Mərkəzi icra orqanları, yerli icra orqanları, bəzi sahibkarlar elə bil sövdələşərək, sudan vicdansızcasına istifadə edirdilər. Bunu Prezident İlham Əliyev Zaur Mikayılovu Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifəsinə təyin olunması ilə əlaqədar videoformatda qəbul edərkən deyib.
Dövlət başçısı bildirib: "Biz bundan sonra da kənd təsərrüfatı ilə məşğul olan vətəndaşlarımızı dəstəkləyəcəyik. Artan subsidiyalar bunu bir daha göstərir. Bizim niyyətimiz, siyasətimiz dəyişməz olaraq qalır. Ancaq bununla bərabər, kənd təsərrüfatı ilə məşğul olan hər bir adam öz məsuliyyətini də dərk etməlidir. Təhlil aparılarkən biz bir şeyə də rast gəldik – suyun ədalətsiz bölüşdürülməsi halları geniş vüsət almışdır. Burada həm mərkəzi icra orqanları, yerli icra orqanları, bəzi sahibkarlar elə bil ki, sövdələşərək, sudan vicdansızcasına istifadə edirdilər. Belə olan halda, bəzi fermerlərə, bəzi kəndlərə su çatmırdı. Mən göstəriş vermişdim, indi təhlil aparılır, araşdırma aparılır. Buna da son qoyulmalıdır. Su xətlərinin üzərində çoxsaylı qanunsuz birləşmələr quraşdırılmışdır. Təhlil aparılarkən biz buna da rast gəldik. Belə çıxdı ki, heç kim buna məsuliyyət daşımır, heç kim buna cavabdehlik daşımır. Buna son qoyulmalıdır. Mən göstəriş vermişdim ki, su xətləri üzrə həm vizual monitorinq aparılmalıdır, yəni, yerində, eyni zamanda, müasir müşahidə sistemləri - kameralar quraşdırılmalıdır və bu qanunsuz birləşmələrə son qoyulmalıdır".
Ölkə başçısının suvarma sahəsində olan nöqsanlarla bağlı bildirdiyi fikirlərdən məmurlar hansı nəticələri çıxarmalıdır?
Sosial Məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, aqrar sektorun belə ciddi böhrana düşməsinin başlıca səbəbi melorasiya sahəsinə məsul şəxslərin səriştəsiz fəaliyyəti olub: “Biz bu fikirləri kimsə vəzifəsindən çıxarılandan sonra demirik. Daima demişik ki, bu sahədə fermerlər əziyyət çəkir. Bu sahədə ciddi korrupsiya əlamətləri olub və hazırda da var. Bunun halqasında yerli icra hakimiyyətləri də var. Rayonlarda olan su idarələrinin müdirlərinin həyat tərzinə fikir versək görərik ki, onlar dövlət əmlakını necə talayırlar. Sanki oliqarx kimi yaşayırlar. İndi görün həmin idarənin başında oturanların vəziyyəti necədir. Burada həm dövlətin ayırdığı vəsaitin talanması baş verib, həm də fermerlərin incidilməsi. Fermerlərin incidiləməsinin də dövlətə böyük ziyanı dəyir. Suların təsərrüfatlara düzgün yönəldilməməsi bir çox fermerləri tam asılı vəziyyətə salıb, hətta buna görə tam müflis olanlar da var. Müəyyən oliqarx məmurların yerlərdə 100 hektarlarla əkin sahələri var. Onlar yerli məmurlarla birləşib, yalnız özləri üçün imtiyazlı şərait yaradıblar. Bu sahədə aparılan araşdırmalar öz məntiqi sonluğuna çatsa, oğurlanan milyardların izinə düşə bilərik. Yerlərdə bu sahəyə məsul olan məmurların fəaliyyəti araşdırılsa, mütəşəkkil dəstələri ifşa edə biləcəyik”.
Məhəmmədəli QƏRİBLİ
