Hər gün ictimai nəqliyyatdan istifadə edənlərə məlumdur ki, pik saatlarında avtobusa minmək üçün əməlli-başlı mübarizə aparmaq lazımdır. Hətta bəzən bunu bacarmaq mümkün olmur. Səbəbi isə çox sadədir: avtobusa minmək istəyənlərin sayı çoxdur, amma avtobus azdır. Bunun nəticəsində səhər işə gecikənlər, işdən çıxanda evə gec çatan insanlar üçün belə şeylər də əlavə gərginliyə səbəb olur.
Burada adamın ağlına bir sual gəlir: pik saatlarında intervallar qısaldıla və ya xəttə əlavə avtobus buraxıla bilərmi? Çünki günorta saatlarında sərnişin avtobuslarının əksəriyyəti, demək olar ki, boş gedib, boş gəlir.
Onu da nəzərə almaq lazımdır ki, koronavirus infeksiyasının tüğyan etdiyi bir dövrdə marşrut sayının az olması düzgün deyil. Çünki evdən işə, işdən evə tələsənlər məcbur olub insanlarla dolu avtobusa minirlər. Bu da virusa yoluxma risqini artırır.
Bu hal daha çox Bakıətrafı ərazilərə hərəkət edən marşrutlarda özünü göstərir. Xüsusilə də 31, 107, 186, 216, 139 saylı marşrutlarda ciddi sərnişin sıxlığı müşahidə edilir. Sərnişin sıxlığını azaltmaq üçün xəttə buraxılacaq nəqliyyat vasitələrinin sayı artırılmalıdır.
Mayis Əliyev: “Elə marşrutlar var ki, orada, ümumiyyətlə, avtobusların sayı belə çatmır”
Sosial sahə üzrə ekspert Mayis Əliyev bildirdi ki, beynəlxalq təcrübədə belədir ki, pik saatlarda daha çox avtobus xəttə buraxılır: "Sərnişinləri vaxtlı-vaxtında daşımaq üçün buna əməl edirlər. İctimai nəqliyyatda insan sıxlığı olmaması üçün, digər tərəfdən, insanların dərsə, işə gecikməməsi üçün bu, vacib məsələdir. