Bugünlərdə istifadəyə verilmiş Qala - Pirallahı avtomobil yolunun 3.6-cı km-də yerüstü piyada keçidi ilə bağlı narazılıqlar baş qaldırıb. Sosial şəbəkələrdə həmin keçidin fotoları paylaşılıb və belə təsəvvür yaranır ki, keçid sanki çölün ortasında tikilib.
Keçiddən xeyli məsafə aralıda isə yaşayış massivi görünür. Vətəndaşlar haqlı olaraq sual verirlər ki, milyonlarla xərc çəkilirsə, niyə həmin keçid belə “əldən-ayaqdan uzaq” yerdə inşa olunur?
İlqar Hüseynli: “Kortəbii olaraq harada gəldi keçid tikmək dövlətin büdcəsinə böyük ziyan vermiş olur”
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, piyada keçidləri tikilməzdən əvvəl bununla bağlı araşdırma və tədqiqat işləri aparılmalıdır: “Hesablanmalıdır ki, piyada keçidi qurulan yerdə nəqliyyatın intensivliyi hansı səviyyədədir. Onun yaxınlığında olan yaşayış massivindəki məskunlaşma nə qədərdir. İnsanların məhz həmin yerdən nə qədər yolu keçməsi üçün hansı səviyyədə zərurət var. Həmin ərazidə baş verən avtoqəzalar nəticəsində hansı sayda insan itkisinin olması da araşdırılmalıdır. Bütün bu araşdırmalardan sonra qərara gəlinir ki, həmin ərazidə yerüstü keçidin salınmasına ehtiyac var, yoxsa yox. Bunlar yoxdursa, kortəbii olaraq harada gəldi keçid tikmək dövlətin büdcəsinə böyük ziyan vermiş olur. Belə əməllər ictimaiyyətdə ciddi şübhələr doğurur. Neft pullarının ölkəyə daha çox axdığı dönəmdə qurumlar belə layihələrə xırda iş kimi baxırdılar. Daha çox yol çəkilişinə və körpü tikintilərinə önəm verdilər. Çünki həmin layihələrdəki məbləğ daha böyük idi. Çəkilən həmin yollar göz qabağındadır. Hazırda ölkəyə pul axını azalıb. Diqqət çəkən budur ki, sürətlə piyada keçidləri tikməyə başlayıblar. Azadlıq prospektində də belə səmərsiz iki piyada keçidi qurulub. Şəhərin içində çoxlu sayda piyada keçidlərinin tikilməsinə ehtiyac yoxdur. Bunu adi piyada zolağı ilə də əvəz etmək olar. Bütün bunlar onu deməyə əsas verir ki, bu istiqamətdə müvafiq qurumlar araşdırma aparılmalıdır”.
Anar Nəcəfli: “Hər iki qəsəbə üçün ortaq bir mövqe seçilib ki, sakinlərə rahat olsun”
Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli isə “Bakı-Xəbər”ə bildirdi ki, bu narazılıqlar əbəsdir: “Təəssüflər olsun ki, bəzi insanlara nəyisə bəyəndirmək çox çətindir. Həmin ərazidə keçid tikilməsydi də narazılıq olacaqdı. Fotolorda o qədər də görünmür, ancaq nəzərinizə çatdırım ki, həm yolun sağında, həm də solunda iki yaşayış məntəqəsi var. Yaşayış məntəqələrindən birində orta məktəb var. Digər məntəqədən məktəbə gələn şagird, valideyn və müəllimlər sürətli magistral yolu keçməlidirlər. Təəssüflər olsun ki, məhz həmin ərazidə məktəblilərin vurulması ilə nəticələnən yol qəzaları baş verib. Bundan əlavə, keçidin hər iki tərəfində avtobus dayanacaqları var. Avtobusdan düşən vətəndaşlar həmin keçiddən istifadə etməklə öz evlərinə gedirlər. Hər iki qəsəbə üçün ortaq bir mövqe seçilib ki, sakinlərə rahat olsun. Keçidin harada inşa olunmasını bizim qurum müəyyən etmir. Planlamanı müxtəlif qurumlar həyata keçirir və sonda biz həmin layihənin tikintisi ilə məşğul oluruq”.
Məhəmmədəli QƏRİBLİ
