Şanlı Ordumuzun 44 gündə zəfərlə bitirdiyi Vətən müharibəsində Qarabağ torpaqlarının erməni işğalından azad edilməsində xüsusi qəhrəmanlıq göstərən igidlərdən biri də 1996-cı ildə Lənkəran rayonunun Osakücə kəndində dünyaya göz açan Qardaşxan Elxan oğlu Əhmədlidir. O 6 yaşına çatanda ata-anası ilə birgə Bakı şəhərinə köçürlər.
Ən şirin, ən ülvi duyğularla yetkinlik yaşına çatır Qardaşxan. Vətənə sonsuz məhəbbət, insanlara sevgi onun həyat kredosuna dönür. Sağlam əqidəli, xalqına, dövlətinə sədaqətli bir oğul kimi 2015-ci ildə həqiqi hərbi xidmətdə olur. Ürəyinin istəyini əsas götürərək ön cəbhədə Vətəninin keşiyində durur.
Qardaşxan Aprel döyüşlərində sözün əsl mənasında düşmənə qarşı cəngavərtək döyüşüb, qəhrəmanlıq tariximizdə özünə yer edir. Ən böyük arzusu da, hər şeydən əvvəl, erməni dığalarına əsir düşən əzəli yurd yerimiz Qarabağı azad görmək olur.
Əsgərlik həyatını başa vuran elin ləyaqətli oğlu yaxşı işlər görür, xeyirxahlıq edir, Vətənini, xalqını sevən əsl vətənpərvər bir insan kimi tanınır, cəmiyyət arasında adı hörmətlə çəkilir.
İkinci Qarabağ müharibəsi başlananda Qardaşxanın qəlbində 30 il Azərbaycan torpaqlarını zəbt etmiş erməni dığalarına qarşı nifrət bir daha artır. Odur ki, özündə tükənməz qüvvə hiss etməklə ilk gündən müharibə meydanına atılır. Qardaşxanın qəhrəmanlıq yolu Füzulidən başlayır. Vətən sevgisini hər şeydən uca bilən Qardaşxanın Qarabağ uğrunda bütün haqq savaşları uğurlu alınır. Dığaları əzə-əzə inamla şanlı zəfərimizə doğru gedir. Daha sonra Ağdam, Murovdağ istiqamətində gedən ağır müharibədə hünər göstərir. Düşmənə sarsıdıcı zərbələr endirir, yaralı əsgər yoldaşlarını döyüş meydanından çıxarır. Yurdun yağı tapdağından qurtulmasına son döyüşdə, yəni noyabr ayının 7-dən 8-nə keçən gecə Xocavənddə ölümün gözünə dik baxa-baxa qəhrəmancasına torpaq uğrunda əbədi gözlərini yummaqla vətənləşir. Və müqəddəsliyinə tapındığı Ana torpaq Binə qəsəbəsində yerləşən Şəhidlər xiyabanında öz igid oğlunu bağrına basır.
Qardaşxan evli idi. Ondan Nişana adında qız övladı xalqımıza nişanə qaldı. “Vətən uğrunda”, “Xocavəndin azad olunmasına görə” aldığı medallar isə dövlətin igid əsgər Qardaşxanın İkinci Qarabağ müharibəsində göstərdiyi qəhrəmanlığına ən dəyərli qiymətidir.
Zəfər ORUCOĞLU Azərbaycan Jurnalistlər Birliyinin üzvü
