Azərbaycanda mənzil tikintisi ilə məşğul olan çoxsaylı tikinti şirkəti fəaliyyət göstərir. Özü də mənzil-tikinti kooperativlərinin, demək olar, hamısı gəlirlə işləyir. Pandemiya olsa da, mənzillərin qiyməti ucuzlaşmayıb, əksinə, artıb. Bütün bunlara baxmayaraq, tikinti şirkətləri sosial məsuliyyət prinsipindən çıxış edərək, humanitar xarakterli tədbirlərdə fəal iştirak etmirlər. Hər şeyi dövlətin üzərinə qoymaq istəyirlər.
Məsələ ondadır ki, tikinti şirkətləri sosial məsuliyyət prinsipindən çıxış edərək, 44 günlük müharibədə evini itirən mülki şəxslərə, şəhid ailələrinə və qazilərə öz hesablarına mənzil hədiyyə etmirlər. Halbuki, sözügedən şirkətlərin bir neçə mənzil hədiyyə etməyə imkanı var. Məsələn, bu günlərdə dövlət Gəncədə raket zərbələrindən evini itirən 68 vətəndaşı yeni mənzillə təmin etdi. Demirik ki, bütün şəhid ailələrini MTK-lar öz vəsaitləri hesabına mənzillə təmin etsinlər. Təbii ki, bu mümkün deyil və məcburi olaraq özəl təşkilatlardan bunu tələb etmək olmaz. Sadəcə, bununla bağlı müəyyən qədər dövlətə yardımçı olub, bu kateqoriyadan olan bir neçə şəxsi evlə təmin edə bilərlər, amma bunu etmirlər. 5 aya yaxındır müharibə qurtarıb, amma MTK-lar bu yöndə hansısa sosial xarakterli aksiya həyata keçirmirlər.
Maraqlıdır, MTK-lar niyə bunu etmirlər?
“Onları ancaq mənzili dəyərindən qat-qat baha satıb milyonlar qazanmaq düşündürür”
Məsələyə münasibət bildirən AMİP funksioneri Əli Orucov bunu bir sıra amillərlə əlaqələndirdi: “Problem ondadır ki, bu gün tikinti fəaliyyəti ilə məşğul olan şirkətləri bu kimi məsələlər maraqlandırmır. Onları ancaq mənzili dəyərindən qat-qat baha satıb milyonlar qazanmaq düşündürür. MTK-lar sosial məsuliyyət anlayışından, ümumiyyətlə, uzaqdırlar. Halbuki, Vətən müharibəsində canından keçmiş şəhidlərin ailələrinə, əlini, qolunu itirmiş qazilərimizə qayğı göstərmək hamının borcudur. O cümlədən, hər il mənzil tikintisindən və satışından milyonlar qazanan MTK-lar da bunu etməlidirlər. Təəssüflər olsun ki, biz bunu görmürük. Bu gün nə qədər müharibə iştirakçısı var ki, mənzil şəraiti çox pisdir. Bəziləri olduqca acınacaqlı vəziyyətdə yaşayırlar. Heç olmasa daha pis vəziyyətdə yaşayan müharibə iştirakçılarına kömək etsinlər. Rayonlarda yaşayan və mənzili olmayan qazilərə ev tikə bilərlər. Onlar Bakıda ev satışından pul qazananda Vətən oğulları döyüşdə canından, sağlamlığından keçiblər. Böyük ərazilər işğaldan azad edilib. Həmin ərazilərin bərpası zamanı MTK-lar podratçı təşkilat olaraq milyonlar qazanacaqlar. Söhbət bərpa işləri çərçivəsində dövlət sifarişi ilə maliyyələşəcək layihələrdən gedir. Çox təəssüflər olsun ki, pula olan hərislik MTK-ları sosial məsuliyyət məfhumundan, ümumiyyətlə, uzaq salıb. Hesab edirəm ki, bu çox zərərli tendensiyadır. Bütün yükü dövlətin üzərinə qoymaq doğru deyil. MTK-lar bu işə qoşulsa, o zaman müharibə iştirakçılarının mənzil problemi daha tez həll oluna bilər”.
Partiya funksioneri hesab edir ki, MTK-lar heç olmasa bundan sonra bu yöndə təşəbbüs göstərməlidirlər.
Vidadi ORDAHALLI
