Peyvənd vurulmasını təsdiqləyən sənədi pulla satan tibb müəssisələri?...

img

Artıq bir ildən çoxdur ki, yeni növ koronavirus yer üzündəki bütün xəstəlikləri arxa plana keçirərək, bəşəriyyətin bir nömrəli probleminə çevrilib. COVID-19 Ümumdünya Səhiyyə Təşkilatı tərəfindən pandemiya elan olunandan bəri bütün ölkələr bu virusla mübarizəyə qalxıb və savaş aparır. Dünya tibbi, müxtəlif ölkələrin elm adamları insanlıq üçün yeni olan bu bəlanı "susdurmaq” naminə səfərbər oldular.

Çin alimləri COVID-19-un genomunu açıqladıqdan sonra isə əczaçılıq şirkətləri, laboratoriyalar, ayrı-ayrı alimlər və həkimlər koronavirusa qarşı peyvənd axtarışına başladılar. Müxtəlif qorunma və qabaqlayıcı tədbirlərə, məhdudiyyətlərə baxmayaraq, infeksiyanın sürətlə bütün planetə yayılması hər kəsin diqqətini və ümidini daha çox istehsal olunacaq peyvəndə dikdi. Bütün ilboyu hamını bu sual daha çox maraqlandırdı: peyvənd nə vaxt hazır olacaq? Məlumdur ki, artıq peyvənd hazırdır. İlk olaraq risq qrupuna aid olan 60 yaşdan yuxarı şəxslərə, sonra 40 yaşı ötən şəxslərə vaksin vurulur.

O da bəllidir ki, vaksinlə bağlı ölkədə müxtəlif şayiələr gəzir. Bəzi şəxslər vaksin vurdurmamaq üçün müxtəlif üsüla əl atırlar. Belə üsullardan biri də saxta sənəddir. Bəllidir ki, vaksin vurulan şəxsə vaksinasiya barədə pasport verilir. Bəzi xəstəxanalar vaksin vurdurmaq istəməyən şəxslərə saxta vaksinasiya pasportu verirlər. Bununla bağlı son günlər sosial şəbəkədə məlumat yayılır.

  • TƏBİB: “...neqativ hallarla qarşılaşan şəxslər hüquq-mühafizə orqanlarına müraciət etsinlər”

Tibbi Ərazi Bölmələrinin İdarəetmə Birliyi (TƏBİB) bildirdi ki, hər kəs sözügedən neqativ hallardan çəkinməlidir: “Koronavirus xəstəliyinin yayılmasının qarşısını almaq üçün Azərbaycan dövləti ilk gündən peyvəndlərin əldə edilməsində böyük səy göstərib və hazırda ölkədə “Vaksinasiya Strategiyası”na uyğun olaraq, bu proses dövlət hesabına könüllü şəkildə uğurla həyata keçirilir: “Unutmayaq ki, vaksin bizim sağlamlığımızın qorunması və yenidən normal həyata dönə bilməyimiz üçün yeganə vasitədir. TƏBİB yalnız Abşeron, Sumqayıt və regionlar da daxil olmaqla, vaksinasiya prosesinin təşkili ilə məşğuldur və neqativ hallarla qarşılaşan şəxslər hüquq-mühafizə orqanlarına müraciət etsinlər”.

  • Rəşad Mahmudov: “Bu cür halların təkrarlanmasının qarşısını almaq üçün problemi araşdırmaq və günahkarları məsuliyyətə cəlb etmək lazımdır”`

Azərbaycan Milli Məclisinin Səhiyyə komitəsinin sədr müavini Rəşad Mahmudov bildirdi ki, bəzi tibb müəssisələrində peyvənd vurulmasını təsdiq edən sənədin pul qarşılığında verildiyi barədə gəzən şayiələr reallığa uyğundursa, bu çox təəssüfedicidir: “Dövlətimiz, əlaqədar qurumlar, tibb işçiləri gecə-gündüz koronavirusla mübarizə aparırlar. Bu cür mənfi hallar isə görülən bütün işlərə kölgə salır. Ümumiyyətlə, bu tip məsələdə kiçik bir həqiqət ehtimalı varsa, müvafiq qurumlar bu mövzuda tədbir görməlidirlər. Bu cür halların təkrarlanmasının qarşısını almaq üçün problemi araşdırmaq və günahkarları məsuliyyətə cəlb etmək lazımdır”.

Günel CƏLİLOVA

Son xəbərlər