Ucar rayon sakinləri Suvarma Sistemləri İdarəsinin iş prinsipindən şikayətçidirlər. Ucar rayonu, Yuxarı Şilyan kənd sakinləri – Əhmədov Behbud Abbas oğlu və Əhmədov Yaşar Bəhlul oğlu kənddə yaşanan su problemi ilə bağlı öz şikayətlərini yayıblar.
Bildirilir ki, Ucar Rayon İcra Hakimiyyətinin başçısı Mənsur Məmmədovun qardaşı, Ucar Rayon Suvarma Sistemləri İdarəsinin müdiri Müşfiq Məmmədov vəzifə səlahiyyətlərindən sui-istifadə edib, qanunsuzluqla, özbaşınalıqla məşğul olur. Nəticədə də kənd sakinləri susuzluqdan əziyyət çəkirlər: “Məlumdur ki, Yuxarı Şilyan kənd sakinlərinin əsas məşğuliyyəti əkinçilik və maldarlıqdır. Başqa yerdən gəlirimiz və məşğuliyyətimiz yoxdur. Payızda əkdiyimiz əkini hələ də sulaya bilməmişik. Çünki Ucar Rayon Suvarma Sistemləri İdarəsinin müdiri Müşfiq Məmmədov suyu pulla satır. Baxmayaraq ki, biz vaxtında su pulunu veririk. Ancaq yaradılan bazarın özəl qiymətlərini ödəməyə pulumuz olmadığı üçün su üzünə həsrət qalmışıq. Rayon ərazisində çəltik əkənlər hər hektar üçün 500 manat pul ödəyir deyə onlar daim su ilə təmin olunurlar”.
Sakinlər onu da bildirirlər ki, suyun verilməməsi nəticəsində əkin sahələri zay olur: “Bu isə ailəmizin aclıqdan ölməsi deməkdir. Aidiyyəti qurumlar bu məsələ ilə maraqlanıb, kəndlilərin su sarıdan yaşadığı problemi həll etsinlər”.
Qeyd edək ki, Prezident İlham Əliyev də dəfələrlə bölgələrdə suvarma sahəsində problemin yaşandığını qeyd edib. Prezident çıxışlarında bəzi rayonlarda suvarma sahəsinə baxan şəxslərin suyu yalnız öz sahələrinə istifadə etdiyini və ya pulla satdığını qeyd edib. Ölkə başçısının toxunduğu problem zaman-zaman səsləndirilir.
“Rayonlarda müxtəlif ranqlı məmur və iş adamlarının böyük əkin və örüş sahələri mövcuddur, su, ilk növbədə, həmin yerlərə verilir”
Sosial sahə üzrə ekspert Mayis Əliyev qeyd etdi ki, rayonlarda müxtəlif ranqlı məmur və iş adamlarının böyük əkin və örüş sahələri mövcuddur, su, ilk növbədə, həmin yerlərə verilir. Burada növbəlilik sistemi pozulur. İstifadə olunan suyun haqqının ödənilməsində də problem var. Həm də istər məmurun olsun, istərsə də sadə vətəndaşın, kimliyindən asılı olmayaraq, əkin sahələri suvarılmalıdır. Çünki həmin sahələrdə kənd təsərrüfatı məhsulları istehsal edilir: “Odur ki, suvarma sistemlərinin yenidən qurulması vacibdir. Bölgələrdə su itkisi də ciddi məsələdir. Bunun üçün rayonlarda su istehsalat birlikləri yaradılıb. Torpaqların suvarılmasını güzəştli və ədalətli şəkildə aparmaq üçün dövlət yeni proqram qəbul etməlidir”.
Günel CƏLİLOVA
