Məlum olduğu kimi, koronavirus pandemiyası səbəbindən təhsil müəssisələri fəaliyyətini əsasən dayandırıb. Hazırda onlayn tədrisə önəm verilir. İstər ali, istərsə də orta ümumtəhsil müəssisələrində dərslər onlayn formada keçirilir. Bununla yanaşı, orta ümumtəhsil məktəblərində qismən əvvəlki formada dərslər tədris olunur. Ancaq pandemiya səbəbindən tez-tez məktəblər fəaliyyətini dayandırır.
Lakin problem ondadır ki, Bakıətrafı kənd və qəsəbələrin çoxunda heç də hamının ev telefonu yoxdur. Məsələn, Maştağanın Daş karxanası, Gülçülük massivində yaşayanların çoxu telefon çəkə bilmir. Sakinlər deyirlər ki, məlum vəziyyətlə əlaqədar telefon çəkilməsi ilə bağlı müraciət etsələr də, baxan yoxdur. Hər dəfə deyirlər ki, telefon xəttində olan paylayıcı şitdə yer yoxdur. Bu səbəbdən bir sıra ailələrdə şagirdlər onlayn dərsə qoşula bilmirlər.
Elşən Əhədov: “Bizim elə imkanımız yoxdur ki, meqabayt hesabına uşaqlarımız dərsə qoşulsun”
Gülçülük sakini Elşən Əhədovun sözlərinə görə, massivdə yaşayanlar əvvəl ev telefonu çəkilməsinə elə də həvəs göstərmirdilər: “Çünki indi hərənin əlində bir telefon var. Elə ailə var ki, 5 nəfərdən ibarətdir və onların hər birinin mobil telefonu var. Bir sıra hallarda mobil telefonlar üzərindən internetə qoşulurdular. Ancaq pandemiya və bu səbəbdən tətbiq edilən məhdudiyyətlər vəziyyəti tamam dəyişdi. Dərslərin onlayn qaydada keçirilməsi səbəbindən telefon çəkmək istəyənlərin sayı kəskin artıb. Burada yaşayanların çoxu kasıb adamlardır. Yəni əksəriyyəti günəmuzd işləyənlərdir. Bizim elə imkanımız yoxdur ki, meqabayt hesabına uşaqlarımız dərsə qoşulsun. Zatən, bizdə internet mobil tariflər çox bahadır. Bəzən 5 qonşu bir internetdən istifadə etmək məcburiyyətində qalır. Bu zaman internetin sürəti aşağı düşür. Heç bizə ümid verən də yoxdur ki, bu problem nə zaman öz həllini tapacaq. Hər dəfə deyirik, deyirlər paylayıcı şitdə yer yoxdur. Pandemiyanın da nə zaman bitəcəyi bəlli deyil. Belə getsə, növbəti tədris ilində də dərslər onlayn qaydada keçiriləcək. O zaman biz nə etməliyik? İnternetin olmaması səbəbindən bir çoxunun uşağı təhsildən kənar qalıb. Eləsi var rayondan ailəvi olaraq bura köçüb və kirayədə yaşayır. Bu çox ürəkağrıdıcı mənzərədir. Belə çətinliklər təkcə bizdə mövcud deyil. Daş karxanasında, Ramana südçülük sovxozunda da oxşar vəziyyət hökm sürür. O üzdən, bizim yeganə istəyimiz telefon probleminin həlli ilə bağlıdır”.
Məsələ ilə əlaqədar Sabunçu Rayon Telefon Qovşağı ilə əlaqə saxlasaq da, sözügedən problemə aydınlıq gətirən olmadı.
Rəsul Cahangirli: “İnternet təminatı ilə bağlı digər alternativ vasitələr də tapılmalıdır”
Ekspert Rəsul Cahangirli hesab edir ki, problemin həllinə kompleks yanaşma olmalıdır: “Reallıq ondan ibarətdir ki, pandemiya bütün dünyada olduğu kimi, Azərbaycanda da yeni vəziyyət yaradıb. Ona görə də bu vəziyyətə uyğun olaraq addımlar atılmalıdır. Söhbət ondan gedir ki, Nəqliyyat, Rabitə və Yüksək Texnologiyalar Nazirliyi vəziyyəti nəzərə alıb telefon çəkilişi ilə bağlı kompleks proqram hazırlamalıdır. Ehtiyac olan qəsəbə və kəndlərdə telefon çəkilişi genişləndirilməlidir. Yoxsa, əhalini taleyin ümidinə buraxmaq olmaz. Harada telefon çəkilişinə ehtiyac varsa, ora telefon çəkilməlidir. Çünki həqiqətən də pandemiyadan sonra ətraf kənd və qəsəbələrdə internetə tələbat xeyli artıb. İnternet təminatı ilə bağlı digər alternativ vasitələr də tapılmalıdır”.
Ekspert onu da qeyd etdi ki, sözügedən problemin həlli vacibdir.
Vidadi ORDAHALLI
