Son dövrdə baş verən intiharlar, əsasən, çoxmərtəbəli binaların damında qeydə alınır. Bir sözlə, çoxmərtəbəli binaların damları intihar etmək fikrində olanlar üçün məkana çevrilir. Belə ki, özünə qəsd etməyi planlaşdıran şəxslər nəzarətsiz binaların damına və ya ən hündür mərtəbəsinə üz tuturlar.
Bu günlərdə Bakının Nərimanov rayonunda yeniyetmə oğlan intihar edib. Yaşı təxminən 16-17 olan oğlan özünü Fətəli xan Xoyski 112 ünvanında, “Yaşam” tibb mərkəzinin yerləşdiyi çoxmərtəbəli yaşayış binasının damından atıb. Nəticədə yeniyetmə hadisə yerində ölüb.
Bu kimi hadisələrin sayı son zamanlar artıb. Vətəndaşlar sərbəst şəkildə binaların damına çıxaraq həyatlarına qəsd edirlər.
Maraqlı məqam ondan ibarətdir ki, bu təhlükəli vəziyyətin qarşısı niyə alınmır? Niyə çoxmərtəbəli binaların damından hər kəs asanlıqla istifadə edə bilir?
Bəxtiyar Əliyev: “Damlara nəzarət zəifdir, bunun yaratdığı təhlükə isə göz qabağındadır”
Tikinti məsələləri üzrə ekspert Bəxtiyar Əliyev qeyd etdi ki, buna nəzarət mənzil-kommunal istismar sahələri tərəfindən həyata keçirilməlidir və orda hər hansı bir hadisə baş verərsə, buna görə də sözügedən idarə məsuliyyətə cəlb edilə bilər: “Bakıda bir çox binada dam çıxışlarına nəzarət yoxdur. Əksər binada dam qapıları mütəmadi olaraq qıfıllanır, amma hazırda açıq olmasının səbəbkarı həmin binada yaşayan sakinlərdir. Damlara nəzarət, yumşaq desək, zəifdir. Bunun yaratdığı təhlükə isə göz qabağındadır. Ümid edək ki, problemin aradan qaldırılması üçün hansısa bədbəxt hadisənin baş verməsini gözləmək lazım gəlməyəcək”.
Həmsöhbətimiz onu da əlavə etdi ki, binaların damının girişi həmişə bağlı saxlanmalıdır. Binaların çardaqları həmişə bağlı olmalıdır.
Könül İsmayılova: “Binanın üstünə çıxanlar daha çox xanımlar və yeniyetmələrdir”
Psixoloq Könül İsmayılova bildirdi ki, binanın üstünə çıxanlar daha çox xanımlar və yeniyetmələrdir. Burada diqqət çəkmək metodu var. Əslində, hündürlüyə çıxanların məqsədi heç də intihar etmək deyil. Hündürlük insanı həmişə özünə çəkir: “Onlar hündürlüyə çıxan zaman nə qədər uzaqda da dayansalar, yenə də özlərindən asılı olmadan damın lap uc hissəsinə gəlir və oradan da özlərini aşağı atırlar. Yüksəkliyə çıxanlar daha çox diqqəti özünə yönəltmək üçün bunu edirlər. Bundan başqa, insanlar assosiasiyalarla düşünürlər. Məsələn, bir müddət körpünün üstünə çıxıb bunu edirdilər”.
Psixoloq onu da əlavə etdi ki, çoxmərtəbəli binaların damları nəzarətdə saxlanmalıdır. Aidiyyəti qurumlar bu məsələyə xüsusi diqqət etməlidirlər. Son zamanlar intihar edənlərin çoxmərtəbəli binaların damını seçməsi aidiyyəti qurumlar üçün çağırış olmalıdır.
Günel CƏLİLOVA
