Astara Rayon Heydər Əliyev Mərkəzi, Ombudsmanın Cəlilabad Regional Mərkəzi, Astara Rayon Gənclər və İdman İdarəsinin birgə təşkilatçılığı və tələbə-gənclərin, rayonda təhsil alan yuxarı sinif şagirdlərinin iştirakı ilə “Narkomaniyaya qarşı səmərəli mübarizə və sağlam həyat tərzinin təbliği” mövzusunda maarifləndirici onlayn tədbir keçirilib.
Astara Rayon Heydər Əliyev Mərkəzinin direktoru Kübra Səmədova, Ombudsmanın Cəlilabad Regional Mərkəzinin rəhbəri Ziya İsmayılov, Astara Rayon Gənclər və İdman İdarəsinin rəisi Ərçə Əliyev və başqaları mövzu ətrafında çıxışlarında bildiriblər ki, narkotiklərin qanunsuz dövriyyəsi və narkomanlıq bu gün dünyanı düşündürən əsas problemlərdən biridir. Cinayətkarlığın artmasına səbəb olan narkotiklərin qanunsuz dövriyyəsi terrorizmin maliyyə mənbəyi olmaqla, beynəlxalq təhlükəsizliyə ən ciddi təhdid yaradır. Odur ki, bəladan qurtulmaq üçün dünya dövlətləri narkomanlığa və narkotik vasitələrin qanunsuz dövriyyəsinə qarşı mübarizə üsullarını, eləcə də beynəlxalq səviyyədə müvafiq nəzarət sisteminin tətbiqi sahəsində səylərini artırırlar.
Tədbirdə o da vurğulanıb ki, son illər respublikamızda narkomaniyaya qarşı mübarizə sahəsində dövlət tərəfindən ciddi addımlar atılır, bu da öz müsbət nəticələrini göstərir. Azərbaycanda Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası yaradılıb və “ağ ölümə” qarşı mübarizədə dövlətin strateji kursunun əsasları müəyyən edilib. Vaxtaşırı bir sıra təşkilati-hüquqi, institusional, əməli-praktiki tədbirlər həyata keçirilib, narkotiklərlə mübarizə üzrə beynəlxalq təşəbbüslərdə ölkəmizin iştirakı təmin olunur. Ən əsası, dövlət başçısı İlham Əliyevin 2019-cu il 22 iyul tarixli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı” nın təsdiqi bu sahədə görülən işlərin davamıdır.
Sonda Astara Rayon Dövlət Rəsm Qalereyasının şagirdlərinin “Narkomaniyaya yox deyək!” mövzusunda çəkdikləri rəsmlərin virtual sərgisi nümayiş olunub, iştirakçıların maraq dairəsində olan suallar ətraflı cavablandırılıb.
Zəfər ORUCOĞLU Azərbaycan Jurnalistlər Birliyinin üzvü
