“Bakı şəhəri, Yasamal rayonu, Bəxtiyar Vahabzadə küçəsi 547-ci məhəllədə yerləşən “Baku Bakery”un məmulatlarının satışı mağazasında istifadə müddəti bitən məhsulların satışı həyata keçirilir”.
Bunu deyən şikayətçi Vüqar Ağamalıyev qeyd edir ki, daimi olaraq adıçəkilən mağazadan son hadisəyə qədər evə un məmulatları alırmış: “Bir dəfə oğlum həmin mağazadan almış olduğu un məmulatlarından hazırlanan məhsuldan zəhərlənib. Bu hal onu göstərir ki, həmin mağaza məhsulların düzgün saxlanması və qorunması qaydalarına riayət etmir və istifadə müddəti bitən məhsulların satışını həyata keçirir”.
Şikayətçi onu da qeyd edir ki, COVID-19 ölkədə tüğyan etdiyi vaxtda gigiyena qaydalarına mütləq qaydada riayət edilməlidir, həmin mağazada siçovulların sərbəst şəkildə un məmulatlarının üstündə hərəkərt etməsini görüb: “Bunun aradan qaldırılmasını mağaza sahibindən dəfələrcə xahiş etməyimə baxmayaraq, mağaza sahibi bu halların aradan qaldırılması ilə bağlı hər hansı tədbir görməyib, nəticədə belə halların mobil telefonum vasitəsilə çəkilişini apararaq, mağaza barəsində şikayət etmək qərarına gəlmişəm”.
- “Baku Bakery”: “Biz kiminsə hər hansı iddiasına cavab verən deyilik, şikayətçi olan şəxs aidiyyəti üzrə müraciət edə bilər”
Məsələ ilə bağlı “Baku Bakery”un məmulatlarının satışı mağazasından bildirildi ki, müəssisə 20 ildən artıqdır fəaliyyət göstərir: “Biz kiminsə hər hansı iddiasına cavab verən deyilik. Şikayətçi olan şəxs aidiyyəti üzrə müraciət edə bilər”.
- Eyyub Hüseynov: “Məşhur şirniyyat sexləri ilə bağlı mütəmadi olaraq şikayətlər daxil olur”
Azad İstehlakçılar Birliyinin (AİB) sədri Eyyub Hüseynov bildirdi ki, məşhur şirniyyat sexləri ilə bağlı mütəmadi olaraq şikayətlər daxil olur: “Çox təəssüf ki, istehlakçıların telefon zəngləri arasında ən məşhur, şirniyyat istehsal edən müəssisələrlə də bağlı şikayətlər daxil olmaqdadır”.
Birlik sədrinin sözlərinə görə, şirniyyatların, eləcə də digər məhsulların açıq havada satışı qətiyyən yolverilməzdir: “İstehlakçılar bu cür məhsulları almamalıdırlar. Açıq şəraitdə satılan mallar çirklənmiş hesab olunur. Müvafiq dövlət orqanları bunun qarşısının alınması istiqamətində iş aparmalıdırlar”.
Günel CƏLİLOVA
