Şəmsəddin Əliyev: “Bütün bunların fonunda polisimiz pandemiya ilə mübarizə sahəsində örnək sayılan nəticə ortaya qoyur”
Bir neçə gün öncə “Neolit” şadlıq sarayında karantin rejimi pozulmaqla toy məclisinin keçirilməsi ilə bağlı restoranın inzibatçısı 10 sutka müddətinə həbs edilib. Nizami RPİ 25-ci Polis Şöbəsinin tərtib etdiyi protokola aprelin 3-də rayon məhkəməsinin hakimi Mətanət Hacıyevanın sədrliyi ilə baxılıb. İnzibatçı Qarayev Fuad Hafiz oğlu “Neolit” şadlıq sarayında toy mərasiminin keçirilməsinə şərait yaradaraq xüsusi karantin rejiminin qaydalarını pozmaqda təqsirləndirilib.
Daxili İşlər Nazirliyinin Mətbuat Xidmətinin Gəncə regional qrupundan verilən məlumatda isə bildirilir ki, Goranboy Rayon Polis Şöbəsinə rayonun Qızılhacılı kəndi ərazisindəki fərdi yaşayış evlərinin birində nişan mərasimi keçirliməsi barədə məlumat daxil olub. Polis əməkdaşlarının keçirdiyi müvafiq tədbirlərlə mərasimin keçirilməsinin qarşısı alınıb, iştirakçılar barəsində qanunvericiliyə uyğun tədbir görülüb. Sanitar-epidemioloji normaları pozan şəxslərlə profilaktik söhbətlər aparılaraq xüsusi karantin rejim qaydaları izah olunub, 9 nəfər saxlanılan şəxs barəsində İnzibati Xətalar Məcəlləsinin 211-ci maddəsi (Epidemiya əleyhinə rejimin, sanitariya-gigiyena və karantin rejimlərinin pozulması) ilə protokol tərtib edilərək onlar cərimə olunub.
Göründüyü kimi, polis qanunsuz toy və digər şənlik mərasimlərinin təşkili ilə bağlı ciddi mübarizə aparır. Bu istiqamətdə polisin gördüyü işləri ekspertlər necə qiymətləndirir?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, polisin hərəkətlərinin eskalasiyasının çox geniş olmasının əleyinədir: “Cinayətkarlıqla mübarizənin əhatəsi o qədər genişdir ki, polisin bir əməkdaşını kənar proseslərə cəlb edəndə bunun yeri görünür. Ancaq buna baxmayaraq, polis Operativ Qərargahın qəbul etdiyi bütün qərarların həyata keçməsinə ciddi nəzarət edir. Burada polisin və tibb işçilərinin çiyninə ağır məsuliyyət düşür. Polisə əlavə səlahiyyətlər yüklədikcə, onun da məsuliyyəti artmış olur. Hətta bəzən bu amillər polislə qarşıdurmalara da səbəb olur. Hesab edirəm ki, bu sahədə polisin işini bir qədər yüngülləşdirmək də lazımdır. İctimai nəqliyyatda sərnişinlərin maskasız olmasına da polis nəzarət edir, restoranda toy edənlərə də. Bunu Nəqliyyat Agentliyi və Qida Təhlükəsizliyi Agentliyinə də tapşırmaq olar. Polis həmin hadisə yerinə gələndə digər detallar da yaranır. Məsələn, tabe olmayanlarla bağlı əlavə protokollar tərtib olunur. Bütün bunlara baxmayaraq, Azərbaycan polisi bu sahədə də işinin öhdəsindən layiqincə gəlir. Pandemiya, ola bilər ki, hələ uzun sürsün. Onunla mübarizəyə əlavə qurumları da cəlb etməliyik ki, polisin yükü azalsın. 100 min əhaliyə düşən cinayətlərin sayını müqayisə edəndə, bizdə Avropadan az cinayət baş verir. Bu da bizim polisin peşəkarlığından xəbər verir. Bizdə əhalinin sayına görə polisin ştat vahidi azdır. Bütün bunların fonunda polismiz pandemiya ilə mübarizə sahəsində örnək sayılan nəticə ortaya qoyur”.
Məhəmmədəli QƏRİBLİ
