Sosial şəbəkələrdə Sabirabadın Sarxanbəyli kəndinin əkin sahələrinin suvarılması ilə bağlı problemi əks etdirən videomaterial yayımlanıb. Həmin videodan görünür ki, sözügedən kənddə su məmurlar tərəfindən satılır.
Videoda bildirilir ki, suvarma suyu Sabirabad Suvarma Sistemləri İdarəsinin rəisi Şafiq Heydərov və Moranlı sahə rəisi olduğu bildirilən Əkbər Əliyev tərəfindən satılır. Sakinlər bildirir ki, Suvarma Sistemləri İdarəsindən isə onlara Kür çayındakı su qıtlığı ilə əlaqədar olaraq suvarma və içməli suyun qrafik üzrə Haş kanalından qidalanan kəndlərə növbə ilə verildiyi bildirilib. Lakin Sarxanbəyli kəndinin su növbəsi çatan kimi sahə rəisi və idarə rəisi ya su nasoslarının xarab olduğunu, ya elektrik naqillərinin qırıldığını, ya da Kür çayının quruduğunu bəhanə gətirir və suyun olmayacağını bildirirlər. Bundan sonra isə onlar kanala vurulan suyu Sarxanbəyli kəndinə çatmamış özlərinə yaxın təsərrüfat sahiblərinə satırlar. Bundan cana doyan sakinlər su satılmasını sübut edən görüntüləri çəkərək ictimailəşdiriblər. Kənd sakinləri bildirir ki, suyu onlara Moranlı sahə rəisi Əkbər Əliyev 50, bəzən də 100 manata satır: “Hətta pul olmayanda suyun əvəzində Əkbər Əliyevə bir quzu da veririk…”
Qeyd edək ki, Prezident bir müddət əvvəl meliorasiya ilə bağlı keçirdiyi müşavirədə məhz bu cür neqativliklərin mövcudluğuna diqqəti yönəltmişdi və konkret olaraq belə halların aradan qaldırılması ilə bağlı tapşırıq vermişdi. Görünür, Sabirabada suvarmaya məsul olan məmurların həmin xəbərdarlıqdan ya məlumatları yoxdur, ya da bu göstərişi qulaqardına vurmağa çalışırlar.
İqtisadçı ekspert Günay Hüseynova “Bakı-Xəbər”ə açıqlamasında xatırlatdı ki, bu yaxınlarda keçirilən müşavirədə Prezident İlham Əliyev Azərbaycanda su ehtiyatlarından səmərəli istifadə olunmasının vacibliyini vurğulayıb: “Bu sahəyə məsul olan məmurlar deyilən tapşırıqları icra etmək əvəzinə, yenə də kəndçiyə suyu pulla satmaqla məşğul olurlar. Suya tələbat çatışmazlıqla bağlıdır. Prezident də məhz məmurların qarşısına çatışmazlıqların aradan qaldırılması tələbini qoydu. Ölkə başçısı dedi ki, biz bundan sonra meliorativ tədbirləri, necə deyərlər, dədə-baba üsulu ilə apara bilmərik. Bizdə mövcud problemlərdən biri də itkilərin böyük həcmdə olmasıdır. Bu itkilər bəzi hallarda təbii xarakter alır, amma bəzi hallarda səhlənkarlıq ucbatından baş verir. Mövcud resurslarımızdan səmərəli və düzgün istifadə edilsə, su kifayət edər. Kənd təsərrüfatında selləmə üsulu ilə suvarma aparılır. Bu üsul suvarma nəticəsində torpağı yararsız hala salır və şoranlaşdırır. Həmçinin, bir o qədər su itkiyə gedir. Biz kənd təsərrüfatında damcı və sızma üsullarından istifadə edə bilərik. Ölkə başçısı itki deyəndə, məhz bu amilləri nəzərdə tuturdu. Azərbaycan qlobal istiləşmənin təsirinə ən çox məruz qalan ərazilərə daxil edilib. 2019-cu ildə Azərbaycana daxil olan sularda 2018-ci illə müqayisədə 4 milyard kubmetr azalma baş verib. Bu o deməkdir ki, problem həll olunmasa, ciddi məhsul qıtlığı yarana bilər. Görünür, məsul şəxslər hələ də təhlükənin səviyyəsini tam başa düşməyiblər. Onlar su israfının qarşısını almaq əvəzinə, onun alverilə məşğul olurlar”.
Ekspertin sözlərinə görə, bu sahədə islahata start verilibsə, belə düşüncədə olan məmurlardan yaxa qurtarmaq lazımdır.
Məhəmmədəli QƏRİBLİ
