Sabunçunun “4-cü mədən” adlanan yaşayış massivində yaşayan sakinlərin şikayəti var. Şikayət ondan ibarətdir ki, sözügedən ərazidə məişət tullantılarının axıdılması üçün kanalizasiya yoxdur. Bu da minlərlə sakinin yaşadığı massivdə bir sıra problemlər yaradır.
Faktiki olaraq, adıçəkilən yaşayış massivinin sakinləri uzun illərdir kanalizasiya xətlərinin olmamasından əziyyət çəkirlər. Problem həllini tapmadığı təqdirdə onlar üçün həyati təhlükənin olacağından narahatdırlar. Çünki koronavirus infeksiyasının hökm sürdüyü bir vaxtda mövcud vəziyyət həqiqətən də qəbuledilməzdir.
Bu gün Bakıətrafı qəsəbələrin yaşayış massivlərinin böyük hissəsində tullantı infrastrukturu, yəni kanalizasiya xətləri çəkilməyib. Həmin ərazilərdən biri də “4-cü mədən”dir.
Zakir Xalıqov: “Nədə olsa, burada kanalizasiya olmalıdır, ya yox?”
Adıçəkilən massivdə yaşayan Zakir Xalıqovun sözlərinə görə, bununla bağlı ciddi problemlər var: “Altı il əvvəl massivi sökmək istəyirdilər. Deyirdilər ki, ərazidə neft var. Sonra bu məsələyə baxan olmadı və bununla da söküntü təhlükəsi aradan qalxdı. Ötən illər ərzində burada xeyli ev tikilib. Düzdür, evlərin hamısının sənədi yoxdur. Kasıb adamlar bir təhər burada özlərinə ev tikiblər. Elə yer var ki, ev alqı-satqısı ilə məşğul olan maklerlər ev tikib, sonra onu camaata satıblar. Satmaq üçün tikilən evlər bir-birinə məsafə baxımından çox yaxındır. Ancaq nədə olsa, burada kanalizasiya olmalıdır, ya yox? Bir nəfər maraqlanmır ki, niyə problem həllini tapmır? Dəfələrlə burada yaşayanlar problemlə əlaqədar narahatlıqlarını bildiriblər, buna baxan yoxdur. Əlacsız qalmışıq”.
Bayram günü olduğundan, Sabunçu Rayon İcra Hakimiyyətinin problemə münasibətini öyrənmək mümkün olmadı.
Rəsul Cahangirli: “Bunun başlıca səbəbi evlərin plansız qaydada tikilməsidir”
Məsələyə münasibət bildirən ekspert Rəsul Cahangirlinin sözlərinə görə, Bakıətrafı ərazilərdə təkcə “4-cü mədən” adlanan massivdə deyil, digər yerlərdə də kanalizasiya problemi mövcuddur: “Bunun başlıca səbəbi evlərin plansız qaydada tikilməsidir. Çünki, adətən, birinci su və kanalizasiya xətləri çəkilməli, sonra isə evlər inşa edilməlidir. Problem ondadır ki, Bakıətrafı ərazilərdə evlər xaotik formada inşa edildiyinə görə bu qaydaların heç biri gözlənilməyib. İndi yaşayış evləri salınan bu cür yerlərdə kanalizasiya xətti çəkmək o qədər də asan deyil. Məsələnin bu tərəfi də var. Ancaq bu o demək deyil ki, həmin ərazilərdə kanalizasiya olmamalıdır. Hesab edirəm ki, məlum problemin həlli ilə bağlı xüsusi proqram hazırlanmalıdır. Bu kimi yaşayış massivlərinin su və kanalizasiya sistemi yenilənməlidir”.
Ekspert hesab edir ki, bütün bunlar həll edilməsə, həm bunun ciddi fəsadları olacaq, həm də daha böyük vəsaitlərin xərclənməsinə ehtiyac yaranacaq.
Vidadi ORDAHALLI
