Bu xalqın ürəyində əsrlərin, illərin sağalmayan yarası var. O yara ki, hər dəfə bir qədər də dərinləşib, daha çox qaynayıb. Hər kəsin eyni anda çəkdiyi Vətən dərdi doğulan hər bir azərbaycanlı ilə bərbər böyüyüb. Dünənini unutmayan xalq olaraq sabahımızın işıqlı olmağı üçün çalışmışıq. Yaşadıqlarımızı unutmadan yaşamışıq ki, bir daha o yaşanılanlar təkrarlanmasın. Bir gün o yaşadıqlarımızın intiqamının alınacağı günün çatacağı düşüncəsindən bir an belə uzaqlaşmadıq. Bəli, o gün çatdı.
Bir zamanlar körpələrin "Qarabağı mən azad edəcəm" sözləri öz sübutun tapdı. Heç zaman Qarabağı görməyən, ancaq Qarabağ həsrəti ilə böyüyən cəngəvarlər Qarabağa doğru yol aldılar. O cəngavərlərdən biri idi Malik idi.
1986-cı ilin bitməsinə bir neçə gün qalmış - dekabrın 26-da Naxçıvan Muxtar Respublikasının Naxçıvan şəhərində dünyaya göz açmışdı Əliyev Malik Təvəkkül oğlu. Orta təhsil almaq üçün 1993-cü ildə Naxçıvan şəhər 5 N - li məktəbə qədəm qoymuşdu. Malik elə uşaqlıqdan bir çox yaşıdlarından fərqlənmişdi. Vətəni çox sevən bu oğul özünü bir hərbçi kimi görürdü. O bilirdi ki, Vətənin onun kimi oğullara ehtiyacı var. Malik 2001-ci ildə Naxçıvan MR-də Heydər Əliyev adına Ali Hərbi Liseyə daxil olub. Bir hərbçinin bilməli olduqlarını daha dərindən öyrənmək üçün daima öz üzərində çalışıb. Liseyi bitirdikdən sonra 2004-cü ildə Milli Təhlükəsizlik Nazirliyinin Heydər Əliyev adına Akademiyasına daxil olub. 2008-ci ildə təyinatla N saylı Xudat hərbi dəstəsi komendant, bölük komandiri, kapitanı vəzifəsində çalışıb. Hər zaman öz üzərində çalışan Malik öyrəndikləri ilə yetinməyərək 2010-cu ildə Çində 6 aylıq kurs keçib. 2011-ci ildə Çində Azərbaycandan gedən kursantların komandiri olub. Hər iki kursu fərqlənmə diplomu ilə bitirib. Daha sonra 2013-cü ildə Türkiyənin Ankara şəhərində kurs keçib. 2015-ci ildə təyinatla Horadiz sərhəd dəstəsinə qərargah rəisi vəzifəsinə təyin edilib. 2016-cı ildə DSX-nin Akademiyasında kurs keçib. 2017-ci ildə DSX Aparatında fiziki hazırlıq üzrə işə başlayıb. 2018-ci ildə mayor hərbi rütbəsinə qədər yüksəlib. 2018-ci ildə yenidən Türkiyədə kurs keçib. 2020-ci ilin fevralında DSX-nın Çevik Hərəkət Qüvvələri Komandanlığında döyüş hazırlığı üzrə şöbənin rəis müavini təyin edilib. 2020-ci ilin iyun ayında Qazaxda təlimlərdə iştirak edib.
Bu qədər çətinliyi qət edib iradəsi, gücü, əzmkarlığı ilə vətən naminə yaşayan bir qəhrəmanın keçdiyi döyüş yolu qalibiyyətə gəlib çatdı. Malik öyrəndiyi bütün bilik və bacarığını Vətən müharibəsi zamanı sərgilədi. Cəbrayıl, Füzuli, Hadrutun azad olunmasında müstəsna xidmətləri oldu. 2020 - ci il oktyabrın 13-də canından keçən şəhidlərimizi, əzalarını vətənə qurban edən yaralılarımızı döyüş meydanından çıxaran zaman şəhadətə yüksəldi.
Mayor Əliyev Malik Təvəkkül oğlu Orduda xidmətinə görə Azərbaycan Respublikasının Prezidenti İlham Əliyevin sərəncamı ilə hələ şəhadətindən öncə "Hərbi xidmətdə fərqlənməyə görə" ll dərəcəli medalı, "Azərbaycan Respublikası Sərhəd Mühafizəsinin 90 illiyi" yubiley medalı, "Azərbaycan Respublikası Sərhəd Mühafizəsinin 95 illiyi" yubiley medalı, "Azərbaycan Respublikası Sərhəd Mühafizəsinin 100 illiyi" yubiley medalı, "Hərbi xidmətdə fərqlənməyə görə" III dərəcəli medalı, "Azərbaycan Respublikası Silahlı Qüvvələrinin 95 illiyi" yubiley medalı, "Qüsursuz xidmətə görə" lll dərəcəli medalı ilə təltif olunmuşdu. Şəhadətə ucaldıqdan sonra isə bu medalların sırasına "Vətənə xidmətə görə" lll dərəcəli ordeni, "Vətən uğrunda" medalı və "Cəbrayılın azad olunmasına görə" medalı da əlavə olundu.
Şəhidimiz and yerimiz olan ll Fəxri xiyabanda vətənin daş olan oğulları cərgəsində yer alıb.
4 il Aydəniz xanımla ailəli olan şəhidimizin özündən sonra vətənə əmanət 4 yaşlı qız övladı qalıb.
ŞƏHİD MALİK
Sən vətən sinəsində solmayan bir çiçəksən,
Cənnətindən boylanıb hər zaman güləcəksən,
Ruhunla neçə gəncdə özünü görəcəksən,
Xalqının ürəyinə əbədi köçən oğul,
Adını duyan hər kəs səninlə qürur duyur.
Sənin qəlb döyüntünlə döyündü vətən qəlbi,
Son damla qanın ilə sağaldı vətən dərdi,
Səndən geri qalanlar şücaətdi, hünərdi,
Mərd xalqımın bu gündən sabahına çıraqsan
Sən özün tarix kimi tarixdə qalacaqsan.
Şəhid Malik, adından qəhrəmanlıq süzülür,
İllər sonra sayəndə vətənin üzü gülür,
Şəhidim ardın ilə xoş kəlmələr düzülür,
Sən olmayan dünyada adını hər kəs anır
Bütün xalqım adını qəhrəman kimi tanır.
Manya SƏXAVƏTQIZI
