Aprelin 26-da Azərbaycan Respublikası Müharibə, Əmək və Silahlı Qüvvələr Veteranları Təşkilatında Azərbaycan Respublikası Mədəniyyət Nazirliyinin təşəbbüsü və AR “Xatirə kitabı” redaksiyası əməkdaşlarının gərgin əməyi nəticəsində faşizm üzərində Qələbənin 75 illiyinə həsr edilən “Qələbə-75: Azərbaycan xalqının mübarizə əzmi” kitabının təqdimat mərasimi keçirildi.
Nəzakət Məmmədova: “Azərbaycan xalqının faşizm üzərində Qələbənin qazanılmasında oynadığı rol, bütövlükdə, xüsusi buraxılışda öz əksini tapıb”
“Xatirə kitabı” redaksiyasının baş redaktoru Nəzakət Məmmədova çıxışında bildirdi ki, “Xatirə kitabı”nın xüsusi buraxılışı olan “Qələbə-75: Azərbaycan xalqının mübarizə əzmi” 2020-ci ildə işıq üzü görsə də, pandemiya səbəbindən ötən il kitabı geniş ictimaiyyətə təqdim etmək mümkün olmayıb. N.Məmmədova vurğuladı ki, “Qələbə-75: Azərbaycan xalqının mübarizə əzmi” “Xatirə kitabı”nın xüsusi buraxılışıdır və burada faşizm üzərində Qələbənin 75 illiyinə geniş yer ayrılıb, 1941-1945-ci illərdə alman faşizminə qarşı döyüşən Azərbaycan vətəndaşlarının qəhrəmanlıq və şücaəti xüsusi rakursda xarakterizə edilib. O, həmçinin, qeyd etdi ki, xüsusi buraxılışda “Sovet İttifaqı Qəhrəmanı” adına layiq görülmüş azərbaycanlıların hər biri haqqında ayrı-ayrılıqda geniş məlumatlar əks olunub, bundan əlavə, müharibədə örnək hünər göstərmiş cəsur qadınlarımız barədə olduqca maraqlı, tutarlı faktlar yer alıb. “Kitabda Sovet İttifaqı qəhrəmanlarımızın hər biri haqqında dəqiq səhih məlumatlar öz əksini tapıb. Həmçinin, Böyük Vətən müharibəsinin qələbə ilə başa çatmasında xüsusi rol oynamış arxa cəbhənin, Bakı neftinin, gecə-gündüz demədən ağır əziyyətlərə qatlaşaraq işləyən insanlarımızın fədakarlığı, Vətən sevgisi də məzmunlu, sərrast şəkildə işıqlandırılıb. “Xatirə kitabı” yaddaşımızın tarix salnaməsidir, abidəsidir”.
N.Məmmədova vurğuladı ki, “Xatirə kitabı” redaksiyası Prezident İlham Əliyevin diqqət və qayğısı altında bugünkü və gələcək strateji işlərini də eyni məhəbbət və həvəslə davam etdirmək üçün əzmlə çalışır.
“Qələbə-75: Azərbaycan xalqının mübarizə əzmi” nəşrinin rus və Azərbaycan dillərində işıq üzü gördüyünü xatırladan N.Məmmədovanın sözlərinə görə, kitab nəşr edildikdən sonra onun nüsxələri poçt vasitəsilə MDB ölkələrinə göndərilib. N.Məmmədova bildirdi ki, böyük sovet ailəsinə daxil olan və əhalisi 3 milyon 400 min nəfər təşkil edən Azərbaycan Respublikasından 1941-1945-ci illər müharibəsinə 680 min nəfər cəlb olunub, bunların arasında isə 10 mindən çoxu qadın olub. Müharibəyə gedənlərin də 300 min nəfərinin geri qayıtmadığı, həlak olduğu, itkin, əsir düşdüyü məlumdur. “Bunlar hamısı nəşrdə işıqlandırılıb. Bilirsiniz ki, “Xatirə kitabı” ulu öndərin yaratdığı, nəfəs verdiyi bir abidədir. “Xatirə kitabı”nın yaranmasına ulu öndər tərəfindən 1997-ci ildə qərar verilib. “Xatirə kitabı” Azərbaycandan müharibəyə getmiş, şəhid olmuş, itkin düşmüş, girov götürülmüş vətəndaşlarımızın xatirəsinin əbədiləşdirilməsi ilə bağlı yaradılıb. İndiyə qədər “Xatirə kitabı”nın 16 cildi işıq üzü görüb, üç xüsusi buraxılışımız nəşr olunub. Azərbaycan xalqının faşizm üzərində Qələbənin qazanılmasında oynadığı rol, bütövlükdə, xüsusi buraxılışda öz əksini tapıb”.
