Bir neçə ildir ki, mart-aprel aylarında yazın mövsümi meyvələri olan alça və gilasın gözqamaşdıran qiymətləri ortaya çıxır. Təsadüfi deyil ki, bir neçə gün öncə sosial şəbəkədə alçanın kiloqramının 175 manata təklif edilməsi ilə bağlı məlumat yayıldı. Onu da qeyd edək ki, aprel ayında mövsümi meyvələrin qiyməti qalxır.
Ekspertlər bildirirlər ki, bəzi dükan sahibləri bu fəsildə mövsümi meyvələrin qiymətini süni şəkildə artırırlar.
Maraqlıdır, hazırda meyvələrin qiymətinin baha olmasının səbəbi nədir?
“Məhsuldarlığa qlobal iqlim dəyişikliyi təsir edir”
Məsələ ilə bağlı danışan kənd təsərrüfatı üzrə ekspert Vahid Məhərrəmov qeyd etdi ki, qiymətlərin dəyişkən olması məhsuldarlıqdan asılıdır: “Məhsuldarlığa qlobal iqlim dəyişikliyi təsir edir. Bu səbəbdən də mövsümi meyvələrin qiyməti baha olur. Məlumat üçün bildirim ki, son iyirmi ildə qlobal iqlim dəyişikliyi nəticəsində havanın temperaturu dəyişib və temperaturu əvvəlcədən proqnoz vermək belə çətinləşib. Təsadüfi deyil ki, indi verilən proqnozların əksəriyyəti özünü doğrultmur. Bu baxımdan, qarşıdakı günlərdə bizi nə gözləyir, onu demək çətindir. Lakin indiyədək havanın temperaturu münbit olub. Bu, məhsuldarlığın yaxşı olmasına işarədir. Amma onu da deyim ki, hava şəraiti kəskin olsa belə, aqrotexniki qaydalara əməl etməklə məhsuldarlığı yüksəltmək olar. Nəticənin belə olması isə bu sahədə aparılan siyasətdən, bizim bağbanlardan asılıdır”.
Həmsöhbətimiz hesab edir ki, məhsuldarlığın aşağı, qiymətlərin yuxarı olmasının səbəbkarı bağbanlardır: “Bizdə bağbanların maarifləndirilməsi istiqamətində lazımi addımlar atılmır. Qeyri-peşəkarlar bu sahədə bağbanları, fermerləri maarifləndirirlər. Ancaq onların çoxu, sadəcə, oxuduqlarını çatdırır, təcrübə isə minimum səviyyədədir”.
Günel CƏLİLOVA
