Pandemiyanin lap ilk günlərindən bu virusa yoluxanların ailələri iddia edirdilər ki, xəstəni xəstəxanaya aparmaq üçün çağırdıqları təcili yardım xidməti onlardan pul tələb edir, ən azı 300-400 manat almamış xəstəni xəstəxanaya aparmırlar. Cəmiyyətdə belə iddialar səsləndirilirdi ki, təcili yardıma qanunsuz şəkildə ödənilən vəsait öz yerində, xəstənin xəstəxanaya götürülməsi üçün də külli miqdarda pul tələb olunurdu. Bir sözlə, xəstənin ailəsinin pulu yoxdursa, onun xəstəxanaya çatdırılması olduqca çətin olub.
Bu qanunsuzluqlar baş veribsə, demək, kimlərsə əməlli-başlı şəbəkə yaradaraq dövlətin koronavirusla mübarizə siyasətinə kölgə salmaqla məşğul olurmuş. Bilirik ki, apteklərdə koronavirusun müalicəsində istifadə edilən dərmanlar ən azı 5 qat bahasına satılırdı, hətta yardım dərman bağlamaları belə apteklərdə satışa çıxarılmışdı. Bütün bunlar isə, heç şübhəsiz, dövlətin pandemiya ilə mübarizə siyasətinə kölgə salmağa çalışan ziyankar şəbəkənin əməlləridir ki, artıq onlar da ifşa olunmaqdadır.
Ekspertlər deyirlər ki, koronavirusla mübarizə sahəsində dövlət tərəfindən məqsədyönlü siyasət yürüdülür və dövlət hər an öz vətəndaşını düşünür, onun sağlamlığının qayğısına qalır, xəstəlikdən azad olunması üçün bütün resursları səfərbər edir. Ekspertlərə görə, lakin təəssüf ki, koronavirusla mübarizə cəbhəsində dövlətin apardığı siyasətə kölgə salmaq istəyənlər də tapılır. Onlar deyirlər ki, halbuki, bu sahəyə məsul olanlar öz mənfəətlərini düşünməyi deyil, dövlətin maraqlarını əsas götürməlidirlər. Amma Yeni klinikanın baş direktorunun və FHN Hospitalının baş həkiminin həbsi onu göstərdi ki, bəziləri öz vəzifə səlahiyyətlərini aşmaqla məşğul olub, xalqdan pul tələb ediblər.
“TƏBİB, Səhiyyə Nazirliyi vətəndaşlar arasında dolaşan söz-söhbətləri araşdırıb, həqiqəti üzə çıxarıb və narazılıqlara yol açanları cəzalandırmalı idilər”
Sosial-iqtisadi sahə üzrə tanınmış ekspert İlqar Hüseynli hesab edir ki, bütün xəbərlərin ilk mənbəyi xalqdır və xalq arasında gəzən söz-söhbətlərin bir müddət sonra, əslində, gerçəklik olduğu üzə çıxır. “Ümumiyyətlə, xəbərin ilkin mənbəyi həmişə xalqdır, əhalidir, vətəndaşdır. Çünki vətəndaş üzləşdiyi neqativ problemlərlə bağlı məsələləri daim başqaları ilə də bölüşür və bu, qısa zamanda yayılır, biz isə camaat arasında yayılan xəbərin xeyli vaxtdan sonra həqiqət olduğunu müşahidə edirik. Yəni bu, zaman-zaman belə olub. Əslində, koronavirusla mübarizəyə kölgə salmağa xidmət edən neqativ hallarla, xəstələrin xəstəxanalara yerləşdirilməsi üçün rüşvətalma ilə bağlı ilkin informasiyalar cəmiyyətdə, əhali arasında dolaşanda bununla əlaqədar dərhal aidiyyəti orqanlar ölçü götürməli idilər. Dövlətin ayrı-ayrı qurumları, hüquq-mühafizə orqanları, TƏBİB, Səhiyyə Nazirliyi vətəndaşlar arasında dolaşan söz-söhbətləri araşdırıb, həqiqəti üzə çıxarıb və narazılıqlara yol açanları cəzalandırmalı idilər. Bu istiqamətdə monitorinqlər keçirilməli, nəzarət gücləndirilməli olduğu halda, amma bu baş vermədi. Təxmini hesablayıram, Yeni klinikada baş verən rüşvət faktını adam sayına vursaq, bu hardasa 2 milyon, 2 milyon yarım vəsait deməkdir. Burada rüşvətdən söhbət gedir. Ola bilməz ki, xəstələrdən qanunsuz olaraq alınan pullar klinika direktoru tərəfindən tək mənimsənilsin, burada şübhəsiz ki, səhiyyə orqanlarının əməkdaşlarının mütəşəkkil cinayətkarlığından söhbət gedir. Yəni belə faktlar var”.
İ.Hüseynli deyir ki, hazırda məlum məsələ ilə bağlı istintaq gedir və məhkəmə onların nə dərəcədə cinayətkar olduğunu sübuta yetirəcək. “Biz ayrı-ayrı şəxslər barədə cinayətkar deyə bilmərik, o zamana qədər ki, məhkəmənin qanuni hökmü qüvvəyə minmiş olsun. Söhbət doğrudan da azad və ədalətli məhkəmələrdən gedirsə, onda məhkəmə baş verənlərlə bağlı öz sözünü deyəcək. Sözsüz ki, bununla bağlı tədbirlər davam etdirilməli, neqativliklərin qarşısı alınmalıdır” - deyə ekspert vurğuladı.
Koronavirus dərmanlarının da baha olduğunu deyən ekspert hesab edir ki, buna qarşı lap ilkin vaxtdan mübarizə aparılmalı idi. İndi də bu məsələnin ciddi nəzarət altında olmalı olduğunu deyən İ.Hüseynli hesab edir ki, öz mənfəətini vətəndaşın vəziyyətindən, rifahından, sağlamlığından üstün tutanlara qarşı tədbirlər davam etdirilməlidir.
İradə SARIYEVA
