Koronavirus infeksiyası ilə mübarizədə ölkədə karantin rejimi hökm sürür. Pandemiya ilə əlaqədar olaraq ölkədə toy, yas və digər məsliclərin keçirilməsi qadağandır. Ancaq buna baxmayaraq, bəzi şəxslər toy, xeyir məclisləri keçirməkdə davam edirlər.
Qayda-qanuna məhəl qoymayanlar qanunvericiliyə uyğun olaraq cəzalandırılırlar.
Bu günlərdə paytaxtın Nizami rayonunda xüsusi karantin rejimi qaydalarına əməl edilməyən restoranların birində toy mərasiminin keçirilməsi aşkalanıb. DİN Mətbuat Xidmətinin yaydığı məlumatda qeyd olunur ki, polis əməkdaşları tərəfindən keçirilən tədbirlərlə sanitariya-gigiyena və karantin rejimi qaydalarını pozan obyektin sahibi, xidmət personalı, mərasimin təşkilatçıları və iştirakçıları barəsində qanunvericiliyə uyğun olaraq, müvafiq tədbirlər görülüb.
Toy sahiblərinin hər biri 400 manat, mərasimin təşkilinə şərait yaradan restoranın müdiri 4000 manat məbləğində cərimələnib.
Ekspertlərin dediyinə görə, ölkənin qayda-qanunlarına əməl etməyən restoran sahiblərinin 4000 manat məbləğində cərimələnməsi azdır. Yaxşı olar ki, qayda-qanuna məhəl qoymayanlar 4000 deyil, 40000 məbləğində cərimə olunsun. Yaxud restoranda məclis keçirilməsinə icazə verənlər sərt şəkildə cəzalandırılsın. Belə olarsa, yoluxma sayı azalar. Onu da nəzərə almaq lazımdır ki, son günlər yoluxma sayının artmasının səbəblərindən biri kimi toylar qeyd edilir.
“Karantin qaydalarına əsasən, ölkədə toy, nişan, ad günü məclisləri keçirilməməlidir”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, karantin bitəndən sonra da bir müddət şadlıq saraylarında toy məclislərinin keçirilməsi dayandırılmalıdır: “Yaxşı olar ki, gələcəkdə şadlıq saraylarında, eləcə də rayonlarda təşkil olunan “palatka” toylarında dezinfeksiya tədbirləri gücləndirilsin. Toylar keçirilərkən müəyyən məhdudiyyətlər tətbiq etmək olar. Məsləhətdir ki, qonaq sayı azaldılsın. Bununla yanaşı, insanların özündə də daxili mədəniyyət olmalıdır. Qızdırması, soyuqdəyməsi olan, hətta adi qripə yoluxmuş xəstə insanlar məclislərə qatılmamalıdırlar”.
Həmsöhbətimiz onu da əlavə etdi ki, karantin qaydalarına əsasən, ölkədə toy, nişan, ad günü məclisləri keçirilməməlidir. Təəssüf ki, bəzi restoranlarda xeyir məclislərinin keçirilməsinin şahidi oluruq: “Əhalinin sağlamlığı üçün xeyir məclislərinin keçirilməsi dayandırılmalıdır. Əhalinin sağlamlığını düşünməyən resrtoran sahibləri sərt şəkildə cəzalandırılmalıdırlar. Cərimənin məbləği 4000 deyil, 40000-50000 olmalıdır”.
Günel CƏLİLOVA
