Məlum olduğu kimi, Milli Televiziya və Radio Şurası ATV televiziya kanalının yetkinlik yaşına çatmayanların fiziki, əqli və mənəvi inkişafına ziyan vura bilən proqramların onların baxa biləcəyi vaxtda göstərilməsinə görə "Bizimləsən" proqramının yayımının dayandırılması, ATV tərəfindən ona tətbiq edilmiş məsuliyyət tədbirinin məzmunu barədə məlumatı yayımın dayandırılması müddəti ərzində özünün efirində yayımlanmasının təmin olunması haqqında qərar qəbul edib.
Həmçinin, ATV-nin İnzibati Xətalar Məcəlləsinin 388-2.0.2-ci maddəsinə əsasən, 3000 manatdan 4000 manatadək cərimə olunması ilə bağlı Milli Televiziya və Radio Şurası tərəfindən inzibati xəta haqqında protokol tərtib olunub və müvafiq rayon məhkəməsinə göndərilib.
Qeyd edək ki, Milli Televiziya və Radio Şurasının ATV barədə məlum qərarı ölkə ictimaiyyəti tərəfindən müsbət qarşılanır. Ziyalılar, millət vəkilləri, eləcə də sadə vətəndaşlar ATV-də yayımlanan “Bizimləsən" proqramının milli-mənəvi dəyərlərə uyğun olmadığını bildirirlər. Onlar qeyd edirlər ki, bu tip verilişlər insan psixologiyasına mənfi təsir edir, eyni zamanda, ailə dəyərlərinə ziddir. Onu da nəzərə almaq lazımdır ki, məlum veriliş uşaqların da baxa biləcəyi vaxtda yayımlandığı üçün onların da psixikasına mənfi təsir edirdi.
Efir məkanında yayımlanan bu tip verilişlərin tək məqsədi xalqın mənəvi dəyərlərinə zərbə vurmaqdır. Yəni bu proqramlar xalqın mənəviyyatına ləkə gətirir, insanların zövqünü korlayır. Təbii ki, onlara proqram demək mümkündürsə... Danılmaz faktdır ki, onların bütün fikri-zikri şoudur, pul qazanmaqdır, əyləncədir. Bu səbəbdən də ölkə ictimaiyyəti bu tip verilişlərin müvəqqəti deyil, həmişəlik bağlanmasını, onların yerində isə maarifləndirici proqramların olmasını istəyir.
“Telekanallarda bütün günü şou, çal-çağırdır, müharibədən çıxmış ölkənin üzləşdiyi çətinliklər...”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, telekanallarda bütün günü şou, çal-çağırdır. Özü də səviyyəsiz şoular. Müharibədən çıxmış ölkənin üzləşdiyi çətinliklər, milli təhlükəsizliyi, qlobal çağırışlar, pandemiya, iqtisadiyyatın vəziyyəti və sair məsələlər onları heç düşündürmür: “Önəmli olan televiziyanın cəmiyyəti maarifləndirməsi, onu, ilk növbədə, doğru-dürüst məlumatlandırmasıdır. Onun keçmişinə, bu gününə aid tendensiyaları göstərməsidir. Ədəbi zövq, geniş dünyagörüşü formalaşdırmasıdır. Bütün bunlar hamısı qalır bir kənarda, biz efiri veririk bayağı adamların, əyləncə üstündə köklənmiş insanların, səviyyəsiz aparıcıların ixtiyarına. Nəticədə də gördüyümüz bu mənzərə yaranır. Bunun birbaşa cavabdehliyini televiziya siyasətini müəyyənləşdirən və televiziyanı idarə edən insanlar daşıyırlar. Cəmiyyət və xalq qarşısında məsuliyyəti dərindən dərk etmək çox vacibdir”.
Həmsöhbətimiz onu da əlavə etdi ki, televiziyalardakı həmin bayağı verilişlərdə etik qaydalar çox zaman gözlənilmir və bununla bağlı ciddi problemlər yaşanır.
Bu günlərdə ATV-nin “Bizimləsən” proqramında qeyri-etik ifadələr işləndiyinə görə, ümumiyyətlə, bu tip verilişlərdə milli-mənəvi dəyərlərə zidd məlumatlar aşılandığı üçün tətbiq olunan cəza düzgündür. Yaxşı olar ki, cəza sərt şəkildə olardı. Veriliş birgünlük deyil, həmişəlik bağlanardı. Bu tək mənim fikrim deyil. Ölkə əhalisinin yarıdan çoxu bayağı verilişlərin bağlanmasını tələb edir. Efir məkanında maarifləndirici proqramlar olarsa, həm tamaşaçıların dünyagörüşü artar, həm də gözü-könlü xoş olar. Amma özəl kanallar daha çox kommersiya maraqları güdürlər, yəni pul qazanmaq haqqında düşünürlər”.
Günel CƏLİLOVA
