Bölgələrə göndərilən gənc pedaqoji kadrlar kompensasiya məbləğindən narazılıq edirlər...

Kamran Əsədov: “Kənd yerlərində işləyən müəllimlər üçün ödənilən kompensasiya məbləği artırılmalıdır”

img

Məlum olduğu kimi, cari ilin əvvəlində gənc müəllimlər üçün kompensasiyanın həcmi artırılıb.

Pedaqoji profilli ali və orta ixtisas təhsili müəssisələrini bitirmiş yaşı 35-dək olan gənc mütəxəssislərin kənd rayonlarında yerləşən ümumtəhsil müəssisələrinə işə cəlb olunmasının stimullaşdırılması və həmin müəssisələrdə pedaqoji kadr tələbatının ödənilməsi məqsədilə dövlət sifarişinə əsasən, ümumtəhsil müəssisələrində əmək fəaliyyətinə başlayan və 3 (üç) il müddətində həmin və ya digər kənd rayonlarının təhsil müəssisəsində fəaliyyətini davam etdirən gənc mütəxəssislərə kommunal xidmətləri və yaşayış yerinin kirayə haqqını ödəmək üçün 90 manat (əvvəl 60 manat) məbləğində kompensasiya verilir.

Azərbaycanda kəndlərdə çalışan müəllimlərə kompensasiya məbləği artırılsa da, bu onların yaşadıqları yerdən çox-çox uzaqda fəaliyyətləri üçün yetərli deyil. Bir sözlə, bölgələrə çalışmaq üçün yollanan gənc pedaqoqlar kompensasiya məbləğinin az olmasından şikayət edirlər.

  • “...hazırda verilən vəsaitlər onların xərclərini tam ödəmir

Təhsil eksperti Kamran Əsədov qeyd etdi ki, kənd məktəblərində fəaliyyətə başlayan gənc müəllimlər üçün stimullaşdırıcı tədbirlər tətbiq edilsə də, hazırda verilən vəsaitlər onların xərclərini tam ödəmir: “İlk növbədə, qeyd edim ki, gənc müəllimlərin stimullaşdırılması üçün ciddi addımlar atılıb. Rayon mərkəzindən 3 km-dın 20 km-ə qədər məsafədə yerləşən kənd məktəbləri üçün müəllimlərə aylıq 90 manat, 20 km-dən artıq məsafədə yerləşən kənd məktəbləri üçün 180 manat vəsait ödənilir.

Bundan başqa, kəndlərdə əmək fəaliyyətinə başlamaq üçün konkret iş yerlərinə göndəriş almış gənc mütəxəssislərə, həmçinin, yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədilə əməkhaqqının iki misli həcmində birdəfəlik yardım da ödənilir.

Təhsil Nazirliyi son illər müəllimlərin sosial vəziyyətinin yaxşılaşdırılması istiqamətində mühüm addımlar atır. Həmin müəllimlər işlədikləri ərazidə daimi yaşamaq istəyirlərsə, icra hakimiyyəti bu müəllimlərə torpaq sahəsi də ayırmalıdır. Onlara güzəştli kreditlər də verilir. Kənd yerlərində işləyən müəllimlər üçün ödənilən kompensasiya məbləği artırılmalıdır. Amma bununla yanaşı, kənd yerlərində təhsilin səviyyəsi də yüksəldilməlidir”.

Günel CƏLİLOVA

Son xəbərlər