Respublikada tətbiq olunan karantin qaydalarına əməl olunmaqla Masallı Rayon R.Tağıyev adına Tarix-Diyarşünaslıq Muzeyində qarşıdan gələn xonçalı Novruz bayramı münasibətilə “Zəfər müjdəli bahar” mövzusunda onlayn tədbir keçirildi. Tədbirdə muzeyin əməkdaşları və rayonun Qızılavar kənd tam orta məktəbinin müəllim və şagird kollektivi iştirak edirdi.
İkinci Qarabağ müharibəsində torpaqlarımız uğrunda şəhid olan Vətən övladların xatirəsini bir dəqiqəlik sükutla yad etdikdən sonra muzeyin direktoru, Əməkdar mədəniyyət işçisi Əntiqə Tağıyeva Novruz bayramının tarixi və ənənələri barədə, çərşənbələr və bayram günü icra olunan bir sıra unudulmuş ayin, mərasimlər haqında ətraflı danışdı. Onu da bildirdi ki, bu ilki Novruz bayramı xalqımız üçün əlamətdar olan mühüm tarixi günlərə bağlıdır. Fəqət, Qarabağda qazanılan şanlı zəfərimiz qəlbimizdə yer etmiş vətən nisgilini bahar təravətli nikbinlik və qürurla əvəz edib.
Əntiqə Tağıyeva axırda bahara zəfər ovqatı qatan şəhidlərin müqəddəs ruhuna ehtiram əlaməti olaraq, onların valideynlərini bayram münasibətilə təbrik etdi .
Muzeyin elmi işçisi Dilgüşə Məmmədova isə Novruz adət-ənənələrinin qorunması, gələcək nəsillərə ötürülməsi və təbliği işində gənclərin rolunun əhəmiyyətindən söz açdı. Bayram tədbirinə qatılan Qızılavar kənd tam orta məktəbi şagirdlərinin ifasında Novruzu vəsf edən bayatılar və şeir nümunələri səsləndi. Muzeyin ekspozisiya zalında təşkil olunan virtual bahar sərgisi ilə tanışlıq da tədbir iştirakçıların ürəyindən xəbər verdi.
Zəfər ORUCOĞLU Azərbaycan Jurnalistlər Birliyinin üzvü
