Ağacların qanunsuz kəsilməsi hələ də ölkəmiz üçün həll olunmamış bir problemdir. Bu günlərdə Bakı şəhəri, Ziya Bünyadov prospekti 1 ünvanında ağacların kəsilməsi faktı aşkar olunub. Qeyd edək ki, həmin ərazidə çinar, şam və leylandr ağacları olub. Lakin həmin ağaclar bəzilərinə maneə törətdiyi üçün kəsilib.
Qeyd edək ki, bildirilən ünvanın yaxınlığında böyük taxta, eləcə də digər tikinti materialları bazarı yerləşir. Ehtimal edilir ki, sahibkarlar satış obyektlərinin ərazisini genişləndirmək üçün ağaclar kəsilib.
Vaqif Cavadov: “Ərazidə çinar, şam və leylandr ağacları kəsilib”
Dövlət Ekoloji Təhlükəsizlik Xidmətinin rəsmisi Vaqif Cavadov bildirdi ki, ərazidə çinar, şam və leylandr ağacları kəsilib: “Hazırda ağac kəsənlərin tapılması və təbiətə dəymiş ziyanın məbləğinin müəyyənləşdirilməsi istiqamətində araşdırma aparılır”.
Telman Zeynalov: “Ağacların kəsilməsi ətraf mühit üçün mənfi nəticələrə, xüsusilə havanın çirklənməsinə və iqlim istiləşməsinin artmasına səbəb olur”
Ekoloq Telman Zeynalov qeyd etdi ki, ağacların kəsilməsi Azərbaycan üçün ağrılı bir mövzu olaraq qalır: “Belə hallar lazımi nəzarətin olmaması səbəbindən baş verir. Ağacların kəsilməsi ətraf mühit üçün mənfi nəticələrə, xüsusilə havanın çirklənməsinə və iqlim istiləşməsinin artmasına səbəb olur. Bəllidir ki, bəzi ərazilərdə qaz olmadığı üçün ağacların kəsildiyini tez-tez eşidirik, amma bunun olub-olmadığını anlamaq üçün müvafiq strukturların bu cür ərazilərin ətraflı siyahısını təqdim etmələri lazımdır. İndi belə bir siyahı yoxdur. İstəsələr, tullantılardan yanacaq əldə etmək üçün bir proqram həyata keçirmək mümkün olardı, buna görə bu məqsədlər üçün ağacların kəsilməsinə ehtiyac olmayacaq. Ancaq bu məsələ ilə heç kim məşğul olmur”.
Həmsöhbətimiz onu da əlavə etdi ki, kabab bişirilən obyektlərdə aktiv şəkildə istehlak edilən kömür əldə etmək üçün ağaclar qanunsuz olaraq kəsilir. Şəhərdəki ağacların kəsilməsinə onu deyə bilərəm ki, torpaq sahələri alanlar, təəssüf ki, indi ağacları kəsmək də daxil, istədiklərini etmək hüququna sahibdirlər”.
Günel CƏLİLOVA
