Son illər Azərbaycanda turizmin inkişafı dövlətin xüsusi diqqətindədir. Xarici turistlərin ölkəmizə cəlb olunması istiqamətində müəyyən işlər həyata keçirilir. Danılmaz faktdır ki, koronavirus infeksiyası ortaya çıxana qədər dünyanın bir sıra ölkələri, o cümlədən Azərbaycan turizmi inkişaf dövrünü yaşayırdı.
Turizmin yenidən dirçəlməsi üçün bir sıra layihələr həyata keçirilir. Ancaq bununla yanaşı, turizm sahəsində hələ də bəzi problemlər mövcuddur. Belə ki, Dövlət Turizm Agentliyinin (DTA) yaydığı rüblük hesabatda, ölkəmizin ən məşhur turizm məkanlarından biri olan Naftalan şəhəri ərazisindəki bütün hotellərdəki vəziyyət diqqətdə saxlanılıb və bu məkanlardakı qiymətin bahalığı və xidmətlərin aşağı olması, turistlərin bu xidmətlərdən narazı qalması ilə bağlı kifayət qədər faktlar əks olunub.
Turistlər Naftalan şəhərində olan sağlamlıq mərkəzlərindən narazılıq edir. Turistlər həm xidmətin aşağı olmasından, həm də natəmizlikdən narazılıq edir.
Onu da qeyd edək ki, Naftalan şəhərindəki beşulduzlu hotellərin paketlərdə təqdim etdiyi bir günlük qiymət 200-230 manat təşkil edir. Bu göstərici “Mineralnıye Vodı” ərazisindəki müalicə sağlamlıq mərkəzlərindəki qiymətlərlə bərabər, Lıvov kurortlarının qiymətlərindən isə bahadır. Belə ki, Mineralnıye Vodı” ərazisində bir günlük istirahət üçün 200-260 manat, Lıvov kurortlarında isə 190-250 manat təşkil edir.
“Naftalan şəhərində olan beşulduzlu və dördulduzlu otellərdən şikayətlər var, bunun səbəbi isə turistlərə aşağı səviyyəli xidmətin göstərilməsidir”
Turizm sahəsi üzrə ekspert Elçin Rüstəm deyir ki, bütün istirahət mərkəzləri gigiyenik qaydalara əməl etməlidir. Xüsusi ilə də koronavirus infeksiyasının olduğu bir dönəmdə: “Naftalan şəhərində olan beşulduzlu və dördulduzlu otellərdən şikayətlər var. Bunun səbəbi isə turistlərə aşağı səviyyəli xidmətin göstərilməsi, eyni zamanda, internet təminatının arzuolunan səviyyədə olmaması ilə bağlıdır. Ümumiyyətlə, internet təminatı regionlar üçün səciyyəvi problem olduğuna görə, provayderlər qiymətindən asılı olmayaraq, yüksək sürətli internet təqdim etmirlər. Bu da turistlərin narazılığına səbəb olur.
Həmçinin, hotellərin əsas problemi təmizliklə bağlıdır. Turistlər əsasən otaqların günaşırı təmizlənməməsindən və ağların, dəsmalların iki gündən bir dəyişməməsindən şikayət edir”.
Günel CƏLİLOVA
