“Bizdə mövcud problemlərdən biri də itkilərin böyük həcmdə olmasıdır”. Bunu Prezident İlham Əliyev Zaur Mikayılovu Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifəsinə təyin olunması ilə əlaqədar videoformatda qəbul edərkən deyib.
Dövlət başçısı bildirib ki, bundan sonra meliorativ tədbirləri dədə-baba üsulu ilə apara bilmərik: “Eyni zamanda, sizin qarşınızda duran vəzifələrdən biri çatışmazlıqların aradan qaldırılmasıdır, idarəetmədə müasir yanaşmanın tətbiq edilməsidir, müasir texnologiyaların ölkəmizə gətirilməsidir. Çünki biz bundan sonra meliorativ tədbirləri, necə deyərlər, dədə-baba üsulu ilə apara bilmərik. Dünyanın bu sahədə ən müasir texnologiyaları Azərbaycana gətirilməlidir, sudan səmərəli istifadə edilməlidir. Bizdə mövcud problemlərdən biri də itkilərin böyük həcmdə olmasıdır. Bu itkilər bəzi hallarda təbii xarakter alır, amma bəzi hallarda səhlənkarlıq ucbatından baş verir. Uçotun olmaması əlbəttə ki, bizim işimizi çətinləşdirir. Ona görə tam uçot aparılmalıdır. Bizim su anbarlarımıza daxil olan və oradan çıxan suyun həcmi yaxın aylara qədər uçota alınmırdı. Düzgün təhlil aparmaq, proqnoz vermək üçün imkanımız yox idi. Ona görə itkilərin azaldılması ən vacib problemlərdən biridir”.
Görünən odur ki, səhlənkarlıq və uçotun aparılmaması üzündən su itkiləri baş verir. Nəticədə bundan həm dövlət, həm də xalq zərər görür. O baxımdan sözügedən neqativ halların qarşısını necə almaq olar?
“Torpaqdan olan su kanalları birdəfəlik ləğv edilməlidir”
Məsələyə münasibət bildirən iqtisadçı-alim, professor Əli Əlirzayevin sözlərinə görə, suyun itkiyə getməsi bir sıra amillərdən qaynaqlanır: “Su itkiləri həm texniki, həm də digər səbəblərdən qaynaqlanır. Məsələ ondadır ki, istər iri, istərsə də kiçik boru xətlərində su sızıntıları olur. Bunlar vaxtında aradan qaldırılmır. Suvarma zamanı müvafiq qaydalara əməl olunmur. Nəticədə ciddi israfçılıq yaşanır ki, bu da tarlaların suvarılması zamanı su çatışmazlığına səbəb olur. Müvafiq qurumlar öz işlərinə səhlənkar yanaşırlar. Halbuki, nəzərə almaq lazımdır ki, Azərbaycanın su ehtiyatları qonşu ölkələrlə müqayisədə elə də böyük deyil. Nəinki suvarma tarlalarında, bağ evlərində ciddi su israfçılığı yaşanır. Müxtəlif vasitələrlə çalışırlar ki, sayğacdan kənar sudan istifadə etsinlər. Eyni zamanda, suvarmada çiləmə üsulundan geniş istifadə edilmir. Hansı ki, bu zaman elə də böyük həcmdə su israf olunmur. Ona görə də məsələyə kompleks yanaşılmalıdır. Borularda baş verən su sızıntıları tez aradan qaldırılmalıdır. Torpaqdan olan su kanalları birdəfəlik ləğv edilməlidir. Hansı ki, bunu Prezident də qeyd etdi”.
Professor hesab edir ki, bütün bunlardan sonra su itkilərinin qarşısını almaq olar.
Vidadi ORDAHALLI
