Dünyada hər milyon nəfərə yoluxma sayına görə Gürcüstan 25-ci, Ermənistan 34-cü, Azərbaycan 84-cüdür. Ümumilikdə, bu günə qədər Azərbaycanda 313 006 nəfər, Gürcüstanda 304 272 nəfər, Ermənistanda isə 213 469 nəfər koronavirusa yoluxub. Ötən müddət ərzində 4 371, Gürcüstanda 4 043, Ermənistanda 4 040 nəfər koronavirusdan vəfat edib.
Belə baxanda Azərbaycan əhalisinin sayı həm Gürcüstandan, həm də Ermənistandan qat-qat çoxdur. Belə ki, Azərbaycanda əhalinin sayı Gürcüstandan 2 dəfə, Ermənistandan isə 3 dəfə çoxdur. Ancaq sözügedən ölkələrlə müqayisədə Azərbaycanda hər milyon nəfərə koronavirus xəstələrinin sayı qat-qat azdır. Azərbaycan bu cür əlverişli mövqeyə necə nail olub?
“Görülən kompleks tədbirlərin nəticəsidir ki, yoluxanların sayı digər Cənubi Qafqaz ölkələrində əhali nisbətinə görə elə də böyük deyil”
Məsələyə münasibət bildirən tanınmış həkim, Azərbaycan Tibb Universitetinin dosenti Aydın Əliyev bunu bir sıra amillərlə əlaqələndirdi: “Məsələ ondadır ki, pandemiya yeni yayılanda Azərbaycan qabaqlayıcı addımlar atdı. Hələ koronavirus ölkədə elə də yayılmadığı bir dövrdə müəyyən preventiv tədbirlər görüldü. Ölkədə bir sıra karantin tədbirləri həyata keçirildi. Eyni zamanda, həkimlərin təbliğatı başladı. Söhbət gigiyenik qaydalara əməl olunmasından və digər bu kimi məsələlərdən gedir. Cəmiyyətə başa salmağa başladılar ki, belə situasiyalarda necə qorunmaq lazımdır. Bütün bunlarla paralel, ölkədə maska problemi həll edildi. Maska istehsalı ilə bağlı müəssisə fəaliyyətə başladı. Bu kimi tədbirlərin görülməsi, nəticə etibarilə, bizdə pandemiyanın geniş yayılmasına imkan vermədi. İlk aylarda virusdan qorunmaqla bağlı çağırışlara əhali elə də əməl etmədi. Maskaya laqeyd yanaşanlar oldu. Əgər ilk dövrlərdə əhali bu çağırışlara daha ciddi yanaşsaydı, o zaman virusa yoluxanların sayı daha az olardı. Bütün bunlara rəğmən, pandemiyanın təsirlərinin minimuma endirilməsi ilə bağlı görülən tədbirlər bizdə alındı. Görülən kompleks tədbirlərin nəticəsidir ki, Azərbaycanda virusa yoluxanların sayı digər Cənubi Qafqaz ölkələrində əhali nisbətinə görə elə də böyük deyil. Hiss olunur ki, cəmiyyətdə virusdan qorunmaqla bağlı savadlılıq artıb. Ermənistanın virusdan qorunmaq üçün nə iqtisadi resursları var, nə də digər imkanları. Erməni cəmiyyəti xəstə təfəkkürə malik olduğu üçün, onlar qaydalara əməl etmək düşüncəsindən uzaqdırlar”.
A.Əliyev hesab edir ki, ölkədə vaksinasiya prosesi getdiyi üçün bir müddət sonra virusa yoluxmada azalma ola bilər.
Vidadi ORDAHALLI
