Məlum olduğu kimi, aprelin 22-də Daxili İşlər Nazirliyində videokonfrans formatında mülkiyyət əleyhinə cinayətlər, narkotiklərin qanunsuz dövriyyəsinə qarşı mübarizə, cinayət işlərinin istintaqı və təhqiqat sahəsində fəaliyyətin nəticələrinə və qarşıda duran vəzifələrə həsr olunmuş Kollegiya iclası keçirilib.
Kollegiya iclasında general-polkovnik V.Eyvazov cari ilin birinci rübündə asayişin və ictimai təhlükəsizliyin təmini ilə bağlı qarşıya qoyulmuş vəzifələrin, bütövlükdə, layiqincə yerinə yetirildiyini, cinayətkarlığa qarşı mübarizədə, insan hüquq və azadlıqlarının qorunması sahəsində əldə olunmuş müsbət nəticələrin hesabat dövründə də qorunub saxlandığını və inkişaf etdirildiyini diqqətə çatdırıb. O, həmçinin, xidməti fəaliyyətdə səmərəliliyin artırılması, xüsusən vətəndaşların narkotiklərin ziyanlı nəticələrindən qorunması, həmin vasitələrin tranzit daşınmasının qarşısının alınması, bu işin sərhədyanı bölgələrdə daha da gücləndirilməsi üzrə tapşırıq və tövsiyələrini verib.
Vilayət Eyvazov DİN-in Kollegiya iclasında deyib ki, ilin 1-ci rübündə qarşıya qoyulmuş bütün vəzifələr layiqincə icra olunub. Polis buna necə nail oldu?
“...gördüyü işlər Avropa ölkələrinə nümunə olacaq səviyyədədir”
“Polisə Dəstək” İctimai Birliyinin sədri Şəmsəddin Əliyev baki-xeber.com-a bildirdi ki, DİN-in Kollegiya iclasında müzakirə edilən məsələləri, verilən qərarı, təqdim edilən uğurlu nəticələri mətbuat vasitəsilə izləyib. Ş.Əliyevin sözlərinə görə, Azərbaycan polisi hər zaman öz üzərinə düşən vəzifələrin öhdəsindən yüksək peşəkarlıqla, bacarıqla, məsuliyyətlə gəlib. “Azərbaycan polisi üzərinə düşən vəzifəni Daxili İşlər Nazirliyinin fəaliyyətinin normativ-hüquqi aktlarının tələbinə uyğun həyata keçirə bilir. Bu həm də onun yüksək peşəkarlığından irəli gəlir. Tam səmimi deyim, Azərbaycan polisi həm insan hüquqlarının, həm də ictimai asayişin təmin olunması və təbii ki, cinayətkarlıqla mübarizədə dövlət siyasətinin icrası istiqamətində kifayət qədər böyük işlər görüb. Polis ötən illərdən bağlı qalmış cinayət işlərinin açılmasında, həm mütəşəkkil cinayətkarlıq, həm insan alveri, həm də narkotik maddələrin qanunsuz dövriyyəsi və digər cinayət növləri ilə mübarizədə yüksək peşəkarlıq səviyyəsinə uyğun olaraq, öz fəaliyyətini həyata keçirə bilib. Bu nədən irəli gəlir? Buna daha çox Azərbaycan polisinin, istər zabit heyətinin, istərsə də sıravi, əməliyyat müvəkkili heyətinin hər birinin üzərinə düşən vəzifələri prinsipiallıqla, kənara sapmadan, təkmil şəkildə həyata keçirməsi nəticəsində nail olunub. Bu işdə peşəkarlıq, öz vəzifəsinə sədaqət, göstərilən etimada, edilən etibara, sözün əsl mənasında, düzgün riayət edilməsi öz bəhrəsini verir. Bu səbəbdən də tam məsuliyyətlə bildirirəm ki, Azərbaycan polisinin bu istiqamətdəki missiyası, gördüyü işlər Avropa ölkələrinə nümunə olacaq səviyyədədir”.
Azərbaycan polisinin fəaliyyətinin onlar üçün bir nümunə olduğunu danmadıqlarını deyən Ş.Əliyevin sözlərinə görə, bəzən Avropada bunu etiraf edirlər. “İnsan alveri ilə bağlı bizim koordinatorumuz beynəlxalq tribunalarda hesabat verərkən avropalılar mat-məəttəl qalırlar ki, Azərbaycan polisi bunu hansı metodlarla, hansı üsullarla həyata keçirir. Azərbaycan polisinin 2021-ci ilin 1-ci rübündə asayiş və ictimai qaydanın təmin olunması sahəsində qarşıya qoyulmuş bütün vəzifələri layiqincə icra etməsinin başlıca səbəbi öz işinə prinsipial yanaşması, peşəkarlığı və missiyasını layiqincə yerinə yetirməsidir. Polisin cinayətkarlıqla mübarizə missiyasını layiqincə yerinə yetirdiyi göz önündədir. Bu məsələdə cəmiyyətin sezmədiyi bir məqam da var. Burada Azərbaycan cəmiyyətinin, ictimaiyyətinin Azərbaycan polisinə verdiyi dəstəyin də rolu danılmazdır. Çünki tarixən polis yaranandan bu günə qədər cəmiyyətin, xalqın dəstəyi olmadan cinayətkarlıqla mübarizədə öz işini həyata keçirməkdə çətinlik çəkib. Bu gün müstəqillik dövründə hüquqi dövlətin anlamına uyğun cəmiyyət də bu məsələdə biganə qalmır, seyrçi mövqedə dayanmır, ona görə də bu işin müsbət bəhrəsi, səmərəsi var” - deyə Ş.Əliyev qeyd etdi.
İradə SARIYEVA
