Bir müddət əvvəl “AstraZeneca” peyvəndinin qan laxtalanmasına səbəb olması ilə bağlı şayiələr dolaşırdı. Avropa Dərman Agentliyi “AstraZeneca” peyvəndi ilə qan laxtalanmasının əmələ gəlməsi arasındakı əlaqəni, nəhayət, təsdiqləyib. Lent.az xarici mediaya istinadla bildirir ki, bu barədə İtaliyanın ANSA nəşri xəbər verib.
Məlumata görə, bunu Avropa Birliyinin əsas əczaçılıq tənzimləyicisinin peyvənd şöbəsinin müdiri Marko Kavaleri deyib: “AstraZeneca” peyvəndi ilə qeyri-adi qan laxtalanması halları arasında nadir bir əlaqə olduğunu inkar etmək getdikcə daha çətindir”.
Onun sözlərinə görə, hazırda dərmanla tromboz arasındakı əlaqəni tapmaq mümkün olmayıb - tədqiqatçılar onu araşdırmağa davam edirlər. Bu səbəbdən peyvəndin istifadəsi üçün yaş məhdudiyyətləri tövsiyə edilmir. Bildiyiniz kimi, qan laxtalanması əsasən 55 yaşınadək qadınlarda müşahidə edilib. “Fikrimcə, indi peyvəndlə əlaqənin açıq olduğunu söyləyə bilərik. Ancaq bu reaksiyanın səbəbi nədir, hələ də bilmirik” - tənzimləyicinin nümayəndəsi izah edib.
O, agentliyin yaxın zamanda “AstraZeneca” peyvəndi ilə tromboz arasındakı əlaqəni rəsmi olaraq elan edəcəyini söyləyib.
Buna baxmayaraq, Marko Kavaleriyə görə, bu dərmanı istifadə etməyin faydaları potensial risqlərdən çoxdur.
Avropa Dərman Agentliyinin “AstraZeneca” vaksini vurulan bəzi insanların qanında tromb yaranmasının vaksinlə əlaqəli olmasına dair açıqlamasına münasibət bildirən səhiyyə nazirinin müavini Viktor Qasımov mətbuata bildirib ki, Azərbaycanda yeni növ koronavirusa qarşı “AstraZeneca” şirkətinə məxsus vaksinin istifadəsinə hələlik başlanılmayıb.
Vətəndaşlara keyfiyyətli və təhlükəsiz vaksin vurulmasına çalışdıqlarını qeyd edən V.Qasımov bütün dünyada vaksinlərlə bağlı məsələnin Ümumdünya Səhiyyə Təşkilatı tərəfindən tənzimləndiyini söyləyib: “Heç kəs özbaşına qərar qəbul etmir”.
Mətbuatda qeyd edilənə görə, aprelin 4-də Azərbaycana Koreyadan “AstraZeneca” şirkətinə məxsus 84 000 doza COVID-19 vaksin dərman vasitəsi (“Vaxzevria”) gətirilib. Ümumilikdə, “AstraZeneca” şirkətinə məxsus 432 000 doza COVID-19 vaksin dərman vasitəsinin may ayının sonuna qədər Azərbaycana idxalı nəzərdə tutulub.
Avropa Dərman Agentliyi "AstraZeneca" şirkətinin yeni növ koronavirusa (COVID-19) qarşı vaksini ilə bağlı araşdırmanın nəticəsini açıqlayıb. Agentlik peyvənd vurulan şəxslərin qanında müşahidə olunan ciddi tromblaşmanın vaksinlə əlaqəli olduğu qənaətinə gəlib.
