Bütün insanların bu dünyaya gəlişi, demək olar ki, eyni cür baş verir. Bu dünyaya gələn hər kəs Allahdan ona qismət olan ömür payını yaşayır. Amma, təbii, hər kəsin eyni yaşam tərzi olmur. Əlbəttə, bu, bəxtdən, fərasətdən, qabiliyyətdən, ən başlıcası, hər kəsin yaşadığı cəmiyyətdəki mühitdən çox asılıdır.
Bu dünyadakı insanların həyatdan köçmələri də fərqlidir. Əcəli çatıb ölənlər, bədbəxt hadisələr səbəbindən ömrü yarıda kəsilənlər də var. Elə insanlar da var ki, onlar nə əcəli gözləyir, nə də qəza və bədbəxt hadisələrin qurbanına çevrilirlər. Onlar öz əlləri ilə həyatlarına son qoyurlar. Bu yolun yolçuları intihar edənlərdir.
Son dövrlər cəmiyyətimizdə intihar hallarının sayı çoxalıb. Demək olar ki, hər gün bir neçə intihar hadisəsi baş verir. İntihar edənlərin əksəriyyətini isə gənclər və yeniyetmələr təşkil edir. Ekspertlər intihar edənlərlə bağlı müxtəlif fikirlər səsləndirirlər. Aparılan araşdırmalara görə, intihar edənlər arasında imkanlı ailələrin fərdləri də üstünlük təşkil edirlər. Qeyd edək ki, əvvəllər intiharın səbəbi kimi maddi çətinlik göstərilirdi. Ancaq son zamanlar intihar edənlər arasında imkanlı ailələrin fərdlərinin üstünlük təşkil etməsi bu fikirlə uzlaşmır.
Maraqlıdır, imkanlı ailələrin üzvləri nə səbəbdən intihara meyl edirlər? Axı onların maddi sıxıntısı yoxdur, istədikləri əşyanı, geyimi rahatlıqla əldə edə bilərlər.
Məsələ ilə bağlı fikir bildirən psixoloq Könül İsmayılova bildirdi ki, intihar, bütün hallarda, etiraz formalarından biridir: "Eyni zamanda, şəxsin axtarmış olduğu çıxış yoludur. Nə qədər neqativ də olsa, bu, bizim cəmiyyətdə baş verir. İntihara səbəb olan faktorlar çoxdur. İntihar risqi yaşayanlar əsasən tənhalar, müəyyən zərərli vərdişlərə aludə olanlar, xroniki xəstəliyi və depressiyada olan insanlardır. Ancaq təəssüflər olsun ki, bu gün intiharın cavanlaşdığını görürük. Gənc insanlar, yeniyetmələr intihara meyl edirlər. Problemin kökünə varsaq, bunların əksəriyyəti ailədaxili münaqişələrdən qaynaqlanır”.
Həmsöhbətimiz onu da əlavə etdi ki, intihar edənlər arasında imkanlı ailələrin fərdləri üstünlük təşkil edirlər. Bu hal, demək olar ki, bütün dünyada müşahidə edilir: “Ümumiyyətlə, dünyada təxmini hesablamalara görə, intiharlar daha çox imkanlı ailələrdə qeydə alınır. Nəticə etibarilə, problemi "kasıbçılıq” qədər bəsitləşdirmək düzgün deyil. İmkanlı ailələrdə intiharın daha çox qeydə alınmasının səbəbi həmin ailələrdə diqqətin, qayğının yetərincə olmamasıdır. Bu tip ailələrin bir qismi düşünür ki, pulları varsa, demək, onlarda hər şey normaldır. Ancaq daxilə gedəndə aydın olur ki, o ailədə sevgisizlik, mənəvi boşluq üstünlük təşkil edir. Ümumiyyətlə, içində mənəvi boşluq olan, daxili narahatlıq yaşayan insanlar, xüsusən gənclər intihar düşüncəsinə daha tez qapılırlar. Bu baxımdan, insanların psixoloji dəstək alması çox önəmlidir. Amma burada bir yanlış yanaşma var. Hamı gözləyir ki, hansısa psixoloji problem yaransın, sonra psixoloqa üz tutsun. Zamanında profilaktik tədbirlər görülərsə, qabaqlayıcı addımlar atmaq mümkün olar”.
Günel CƏLİLOVA
