Marşrut avtobus sürücüləri BNA-dan nə tələb edirlər...

Bakı Nəqliyyat Agentliyi – Mais Ağayev: “İctimai nəqliyyatda nağdsız ödəniş sisteminə inteqrasiya vacibdir”

img

Marşrut avtobuslarının sürücüləri Bakı Nəqliyyat Agentliyinin (BNA) binası qarşısında etiraz aksiyası keçiriblər. Sosial şəbəkələr vasitəsilə canlı yayımlanan aksiyada sürücülər gündəlik planın yüksək olmasından, maaşlarını ala bilməmələrindən şikayətləniblər: “250 manat aylıq əməkhaqqı yazılır, lakin verilmir. İllərdir maaş almırıq, gündəlik plan da yüksəkdir. Əvvəlki vaxtlarda gündəlik plandan artıq qalan pulla dolanırdıq, indi o da yoxdur”.

 

Məlum olub ki, sürücülərin əksəriyyəti 140 saylı müntəzəm marşrut xətti üzrə çalışanlardır. Sürücülər bildiriblər ki, hazırda həmin xətt “BMH” MMC-nin istismarındadır. Onların sözlərinə görə, şirkətin müdiri Baxşəli Mirzəyevdir.

Şikayətçi sürücülərdən olan Elnur Ağaliyev bildirib ki, gündəlik planın məbləği 85 manatdan 115 manata artdığından və yanacaq bahalaşdığından, indi nəinki dolanmaq olmur, planı da vermək çətindir: “5 ildir bu xətt üzrə sürücüyəm. Keçən il cəmi 3 dəfə maaş verilib. Həmin 3 dəfənin birində karta 110 manat köçürmüşdülər, dedilər o pulu iki sürücü arasında bölün. Bir sözlə, biz maaş almadan işləyirik”.

  • ...sürücülərə müvafiq dövlət qurumuna müraciət etmələri tövsiyə olunub”

Sürücülərin şikayəti ilə bağlı Bakı Nəqliyyat Agentliyinin mətbuat katibi Mais Ağayev bildirdi ki, sürücülərin narazılığı BNA-dan deyil, daşıyıcı ilə bağlıdır: “BMH” MMC-nin müvəqqəti istismarında olan 140 nömrəli müntəzəm marşrut xətti üzrə bir qrup sürücü Bakı Nəqliyyat Agentliyinə müraciət edərək daşıyıcı tərəfindən gündəlik yığımın (planın) məbləğinin artırıldığını, əməkhaqlarının verilmədiyini bildirib. Sürücülərin müraciətləri dinlənilib. İstər gündəlik yığımın məbləği, istərsə də əmək münasibətlərinə dair məsələlər Bakı Nəqliyyat Agentliyinin səlahiyyətlərinə aid olmadığından, sürücülərə müvafiq dövlət qurumuna müraciət etmələri tövsiyə olunub. Həmçinin, “BMH” MMC-nin direktoru Bəxşəli Mirzəyev Bakı Nəqliyyat Agentliyinə çağırılıb. Sürücüləri narahat edən məsələlərin həll edilməsi, 140 nömrəli marşrut xətti üzrə sərnişindaşımanın qanunvericiliklə müəyyən edilən norma və standartlara uyğun təşkil olunmasına dair tapşırıqlar verilib”.

Həmsöhbətimiz onu da əlavə etdi ki, ictimai nəqliyyatda nağdsız ödəniş sisteminə inteqrasiya vacibdir: “Aparılan müşahidələr və təcrübə də onu göstərir ki, nağdsız ödəniş sisteminin tətbiqi əmək münasibətlərinin rəsmiləşdirilməsi, sürücülərin və digər çalışanların sosial rifahının yaxşılaşdırılması baxımından olduqca faydalıdır. Nağdsız ödəniş sistemi sayəsində, eyni zamanda, dövriyyənin şəffaflaşdırılması və vergi ödəmələrinin artırılması da təmin edilir. Sərnişindaşımada təhlükəsizlik kimi vacib məsələlərin həlli baxımından əhəmiyyətli olan nağdsız ödəniş sistemi, həmçinin, bu sektorda sahibkarlığın inkişafında struktur və keyfiyyət dəyişikliyinə də müsbət təsir göstərməkdədir. Bu səbəbdən də sərnişindaşımada nağdsız hesablaşmaların tətbiqi prioritet məsələlərdəndir”.

Günel CƏLİLOVA

Son xəbərlər