- Adil Qeybulla: “...deyilənlərlə razılaşmıram”
Tanınmış tibb mütəxəssisi, professor Adil Qeybulla “Bakı-Xəbər”ə bildirdi ki, “AstraZeneca” peyvəndi haqda deyilənləri doğru hesab etmir və bu çox yüksək keyfiyyətə malik peyvənddir. A.Qeybullanın sözlərinə görə, vətəndaşlarımız bu vaksindən istifadə etməkdən çəkinməməlidirlər. “Bilirsiniz, “AstraZeneca” peyvəndini təkcə Azərbaycan almayıb və başqa ölkələr də alıblar. Eyni zamanda, İngiltərədə 20 milyona yaxın insan “AstraZeneca” ilə vaksinasiya olunub. Bu vaksin qanda tromblaşmaya səbəb olursa, bəs nə üçün orada bu hallar müşahidə olunmadı. Deyə bilmərəm, tək-tük epizodlar ola bilər. “AstraZeneca” çox yüksək keyfiyyətli vaksindir və hesab edirəm ki, bunun haqqında bu cür danışmaq düzgün deyil”.
A.Qeybullanın sözlərinə görə, ayrı-ayrı epizodlar olubsa, bunlar da araşdırılmalıdır, amma, bütövlükdə, bu vaksin haqda bu cür danışmaq doğru deyil: “Bununla bağlı yalnız müvafiq mərkəzlər, Ümumdünya Səhiyyə Təşkilatı bütün məlumatları ümumiləşdirərək qərar verə bilər. Təsəvvür edin ki, İngiltərə əhalisi bu vaksinlə vaksinasiya olunur. Bu vaksin Oksford universiteti kimi dünyanın ən nəhəng və nüfuzlu universitetlərindən birində icad olunub. Yəni bu vaksin necə keyfiyyətsiz ola bilər? “AstraZeneca” ilə bağlı deyilənlərlə razılaşmıram” - deyə A.Qeybulla bildirdi.
- Pərvanə Vəliyeva: “Ümumdünya Səhiyyə Təşkilatı məlumat verdi ki, müşahidə edilən tromblaşma “AstraZeneca” vaksini ilə bağlı deyil”
“Sağlamlığa Xidmət” İctimai Birliyinin icraçı direktoru Pərvanə Vəliyevanın sözlərinə görə, hazırda 163 ölkədə vaksinasiya aparılır və 163 ölkədən 101-də “AstraZeneca” istifadə olunur: “Hazırda dünyada 163 ölkədə COVID-19 əleyhinə vaksinasiya aparılır. Onlardan 101-də “AstraZeneca”, 82-də “Pfizer/BioNTech”, 35-də “Moderna”,
20-də “Sputnik V”, 15-də “Sinovak” istifadə olunur.
Elə ölkələr var ki, ora bəzi vaksinləri vurduranlar buraxılmır. Məsələn, İngiltərəyə “Sinovak” vurduranda getmək olmur. Yəni həmin o vaksin qəbul olunmur, yalnız “AstraZeneca”, “Pfizer/BioNTech”, “Moderna” vurularsa, getmək olur. “AstraZeneca”nın tromb yaratması ilə bağlı məlumatdan sonra bəzi ölkələr onu dayandırıb. Amma Ümumdünya Səhiyyə Təşkilatı məlumat verdi ki, müşahidə edilən tromblaşma “AstraZeneca” vaksini ilə bağlı deyil. Həm də qanında tromblaşma çıxan insanların statistikasını da aparmışdı həmin şirkət, bu, hardasa, 0,2 nəfərdə görülmüş hallardır. Yəni bu, birbaşa vaksinlə əlaqəli deyildi deyə düşünülmür. Qeyd edildiyi kimi, bizim ölkədə də ondan hələ istifadə olunmur. Yəqin ki, onun tromblaşma yaratmasının elmi əsasları olarsa, Azərbaycanda da istifadə olunmaz. Amma hazırda 101 ölkədə “AstraZeneca” vurulur”.
P.Vəliyeva qeyd etdi ki, bu vaksin Şərqi Avropa, Mərkəzi Asiya ölkələrinə, Tacikistana, Ermənistana, Özbəkistana, Gürcüstana və başqa ölkələrə göndərilir: “Bizdə “Sinovak” olduğu təqdirdə onlarda başqa vaksin yoxdur, ancaq “AstraZeneca” istifadə edirlər. Mənim mövqeyim bu cürdür” - deyə ekspert qeyd etdi.
İradə SARIYEVA
