Əcnəbi ovçuların Azərbaycan qoruqlarında nəsli kəsliməkdə olan fauna növlərinə divan tutması faktları Azərbaycan cəmiyyətində ciddi şəkildə müzakirə edilməklə yanaşı, həm də qınaq obyektinə çevrilir, hətta bəzi iri məmurların həmin əcnəbilərlə əməkdaşlıq etdiyi haqda iddialar da gündəmə gətirilir.
Baş verənlərə Ekoloji Təhlükəsizlik Xidməti belə münasibət bildirib: “Ekologiya və Təbii Sərvətlər Nazirliyində sosial şəbəkələrdə əcnəbi turistlərin hərəkətləri ilə bağlı vəzifə səhlənkarlığına yol verən şəxslərlə bağlı işçi qrup yaradılıb və xidməti araşdırmalar başlanıb.
Hər hansı əməkdaşın qanun pozuntusuna yol verdiyi aşkar olunarsa, onlarla bağlı ciddi tədbirlər görüləcək və bu barədə ictimaiyyətə ətraflı məlumat veriləcək”.
Maraqlıdır, əcnəbi ovçularla çirkin əməkdaşlığa daha çox kim gedir - xırda məmurlar, yoxsa mərkəzdəki iri məmurlar?
“Müasir İnkişaf” Birliyinin sədri Mübariz Göyüşlü “Bakı-Xəbər”ə bildirdi ki, ərəb ovçularının Azərbaycan qoruqlarındakı özbaşınalıqları, vəhşi hərəkətləri ölkə gündəmini silkələdi və etirazlar o həddə çatdı ki, müvafiq dövlət qurumu bu istiqamətdə qərarlar qəbul etdi, qanunsuzluq edən əcnəbiləri cərimələdi və sair. “Verilən qərarlar, təbii, bizi qane etmədi, çünki onların bizim təbiətə vurduğu ziyana görə onlara tətbiq edilən cərimələrin məbləği məlum əcnəbi ovçular, turistlər üçün heç nədir. Amma, ən azından, ictimai narazılıq, ictimai nəzarət mexanizmi öz ifadəsini tapdı. Bilirsiniz, hadisə baş verəndən sonra mən ya olayın olduğu qoruğun, ya da bir başqa qoruğun sədr müavininin bu barədə yazdığı məqaləni oxudum. O, çox böyük həyəcanla, öz işinə sevgi və təbiətimizə, flora və faunamıza yanğı ilə yazdığı məqaləsində bir sıra mətləblərə toxunub. O, ağrılı-acılı şəkildə qeyd edirdi ki, bizim o qoruğa girən əcnəbi ovçuları dayandırmaq üçün imkanlarımız olmur, buna cəhd edirik, amma yuxarıdan zəng gəlir və sadəcə, biz seyrçi kimi kənarda qalırıq. Mən o insanın məqaləsindən bu məqamları tutdum və hiss etdim ki, o, öz işinə böyük sevgi ilə yanaşan bir adamdır. Buradan da görsənir ki, bu kimi qanunsuz hərəkətlər kifayət qədər böyük vəzifə daşıyan məmurlar tərəfindən himayə olunur, yönləndirilir, icra olunur. Son prosesdə bəzi iri dövlət məmurlarının adları daha çox hallandırıldı. Bu kimi ciddi məsələnin kiçik icraçı məmurların əməli olduğu inandırıcı görünmür, çünki hər hansı bir iri məmurdan göstəriş gəlməsə, onlar özbaşına bu qədər ağır məsuliyyətin altına girə bilməzlər. Bu məsələlərdə hansısa iri məmurun, nazirin, komitə rəhbərinin əlinin olduğu hiss olunurdu. Ancaq yüksək ranqlı bir məmurdan gələn tapşırıqdan sonra Ekologiya və Təbii Sərvətlər Nazirliyinin qoruqlardakı əməkdaşlarının müdaxiləsi məhdudlaşdırıla bilər. Siz, mən, bir başqası gedib bunu edə bilmərik”.
M.Göyüşlü qeyd etdi ki, son hadisə ictimailəşdiyi üçün cəmiyyət xəbər tutub, amma cəmiyyətin xəbəri olmadan o qədər belə qanunsuzluqlar baş verir ki. “Amma fauna və flora növlərinin mühafizə olunduğu qoruqlarda nəsli kəsilməkdə olan bitkilərin, heyvanların qırılması, daşınması, məhv edilməsi kimi faktlar gündəmə gəlir. O mənada mən bu işdə yüksək çinli məmurların “əməyi”nin olması qənaətindəyəm. Aşağı səviyyəli məmurların qoruqlarda baş verən cinayətlərdə hansı şəkildə rolu ola bilir? Onlar müəyyən rüşvət, şirinlik müqabilində hansısa kiçik işlərə göz yuma, şərait yarada bilərlər, amma bu da kiçik işlər olur. Ancaq bu, böyük məmurların işi ola bilər. Bunun təkrarlanmaması üçün, ilk növbədə, son baş verənlərdə olduğu kimi, ictimaiyyətin böyük təpkisi, ictimai nəzarət, eyni zamanda da çox ciddi cəzalandırma mexanizmi olmalıdır. Bütün məmurlar anlamalıdırlar ki, onların vəzifəsi dövlət, ölkə başçısı tərəfindən onlara həvalə edilmiş missiyanı yerinə yetirməkdir və buna borcludurlar. Bunlar xaric hansısa bir qoruqda ov, əyləncə və sair kimi hadisələrə onların qarışması, iştirak etməsi ən yüngül halda işdən azad edilməsi, ən ağır halda isə qanundan irəli gələn tələblər çərçivəsində cəzalandırılması olmalıdır” - deyə M.Göyüşlü qeyd etdi.
İradə SARIYEVA
