Bütün dünya ölkələri arasında sürətlə yayılmaqda davam edən, Ümumdünya Səhiyyə Təşkilatı tərəfindən qlobal pandemiya elan olunan koronavirus (COVID-19) infeksiyasının yayılmasının qarşısının alınması istiqamətində ölkəmizdə bu gün də geniş tədbirlər həyata keçirilir.
Ölkə Prezidenti İlham Əliyevin birbaşa rəhbərliyi altında Nazirlər Kabineti yanında Operativ Qərargah tərəfindən Ümumdünya Səhiyyə Təşkilatının tələb və tövsiyələrinə uyğun olaraq, ölkəmizdə koronavirus infeksiyasının yayılmasının qarşısının alınması istiqamətində lazım olan bütün zəruri işlər görülür.
Hər kəsə yaxşı məlumdur ki, koronavirusla mübarizədə həkimlərin, tibb işçilərinin rolu olduqca böyükdür. Xəstə yaxınlarının ümid yerinə çevrilən həkimlərin və tibb işçilərinin koronavirus infeksiyası ilə mübarizə tədbirlərində gördükləri işlər danılmazdır. Koronavirus kimi təhlükəli virusa qarşı mübarizədə ön cəbhə “əsgərlərimiz” həkimlərimiz və tibbi xidmət personalıdır. Onlar mürəkkəb şəraitdə gərgin əmək sərf edərək, sutka ərzində, demək olar ki, fasiləsiz çalışırlar.
Koronavirus infeksiyası ilə mübarizə aparan həkimlərin əməyinin qiymətləndirilməsi məqsədilə ölkə başçısının tapşırığına əsasən, tibb işçilərinə daha yüksək əməkhaqqı verilməlidir. Gözəgörünməz virusla mübarizə aparan həkimlərimizə yüksək əməkhaqqı verilir.
Ancaq bu günlərdə koronavirusla mübarizə aparan həkimlər sosial şəbəkədə paylaşım edərək, İcbari Tibbi Sığorta üzrə Dövlət Agentliyi tərəfindən onların maaşlarına edilməli olan əlavələrin köçürülmədiyini iddia edirlər.
Söhbət xüsusilə 1 saylı Kliniki Tibbi Mərkəzdən gedir.
Həkimlər iddia edirlər ki, koronavirusla mübarizəyə cəlb olunduqları halda əməkhaqlarına əlavələr ödənilməyib: “Çalışdığımız müəssisədə koronavirusla mübarizəyə cəlb olunan həkim və tibb bacılarına əməkhaqlarının əlavələri köçürülməyib. Yanvar-fevral ayları üçün köçürülməli olan məbləğ hələ də bizə ödənilməyib. Öz rəhbərliyimizdən soruşuruq, cavab ala bilmirik. Bizə deyilir ki, pul yoxdur, tibb personalına ödənişlər köçürülə bilmir”.
“Yeni növ koronavirus infeksiyası ilə mübarizə tədbirlərində iştirak edən tibb və qeyri-tibb işçilərinə iş vaxtına mütənasib olaraq, aylıq vəzifə (tarif) maaşının 3-5 misli məbləğində müddətli əlavələr ödənilir”
İcbari Tibbi Sığorta üzrə Dövlət Agentliyindən bildirildi ki, 1 saylı Kliniki Tibbi Mərkəz tərəfindən yanvar ayı üzrə tərtib olunan yekun siyahı 30 mart 2021-ci il tarixində agentliyə təqdim edilib: “Agentlik tərəfindən ödənişlərin ərzində başa çatması nəzərdə tutulur. Müddətli əlavələr tibb müəssisələri tərəfindən İcbari Tibbi Sığorta üzrə Dövlət Agentliyinə (Agentlik) göndərilən iş vaxtı tabellərinə, ilkin mühasibatlıq cədvəllərinə əsasən üç iş günü ərzində ödənilir. Məlumat üçün bildirək ki, 1 saylı Kliniki Tibbi Mərkəz tərəfindən fevral ayı üzrə siyahı agentliyə təqdim edildikdən sonra həmin ay üzrə də ödənişlərə başlanacaq.
Azərbaycan Respublikası Nazirlər Kabinetinin müvafiq qərarına uyğun olaraq, yeni növ koronavirus infeksiyası ilə mübarizə tədbirlərində iştirak edən tibb və qeyri-tibb işçilərinə iş vaxtına mütənasib olaraq, aylıq vəzifə (tarif) maaşının 3-5 misli məbləğində müddətli əlavələr ödənilir”.
Günel CƏLİLOVA
