Tibbi Sığorta üzrə Dövlət Agentliyinin ictimaiyyətlə əlaqələr sektorunun müdiri Aynurə Əhmədova bildirdi ki, bundan sonra sözügedən ödənişlər rəsmləşdiriləcək: “Sürücülük vəsiqəsi üçün tibbi arayışa 30 manat, sağlamlıq haqqında iş yerinə təqdim edilən arayış üçünsə 15 manat ödənilməli olacaq. Hər iki məbləğə ƏDV daxildir. Bəzi hallarda sağlamlıq haqqında iş yerinə təqdim edilən arayış üçün əlavə olaraq ixtisaslı həkimlərin – psixoloq, narkoloqun müayinəsi tələb oluna bilər, bu zaman isə məbləğ həmin müayinələrdən asılı olaraq müəyyənləşir”.
A.Əhmədova qeyd etdi ki, yalnız 18 yaşına kimi şəxslərə arayış pulsuz veriləcək.
İlkin İbrahimov: “...rüsum 5 manatdan 40-50 manata kimi dəyişə bilər”
Sığorta üzrə mütəxəssis İlkin İbrahimov bildirdi ki, icbari tibbi sığortanın tətbiq edildiyi ölkələrdə də, bizdə olduğu kimi, xidmətlər zərfi mövcuddur: “Məbləğlər həmin xidmətlər zərfinin içərisində müəyyən olunur. Bizdə də qaydalar icbari tibbi sığortanın tətbiq edildiyi dünya ölkələrindən götürülüb. Bəzi məsələlər var ki, onlar hazırda da aktualdır, bu da əlavə olunmalı və əlavə olunacaq xidmətlərlə bağlıdır. Təəssüf ki, həmin məsələlər həyata keçirilmir. Çünki dövlətin başı icbari tibbi sığortanı bütün ölkə boyu yaymağa qarışıb. Yalnız bundan sonra xidmətlər zərfinin üzərinə yeni xidmətlər əlavə edilməklə, bu kimi məsələlər də həyata keçirilə bilər”.
Həmsöhbətimiz onu da əlavə etdi ki, arayışın verilməsi artıq pullu xidmətə çevrilib: “Elə arayışlar var ki, pulsuz təqdim olunur, bəzi arayışlara görə rüsum 5 manatdan 40-50 manata kimi dəyişə bilər. Bu, həmin arayışın hansı xidmətlərlə əlaqəli olduğu və onun alınması üçün nə qədər sənəd lazım olmasından asılıdır. Bunların da aradan qalxması üçün ictimai nəzarətin olması mütləqdir. Nazirlər Kabineti həmin xidmətlər paketində dəyişiklik etməlidir”.
Adil Qeybulla: “...icbari tibbi sığortanın xidmətlər zərfinə salınması vacibdir”
Professor, tibbi ekspert Adil Qeybulla bildirdi ki, vətəndaşların daha çox müraciət etdiyi arayışların icbari tibbi sığortanın xidmətlər zərfinə salınması vacibdir. Onun sözlərinə görə, gələcəkdə xidmətlər zərfinə daxil olan xidmətlərin sayı artırıldıqca, bu məqam nəzərə alınmalıdır: "Hazırda buna görə vətəndaşdan pul tələb olunursa, bunun mütləq qəbzi vətəndaşa təqdim olunmalıdır. Vətəndaş da bilməlidir ki, ödədiyi vəsait hansı qurumun büdcəsinə gedir".
Günel CƏLİLOVA