Əvvəlki cildlərin əlavələrinin də nəşr ediləcəyini deyən N.Məmmədovanın sözlərinə görə, bu istiqamatdə görüləcək işlər az deyil və bunlar mərhələli şəkildə həyata keçiriləcək. O dedi ki, hər bir soydaşımızla bağlı axtarışlar davam etdirilir, onların haqqında məlumatlar çətinliklə əldə edilir. Müharibənin keçdiyi bütün ölkələrdən “Xatirə kitabı”na gələn bütün məlumatların araşdırıldığını, dəqiqləşdirildiyini deyən N.Məmmədova onların hamısını bir nəşrə yerləşdirməyin mümkün olmadığını söylədi, ona görə də əlavələrdən ibarət 5 cildlik də nəşr ediləcək.
N.Məmmədova bildirdi ki, eyni zamanda, Birinci Qarabağ müharibəsində şəhid olan 20 min vətəndaşımızın da xatirəsinin əbədiləşdirilməsi istiqamətində işlər görülüb, kitablar çap olunub.
N.Məmmədova dedi ki, işləri çoxdur və hələ qarşıda 44 günlük müharibədə özünü qəhrəman kimi bir daha təsdiqləyən Azərbaycan xalqının zəfər tarixi də yazılacaq.
Hikmət Məlikzadə: “Kitab böyük bir tarixi özündə əks etdirir”
Tədbirdə çıxış edən, “Xatirə kitabı”nın “Qələbə-75: Azərbaycan xalqının mübarizə əzmi” nəşrinin meydana gəlməsində böyük əməyi olan redaksiya əməkdaşı Hikmət Məlikzadə sözlərini böyük türk şairi Akif Ərsoyun “Bayraqları bayraq yapan üstündəki qandır, topraq uğrunda ölən varsa, Vətəndir”şeiri ilə başladı. H.Məlikzadə nəşrin məziyyətlərindən danışarkən qeyd etdi ki, “Xatirə kitabı” redaksiyasının əməkdaşlarının gərgin əməyi və Mədəniyyət Nazirliyinin təşəbbüsü ilə hazırlanan kitab Böyük Vətən müharibəsində canlarından keçmiş Azərbaycanın qəhrəman oğul və qızlarının xatirəsinə bir yaddaş salnaməsidir: “Kitab böyük bir tarixi özündə əks etdirir. Digər xalqlar kimi, Azərbaycan xalqı da İkinci Dünya müharibəsinin ağrılarını hiss etdi, müharibənin əsas obrazlarından, qəhrəmanlarından birinə çevrildi. “Qələbə-75: Azərbaycan xalqının mübarizə əzmi” kitabı əsas ideya olaraq elə bu məsələni özündə birləşdirib. Kitabda müharibədə canlarından keçmiş qəhrəman Azərbaycan qızlarının və oğullarının, eyni zamanda, Qələbənin əldə olunmasında öz fədakar əməyi, ağır zəhməti ilə diqqət çəkmiş Azərbaycan xalqının, Bakı neftinin, bir sözlə, arxa cəbhənin rolu xüsusi qeyd olunub”.
Bəhram Zahidov: “...nəşr haqqında təəssüratlarım çox zəngindir”
Azərbaycan Respublikası Müharibə, Əmək və Silahlı Qüvvələr Veteranları Təşkilatının hüquq şöbəsinin müdiri, professor Bəhram Zahidov da “Qələbə-75: Azərbaycan xalqının mübarizə əzmi” kitabı haqqında öz fikirlərini bildirdi və kitabın onda zəngin təəssürat yaratdığını bildirdi. Böyük zəhmət hesabına başa gələn kitabın mühüm cəhətlərini vurğuladı və bəzi tövsiyələrini çatdırdı. “Kitabla yeni tanış olmağıma baxmayaraq, nəşr haqqında təəssüratlarım çox zəngindir. Kitab çox nəfis şəkildə çap olunub, bu, böyük zəhmət hesabına başa gəlib, yaradıcı heyətə təşəkkür edirəm. Mən “Qələbə-75: Azərbaycan xalqının mübarizə əzmi” kitabını müsbət qiymətləndirirəm” - deyə professor qeyd etdi.
Adil Haqverdiyev: “Bizim bu qəhrəmanlıq salnaməmizin gələcək nəsillərə çatdırılması üçün bu kitabın mühüm yeri var”
Azərbaycan Respublikası Müharibə, Əmək və Silahlı Qüvvələr Veteranları Təşkilatının şöbə müdiri Adil Haqverdiyev də çıxışında kitabı yüksək qiymətləndirdiyini vurğuladı. “Qələbə-75: Azərbaycan xalqının mübarizə əzmi”ni bir yaddaş salnaməsi adlandıran A.Haqverdiyev “Bu kitab tarixdir, qalacaq. Müharibədə hər 5 tankdan 4-ü, hər 5 təyyarədən 4-ü Azərbaycanın nefti ilə hərəkət edirdi. Azərbaycan nefti olmasaydı, müharibəni udmaq mümkün olmazdı. Bu müharibədə həm ön, həm də arxa cəbhədə xalqımız böyük qəhrəmanlıq salnaməsi yaradıb. Bizim bu qəhrəmanlıq salnaməmizin gələcək nəsillərə çatdırılması üçün bu kitabın mühüm yeri var” - deyə bildirdi.
Telman Babayev: “Bizim üçün “Xatirə kitabı” böyük tarixdir”
Veteranlar Təşkilatının şöbə müdiri Telman Babayev də çıxışında vurğuladı ki, “Xatirə kitabı” redaksiyasının nəşr etdirdiyi kitablar bütün ölkə üçün faydalıdır. Tez-tez bu nəşrlərə müraciət etdiklərini deyən T.Babayevin sözlərinə görə, redaksiya bu sahədə çöx böyük işlər görür və onların şöbəsi mütəmadi olaraq “Xatirə kitabı”nın nəşrlərindən çox istifadə edir. “Bizim üçün “Xatirə kitabı” böyük tarixdir. Əsas etibarilə “Xatirə kitabı” həlak olmuşlar və itkin düşmüşlər haqqındadır. İndi də vətəndaşlarımız öz qohum-qardaşlarını axtaranda bizə müraciət edirlər, biz də “Xatirə kitabı”na üz tuturuq və ondan istifadə edirik” - deyə T.Babayev vurğuladı.
Kitabın xüsusi əhəmiyyətini qeyd edən Müharibə, Əmək və Silahlı Qüvvələr Veteranları Təşkilatının Beynəlxalq əlaqələr şöbəsinin baş mütəxəssisi Samir Musayev isə çıxışında bildirdi ki, bu nəşri mütəmadi olaraq izləyib və təklif etdi ki, həm “Qələbə-75: Azərbaycan xalqının mübarizə əzmi”, həm də “Xatirə kitabı”nın bütün cildləri Azərbaycanın xarici ölkələrdəki səfirliklərinə göndərilsin.
“Xatirə kitabı” redaksiyasının redaktoru Vüqar Əsgərov isə çıxışında redaksiya əməkdaşlarının soydaşlarımız barədə məlumatları böyük zəhmət, əziyyət hesabına əldə etdiklərini və hər bir qəhrəmanımız haqqında məlumata böyük həssaslıqla yanaşıldığını nəzərə çatdırdı.
İradə SARIYEVA
