Sosial şəbəkələrdə Şəkinin Daşüz kəndində yerləşən Respublika Atçılıq Turizm və Atüstü Milli Oyunlar Mərkəzində atların yem çatışmazlığı səbəbindən aclıq çəkdiyini əks etdirən məlumat və görüntülər yayıılıb.
Məlumatlarda Mədəniyyət Nazirliyinin balansında olan mərkəzdə saxlanan cins atlara lazımi qədər vəsait ayrılmaması səbəbindən yem tədarükünün kifayət etmədiyi iddia olunur. Şəki sakini Taleh Mustafayevin yazdığına görə, heyvanlar yemlə təmin olunmasalar, tezliklə mərkəzdə bəslənən cins atların nəsli kəsilə bilər: "Ümumiyyətlə, son zamanlar Mədəniyyət Nazirliyinin rəhbərliyi dəyişiləndən sonra mərkəzdəki cins atların vəziyyəti çox pisdir. Yem tədarükü vəsaitin az olması səbəbindən tam şəkildə görülmür. Bu da ona gətirib çıxarıb ki, hazırda atlar aclıqdan tələf olur. Nazirlik rəsmilərinin laqeydliyi ucbatından cins atlar itib-batır. Qısa bir zamanda tədbirlər görülməsə, mərkəzdə olan atlar tamamilə məhv olacaqlar".
Qeyd edək ki, mərkəzdəki 40 cins atın 17-si ölüb, 23 başı isə kaxeksiya, yəni orqanizmin kəskin tükənməsi vəziyyətindədir.
Bu atlar bir müddət Azərbaycanın milli atüstü oyun növlərindən biri olan çövkəndə istifadə edilib. Ancaq indi nəinki oyunda iştirak etmək, heç ayaq üstə durmağa taqətləri yoxdur. Onu da bildirək ki, hər birinin qiyməti 5-10 min manat olan ingilis, ərəb və türkmən "Axaltəkə" cins atlarının yemlənməməsi nəticəsində heyvanlar tələf olur. İş o yerə çatıb ki, təsərrüfatda çalışan 12 işçi aylardır almadıqları əməkhaqlarını belə tələb etməyi özlərinə sığışdırmırlar.
“Bununla əlaqədar nazirlikdə müzakirələr aparılır və məsələnin müvafiq həll yolları axtarılır”
Məsələ ilə bağlı Mədəniyyət Nazirliyindən bildirildi ki, müəssisə təsərrüfat hesablı olduğundan, cari il üçün nazirlik tərəfindən ora vəsait ayrılmayıb: "Respublika Atçılıq Turizm və Atüstü Milli Oyunlar Mərkəzi (Şəki şəhəri) təsərrüfat hesablı müəssisədir və 2021-ci il üçün mərkəzin saxlanmasına dair maliyyə vəsaitinin ayrılması Mədəniyyət Nazirliyinin büdcəsində nəzərdə tutulmayıb. Eyni zamanda, qeyd edək ki, bununla əlaqədar nazirlikdə müzakirələr aparılır və məsələnin müvafiq həll yolları axtarılır".
Günel CƏLİLOVA
