Bakının Buzovna qəsəbəsinin sakinləri get-gedə artan qrunt sularından əziyyət çəkir. Bunun əsas səbəbi isə kanalizasiya sisteminin olmamasıdır. Sakinlər özləri həyətlərində “şambo”adlanan qurğu düzəldib kanal kimi istifadə edirlər. Çirkab suların buraya axıdılması isə natəmizliyə gətirib çıxarır.
Sakinlər bildirir ki, 3 dəfə Prezidentə məktub yazsalar da, kənd nə içməli su ilə təmin olunub, nə də kanalizasiya sistemi çəkilib.
Bakının Buzovna qəsəbəsində qrunt suları ilk dəfə 1970-ci illərin sonlarından qalxmağa başlayıb. Amma bir müddət sonra bu sular borular vasitəsilə çəkilib. Keçən ilin əvvəllərindən ərazini yenidən qrunt suları bürüyüb.
Qeyd edək ki, analoji vəziyyət Novxanı qəsəbəsində də hökm sürür. Qəsəbənin ortası ilə bir kanal gedir və ətrafda olan evlərin hərəsindən bir boru ilə kanalizasiya suyu həmin kanala axıdılır. Nisbətən isti havada həmin kanaldan qalxan üfunət bütün qəsəbəni bürüyür. Çox maraqlıdır, Bakının kifayət qədər böyük olan bu qəsəbələrində niyə müasir kanalizasiya sistemi qurulmayıb?
Buzovna Bələdiyyəsi sədrinin müavini Təbriz Nəsiroğlu “Bakı-Xəbər”ə açıqlamasında bildirdi ki, bu, qurunt suları ilə bağlı olan problemdir: “Məsələ ilə bağlı biz 15 gün əvvəl rayonun əlaqədar qurumları ilə həmin ərazidə olmuşuq. Su-Kanalizasiya İdarəsi, qəsəbə Nümayəndəliyi və bizim iştirakımızla baxış keçirilib və problemi aidiyyəti qurumlara istiqamətləndirmişik. Bakının bir çox qəsəbələrində olduğu kimi, bizdə də mərkəzləşmiş kanalizasiya sistemi yoxdur. Məndə olan məlumata görə, Bakıətrafı qəsəbələrin kanalizasiya sisteminin yaxşılaşması ilə bağlı “Azərsu”nun tərtib etdiyi layihə çərçivəsində bu problem yaxın vaxtlarda öz həllini tapmış olacaq. Hazırda vəziyyət belədir ki, hər kəs öz həyətində bir yer qazıb, çirkab suları ora yığır. Sonra xüsusi maşınlarla onları çəkirlər. 1970-ci illərdə Buzovnada bu proses olub. Son bir neçə ilə qədər proses sakitləşmişdi. Qurunt suları 6-7 metr dərinlikdə yerini dəyişən axar sulardı. Keçən ildən bu problem yenidən baş qaldırıb. 2019-ci il 30 dekabrında Buzovnanın kanalizasiya sisteminin yenilənməsilə bağlı layihə təsdiqlənib. 2014-cü ildə isə qəsəbənin su təminatı ilə bağlı layihə təsdiqlənib. İçməli su ilə bağlı müəyyən işlər görülüb, ancaq kanalizasiya sisteminin qurulması ilə bağlı layihənin icrasına hələ başlanmayıb. Bu çox böyük həcmli işdir. Bir bələdiyyənin imkanları ilə problemin öhdəsindən gəlmək mümkün deyil”.
Məhəmmədəli QƏRİBLİ
