Ölkəmizə turist kimi gələn ərəblərin bütün etik və hüquqi sərhədləri aşan son davranışları ciddi ictimai narazılıq yaradıb. Xüsusən də nəsli tükənməkdə olan və “Qırmızı kitab”a daxil olan quş növlərini ovladıqdan sonra onların fotolarını sosial şəbəkələrdə yaymaları həm narazılığa, həm də yeni iddiaların meydana çıxmasına səbəb olub.
Ərəblərin adı “Qırmızı kitab”a düşən və nadir növ olan və ölkəmizdə sayının cəmi 200 cüt olduğu deyilən Qafqaz durnasını ovlaması bir sıra iddiaların meydana çıxmasına rəvac verib. Belə iddialar səslənir ki, qanunsuz ovla məşğul olan şəxslər, həm xaricilər, həm yerli turistlər bunun üçün ya qoruq rəhbərlərinə, ya yerli icra orqanlarının məsul şəxslərinə pul ödəyirlər və ödədikləri rüşvətin müqabilində isə gen-bol ovçuluq edirlər. İddiaçılar hesab edirlər ki, bu belə olmasa, Azərbaycanın xüsusi mühafizə edilən qoruqlarda ərəblər, yaxud başqaları bu cür özbaşınalıqlar edə bilməzlər.
Bu iddiada olanlar deyirlər ki, hansısa bir zooloq, bioloq və sair aidiyyəti sahələr üzrə mütəxəssislər o qoruqlara tədqiqat məqsədilə daxil olmaq üçün min bir prosedurdan keçir, bəlkə 10 instansiyadan izacə almalı olurlar, amma ərəblər heç bir maneə olmadan bu kimi qanunsuz hərəkətlərə yol verirlər.
“...heyvanlara qarşı vəhşi davranışlara qarşıyam”
“Müasir İnkişaf” Birliyinin sədri Mübariz Göyüşlü baki-xeber.com-a bildirdi ki, bu, olduqca aktual mövzudur və baş verənlər cəmiyyəti ciddi şəkildə narahat edir: “Neçə gündür ki, cəmiyyətin, ictimaiyyətin bu məsələ ilə bağlı haqlı narazılığını eşidirik. Əlbəttə, mənim də baş verənlərə reaksiyam çox mənfidir və nəsli kəsilməkdə olan heyvanların, quşların bu şəkildə ovlanmasına, heyvanlara qarşı vəhşi davranışlara qarşıyam. Belə məsələlər yolverilməzdir və buna yol verənlər ciddi şəkildə cəzalandırılmalıdırlar. Mənə elə gəlir ki, ərəblərin ovu qadağan edilmiş və nəsli kəsilməkdə olan Qafqaz durnasını, yaxud başqa quş növlərini qanunsuz olaraq ovlaması faktı ilə bağlı əlaqədar qurumlar açıqlama verməli, münasibət bildirməlidirlər. Bu sahəyə məsul olan şəxslər açıqlama verməlidirlər ki, qoruqlarda nəsli kəsilməkdə olan quşların ərəblər tərəfindən ovlanmasına kim icazə verib, bu, qanuni, yoxsa qanunsuz ödəmələr müqabilində baş verib? İnanmıram ki, ərəblərin ov məsələsi qanunu icazə əsasında olub, burada qanunsuz addımların olduğu istisna deyil. Hesab edirəm ki, ərəblərə bu şəraiti yaradan vəzifəli şəxslər olub. Bu məsələ ətraflı şəkildə araşdırılmalı və bu qanunsuzluqda əli olan hər kəs cəzalandırılmalıdır. O cümlədən, iştirakları olubsa, Ekologiya və Təbii Sərvətlər Nazirliyinin aidiyyəti sahə üzrə əməkdaşları, yerli icra hakimiyyətinin məsul şəxsləri, bələdiyyələrin nümayəndələrinin çox ciddi şəkildə cəzalandırılmasını tələb edirəm”.
M.Göyüşlü hesab edir ki, burada söhbət təkcə ərəblərdən getmir, bütövlükdə, rüşvət müqabilində qanunsuz ov edən şəxslərdən və onlara şərait yaradan məsul şəxslərdən, səlahiyyət sahiblərindən gedir. “Söhbət qanunsuzluğa rüşvət müqabilində şərait yaradılmasından gedir. Rüşvəti azərbaycanlı da, rus da, ərəb də, ingilis də, alman da versə, bizim bəzi məmurlar bu qanunsuzluqlara şərait yaradacaqlar. Sözümün canı odur ki, bu işdə bir qanunsuzluq əməli varsa, onun üstünə gedilməlidir. Mənim niyyətim heç də qanunsuz ov edənlərə haqq, bəraət qazandırmaq deyil, onların hər biri mütləq şəkildə cəzalandırılmalıdır. Bu qanunsuzluğa icazə verən, şərait yaradan, onun baş verməsinə göz yuman məmurlar, səlahiyyətli şəxslər cəzalandırılmalıdırlar ki, bu, başqalarına dərs olsun. Azərbaycanlı məmur bu qanunsuzluqlara şərait yaratmasa, heç bir xarici ölkə vətəndaşı, yaxud öz vətəndaşlarımız qanunazidd addım atmazlar.
Burada bir başqa məsələ də diqqətimi çəkir. Nəsli kəsilməkdə olan müxtəlif heyvanların, quşların saxlandığı qoruqlarda xarici vətəndaşlarla yanaşı, öz vətəndaşlarımızın da qanunsuz ov etmələri ilə bağlı məlumatlar yayılır. Yəni belə görünür ki, bu qanunsuz proses daim baş verir, sadəcə, onlar mətbuata sızmadığı üçün cəmiyyət bundan xəbər tutmur, amma son hadisə ictimailəşdirildiyi üçün ona belə sərt reaksiya verildi.
Hesab edirəm ki, nəsli kəsilməkdə olan heyvanları qanunsuz olaraq ovlayan Azərbaycan oliqarxları da cəzalandırılmalıdırlar. Bu barədə bizim aidiyyəti qurumlar sərt tədbirlər görməlidirlər” - deyə M.Göyüşlü qeyd etdi.
İradə SARIYEVA
