Azad İstehlakçılar Birliyinin sədri Eyyub Hüseynov Bakıda fəaliyyət göstərən “Şəki Qala” restoranının 8 Mart Beynəlxalq Qadınlar Günü qadın müştərilərini aldatdığı iddiası ilə çıxış edib.
Qurum sədrinin ictimailəşdirdiyi məktuba imza atan Bakı şəhər sakinləri İsmayıllı Aygün Nizami qızı, Əsgərzadə Aygül Müşfiq qızı və Əsgərova Şərqiyyə Azər qızı bildirirlər ki, 6 mart 2021-ci il tarixdə Bakı şəhəri, Nərimanov rayonu, Əhməd Rəcəbli küçəsi 38 ünvanında yerləşən “Şəki Qala” restoranı ilə əlaqə saxlayaraq, 8 mart Beynəlxalq Qadınlar Bayramı münasibətilə tədbir nəzərdə tutulması ilə maraqlanıblar: “Bizə bildirildi ki, 8 Mart bayramı münasibətilə həmin gün restoranda öncədən hazırlanmış menyu əsasında 1 nəfərə 100 manat olmaqla tədbir keçirilir. Restorandan bizə o da bildirildi ki, 3 nəfər və 10 yaşlı uşaq, cəmi 4 nəfər ödənişli xidmət əsasında, digər 6 və 3 yaşlı 2 uşaq isə ödənişsiz olaraq tədbirdə iştirak edə bilər. Restorandan əlavə olaraq bildirildi ki, menyuda olan təamlar masaya fasiləsiz olaraq istənilən miqdarda veriləcək. Həmçinin restorandan ödənişin cəmi məbləği olan 400 manatın öncədən ödənilməli olması bizə deyildi. Yuxarıda qeyd edilənlərə əsasən 06 mart 2021-ci il tarixdə 400 manat pulu restorana nağd ödədik. Bu zaman heç bir maliyyə sənədi, kassa qəbzi təqdim olunmadı!
08 mart 2021-ci ildə axşam saatlarında restoranda olarkən restoran yetkililəri bizə azyaşlı 2 uşağa görə ( 3 yaş və 6 yaş) menyuda nəzərdə tutulan təamlardan verilməyəcəyini bildirdilər. Restoran əməkdaşları bunu 2 uşağa görə 200 manat pulu ödəməməyimizlə əsaslandırdılar. Biz onlara restoran rəhbərliyinin azyaşlıların biletə düşmədikləri, yəni onların valideynləri ilə birlikdə menyuya uyğun təmin edəcəkləri barədə qarşımızda 6.03 tarixdə öhdəlik götürüldüyünü bildirsək də, restoran adminstratoru azyaşlılara görə pul ödənilməli olduğunu bildirdi və məclisin sonuna qədər azyaşlılara hər hansı bir qida, su, şirə və sair təamların verilməsindən imtina etdi. Məcburiyyət qarşısında qalaraq bizə verilən yeməkləri və digər məmulatları uşaqlarımıza verdik. Təəccüblüdür, 3 yaşlı uşaq və ya hər hansı bir böyük yaşlı adam axşam saatlarında 100 AZN dəyərində yemək yeyə bilərmi!?
Bundan başqa, razılaşma mərhələsində restoran mülkiyyətçisi menyuda qeyd olunan qida məmulatlarının masaya fasiləsiz olaraq veriləcəyi barədə öhdəlik götürsə də, faktiki olaraq menyuda nəzərdə tutulan qida məmulatlarından hər kəsə yalnız 1 ədəd verilib. Eyni zamanda, yeməklər və salatlar masaya yalnız bir qabda, həmçinin normadan olduqca az həddə, yəni kiçik ölçülü qablarda verilib. Ümumilikdə bizim üçün açılmış süfrənin dəyəri 60-70AZN olardı. Yaranmış problemlər barədə restoranda işləyən Rəfail adlı şəxsə məlumat verilsə də, həm şəxs də restoran yetkililərinin qanunsuz əməllərinə son qoyulmasına çalışmadı.
İşin faktiki hallarından göründüyü kimi, “Şəki Qala” restoranın mülkiyyətçisi (administratoru) bizə 4 nəfər 10 yaşdan yuxarı, 2 nəfər 7 yaşdan aşağı cəmi 6 nəfərə 400 manat müqabilində menyuda nəzərdə tutulan yeməklərdən fasiləsiz veriləcəyini yalandan vəd verməklə bizi aldatmış, belə yalan vəd verməklə məhz həmin restoranı seçməyimizi təmin edərək, 2 gün əvvəldən ödənişi alaraq tədbir günü 2 nəfər 7 yaşdan aşağı uşağa qida verməkdən imtina etmiş, digərlərinə hər kəsə 1 ədəd olmaqla yemək vermiş, yeməklər və digər qida məmulatları həcmcə normadan az olmuş, istehlakçı hüquqları pozulmuş, hüquqlarımızın pozulmasının aradan qaldırılmasına dair tələblərimizə əhəmiyyətsiz yanaşılmışdır. Restoran rəhbərliyinin məsuliyyətsiz və dələduzluq elementləri ilə zəngin olan əməlləri nəticəsində aldadılmış və mənəvi sarsıntı keçirmişik. Orda, həmçinin, sosial məsafənin qorunmasına qətiyyən əməl edilmirdi! Restoran mülkiyyətçisi 400 manat ödəniş edilərkən bizə kassa mədaxil qəbzinin təqdim edilməsini təmin etməyib. Eyni zamanda, tələb etməyimizə baxmayaraq, masaya təqdim edilən qida məmulatlarının qiymət preyskurantı bizə təqdim edilməyib. Bizə məlum deyil ki, 400 manat ödəniş qarşılığında hansı yeməklər və sair qida məmulatları hansı qiymətə təqdim edilib. Göründüyü kimi, restoran rəhbərliyi tərəfindən həmçinin vergi qanunvericiliyinin tələbləri pozulub. Restorandakı bu qanunsuzluqlar barədə müxtəlif dövlət orqanlarına məlumat verilsə də, bugünə kimi heç bir əməli tədbir görülməyib, ona görə də sizə müraciət etmək qərarına gəldik.
Bu günlərdə maraqlandıqda bizə restoranın sahibinin Qəribov Zöhrab Fərhad oğlu olması bildirilsə də, restoranın kimin adında qeydiyyatda olması dövlət orqanlarında dəqiqləşdirilməli, restoran sahibinin araşdırmaya cəlb edilməsi təmin olunmalıdır.
Göstərilənləri nəzərə alaraq, “Şəki Qala” restoranının mülkiyyətçisinin və administratorunun müştəriləri aldadan əməllərinin inzibati icraat qaydalarına uyğun olaraq iştirakımız təmin edilməklə araşdırılmasına, həmçinin “Şəki Qala” restoranının mülkiyyətçisinin və administratorunun barəsində lazımi tədbirlərin görülməsinə köməklik göstərməyinizi, artıq ödədiyim 320 manat pulun mənə qaytarılmasını, insanları aldadan bu restoran xidməti barədə dövlət orqanlarına məlumat verilməsini sizdən xahiş edirik”.
Qeyd edək ki, bu, 8 Mart bayramı ilə bağlı restoranlarda yaranan ilk narazılıq deyil. Ekspertlər hesab edir ki, bəzi restoranlar bayramlarla bağlı müştəri axınını nəzərə alaraq reklam mətnlərini bir qədər cəlbedici edirlər. Bu da müştərilərlə restoran arasında anlaşılmazlığa səbəb olur. Bütün səslənən ittihamlara aydınlıq gətirmək üçün sözügedən restoranla əlaqə saxladıq. Restoranın müdiri Rafiq Aslanov “Bakı-Xəbər”ə açıqlamasında bildirdi ki, bu barədə səslənən iddialardan xəbərdardı: “Həmin şikayət həqiqətə uyğun deyil. Bizim restoran tanınmış bir brenddi. İstəmərik ki, kimsə bizdən narazı getsin. Bayram günlərində biz elə proqramlar təşkil edirik. Orada ödənilən pul bir adamın yeməyinə ödənilmir. Müxtəlif şou proqramlar, tanınmış müğənnilərin iştirakı ilə konsret təşkil olunur. Deyilən xanımlar həqiqətən bizim restoranda olublar. Onlar əvvəlcədən pulu ödəyiblər. Bunu hamı eyni qaydada edib. Çünki restorandakı yerlər sifarişlərə çatmır. Hər bir nəfər üçün qiymət 100 manat olub. Yanlarında iki azyaşlı uşaq gətiriblər. Onların da masa arxasında oturulması üçün şərait yaradılıb və heç bir ödəniş alınmayıb. Sonra müştərilər uşaqlar üçün əlavə yemək tələb ediblər. Biz təklif etmişik ki, masaya əlavə olaraq nə istəsələr, ödənişsiz sifariş edə bilərlər. Razılaşmadılar. Görünən bu idi ki, həmin müştərilər sanki bayram keçirməyə deyil, nəsə problem yaşatmağa gəliblər. Onlara əlavə olaraq çay və ona aid pulsuz mürəbbələr də verildi. Sonra eşitdik ki, bizdən polisə şikayət ediblər. Dünən Eyyub Hüseynov mənə zəng etmişdi. Deyir, bizi barışdırmaq istəyir. Axı, biz müştərilərlə küsməmişik ki, bizi barışdırsın. Aparılan bu kampaniyanı özümüzə qarşı qərəz sayıram. Hansı instansiyada araşdırılsa, yenə də biz haqlı çıxacağıq”.
Restoran müdiri bildirdi ki, vergi ödənişləri və qəbzlərin verilməsilə də bağlı fəaliyyətləri tam qaydasındadır: “Mən başa düşə bilmirəm, bunlar müştəri olub, yoxsa audit yoxlaması? Bizim qapımız bütün təşkilatların üzünə açıqdır, buyursunlar gəlsinlər və bizim restoranın fəaliyyətilə yaxından tanış olsunlar”.
Məhəmmədəli QƏRİBLİ
