Bir neçə gün əvvəl İstanbuldakı hotellərdən birində gənc azərbaycanlı biznesmen Nihad Əliyev faciəli şəkildə ölüb. Bundan dərhal sonra müxalif çevrələr və KİV gəncin faciəli ölümü ətrafında müxtəlif səpkili informasiyalar yayılmağa başladı. Hətta hadisənin təfərrüatlarını öyrənmək üçün İstanbul polisinə müraciət edilib.
Polisdən bildiriblər ki, hadisə silahla ehtiyatsız davranış nəticəsində baş verib. Belə ki, silahı təmizləyərkən təsadüfi atəş açılıb və gənci ölümcül yaralayıb: “Bu faciəli insidentin bütün şahidləri dindirilib. Onların ifadələrinə və həyata keçirilmiş istintaq tədbirlərinə əsasən, biznesmenin öldüyü hotel nömrəsində narkotik maddə aşkarlanmayıb. İstanbul polisindən əlavə ediblər ki, məhkəmə-tibb ekspertizası dünyasını dəyişən biznesmenin qanında narkotik maddənin izlərini aşkarlamayıb. Şahidlər də bildiriblər ki, Nihad Əliyevin silahından açılan təsadüfi atəşin şahidi olublar”. İstanbul polisindən onu da bildiriblər ki, Nihad Əliyev yaralı halda xəstəxanaya aparılsa da, həkimlər onun həyatını xilas edə bilməyib: ”Polis faciəyə səbəb olan silahın mərhum biznesmenə məxsus olduğunu təsdiqləyib, onun silahı gəzdirmək üçün qanuni icazəsi də olub”.
KİV onu da iddia edirdi ki, həlak olan Nihad Əliyev SOCAR-da yüksək vəzifə tutur. Lakin SOCAR-dan bildiriblər ki, Nihad Əliyev heç vaxt bu şirkətdə işləməyib. Bu informasiyanı mərhumun ailə üzvləri də təsdiqləyib.
İstanbul polisinin verdiyi açıqlamada diqqət çəkən mühüm məqam iş adamının ölümünə səbəb olan silahın qanuni olması ilə bağlı fikirlərdir. Bu baxımdan da ortaya maraqlı suallar çıxır. Nihad Əliyev Azərbaycan vətəndaşıdırsa, onun Türkiyədə qanuni yolla sənədləşdirilmiş silahla gəzməyə icazəsi ola bilərdimi? Dünyasını dəyişən biznesmenin statusu ona silah gəzdirmək hüququnu tanıya bilərmi?
Uzun müddət polis orqanlarında çalışan hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Azərbaycan qanunvericiliyində ikili vətəndaşlıq yoxdur: “Yəni Azərbaycan vətəndaşı eyni zamanda başqa bir ölkənin vətəndaşlığını daşıyırsa, onda bu, cinayət məsuliyyəti yaradır. Bu da o anlama gəlir ki, Türkiyədə hoteldə ölən Nihad Əliyev yalnız bir ölkənin ona verdiyi vətəndaşlıq hüquqlarından istifadə edə bilərdi. Həmin şəxs Azərbaycan vətəndaşı olub. Bizim qanunvericiliyimizdə isə adi vətəndaşlara odlu silah gəzdirməklə bağlı icazə verilmir. İstisnanı yalnız ov tüfəngləri təşkil edir. Bu qəbildən olan silahın da verilməsi ilə bağlı qanunvericiliyin qoyduğu tələblər mövcuddur. Ortada Azərbaycan vətəndaşının Türkiyədə silah gəzdirməsi faktı var və Türkiyə polisi bunu təsdiq edir. Bu da çox qaranlıq məsələdir. Azərbaycan vətəndaşı olan şəxs müxtəlif statuslarla Türkiyədə yaşaya bilər. Bu o anlama gəlmir ki, həmin şəxs Türkiyə dövlətinin vətəndaşlarına verdiyi bütün hüquqlardan istifadə edə bilər. Silahla bağlı məsələ də bura şamil olunur. Belə hüquq bizim vətəndaşa şamil oluna bilməz. Hüquqi məntiq bunu deyir ki, istənilən Azərbaycan vətəndaşının Türkiyədə silahla gəzməsi qanuna ziddir. Belə hüquq yalnız Türkiyə vətəndaşına şamil edilə bilər”.
Ekspertin sözlərinə görə, istintaq getdiyi üçün hadisənin digər detallarına ətraflı toxunmaq doğru olmazdı: “Prosessual normalara uyğun gedən istintaqda bütün suallara aydınlıq gətiriləcək”.
“Bakı-Xəbər”
