Koronavirus pandemiyasına yoluxanların sayının kəskin artması dünyanın əksər dövlətini sərt qaydalar tətbiq etməyə, qapanmaya getməyə vadar edib. Türkiyədə Prezident Rəcəb Tayyib Ərdoğanın rəhbərliyilə ölkə hökumətinin iclası keçirilib və iclasda bu ölkədə koronavirusla bağlı vəziyyətin kəskinləşməsi fonunda bir sıra məhdudlaşdırıcı tədbirlərin tətbiqi barədə qərar qəbul olunub.
Qazaxıstanda da analoji addımlar atılıb, Gürcüstanda isə komendant saatı tətbiq olunur. Koronavirusun daha çox tüğyan etdiyi ölkələrdən olan Fransada və digər Avropa ölkələrində də sərtləşdirici addımların atılacağı ilə bağlı qərar qəbul edilməsi aktualdır.
Azərbaycanda son bir həftənin statistikasına nəzər salsaq görərik ki, ölkəmizdə yoluxanların sayının 1800-ü ötdüyü gün olub, ölüm halları da artıb. Qonşu ölkələrin qapanmaya və digər alternativ sərtləşdirmə tədbirlərinə əl atdığı, bunu gerçəkləşdirdiyi bir vəziyyətdə Azərbaycan hansı addımları atmalıdır?
Pərvanə Vəliyeva: “Sərtləşdirilməyə gedilməsi labüddür”
Sağlamlığa Xidmət İctimai Birliyinin icraçı direktoru Pərvanə Vəliyeva hesab edir ki, yoluxmanın sürətlə artması və virusun yeni ştammlarının yayılması sərt tədbirlər görməyi zəruri edir. “Koronavirusun yeni ştammı böyük sürətlə yayılır və onun diaqnozları artıq verilib. Türkiyə də qapanmalara getdi, Gürcüstanda da qapanmalara gediləcək. Çünki onlarda yoluxma halları qat-qat yüksəkdir. Bizim ölkədə də artıq yoluxmanın dinamikası yüksəkdir. Biz payız aylarında 5-6 min yoluxma hallarını görmüşük. Sürətli yoluxma hallarını mən Novruz bayramı ilə əlaqələndirirəm, bizdə ənənədir, insanlar bir-birinin evlərinə gedib bayramlaşır və ünsiyyətdə olurlar. Bundan əlavə, bir qisim insan ictimai iaşə müəssisələrində bayramları keçirməyə üstünlük verib. Bu baxımdan yoluxmalar artdı. Sərtləşdirilməyə gedilməsi labüddür, amma qapanmalar baş verərsə, bu, mərhələli şəkildə olmamalıdır, təhsil və SMS icazə tətbiq ediləcəksə, işləyənlər üçün elektron icazə sisteminin tətbiqi sonuncu mərhələ olmalıdır. Düşünürəm, ilkin olaraq, ictimai iaşə müəssisələrinin fəaliyyətinə müəyyən saat çərçivəsində məhdudiyyət qoyula bilər”.
Qarşıdan yay mövsümünün gəldiyini deyən ekspert hesab edir ki, günəşli günlərin sayı artır və insanlar açıq havada D vitamini əldə etməklə immunitetlərini gücləndirəcəklər. O hesab edir ki, daha çox ictimai iaşə müəssisələrində, ictimai nəqliyyatda məhdudiyyətlərin qoyulması vacibdir. “Maskadan istifadənin təbliğatı artırılarsa, ümumiyyətlə, inzibati tədbirlərə daha çox önəm verilərsə, bu da yoluxma sayında azalmaya səbəb ola bilər. Məsələn, avtobus dayanacaqlarında insanları pulsuz maska ilə təmin edən aparatlar quraşdırıla bilər. Daha sonra insanların kütləvi olduğu yerlərdə pulsuz maska paylanışı olmalıdır, bu, insanlara stimul verir. Bir də ictimai iaşə müəssisələrinə insanların daxilolma sayına məhdudiyyət qoyula bilər, marketlərdə insanların bir-iki araba qədər məsafə saxlamasına şərait yaradılmalıdır. Hər bir müəssisənin özü bu cür inzibati tədbirlər görərsə, yoluxmaların sayı azala bilər”.
Leyla Bayramlı: “Artıq qonşu ölkələrdə qapanma ilə bağlı addımlar atılır və bizim ölkədə də bu cür addımlar atılması zərurətə çevrilir”
Həkim-terapevt Leyla Bayramlı da hesab edir ki, karantin qaydaları sərtləşdirilməli və qapanmaya gedilməlidir. Ekspertin fikrincə, artıq yoluxanların sayı 4 rəqəmlidir və bu da virusa yoluxma həlqəsinin daha da artmasına səbəb olur: “Karantin qaydalarının sərtləşdirilməsi qaçılmazdır və hesab edirəm ki, buna gedilməlidir. Artıq qonşu ölkələrdə qapanma ilə bağlı addımlar atılır və bizim ölkədə də bu cür addımlar atılması zərurətə çevrilir. Çünki virusa yoluxanların sayı get-gedə artır. Eyni zamanda da bu gün ictimai nəqliyyatda, ictimai iaşə müəssisələrində yoluxanların sayı çoxdur. Yoluxmanın qarşısının alınması üçün karantin qaydalarının sərtləşdirilməsi zərurətə çevrilib” - deyə ekspert qeyd etdi.
İradə SARIYEVA
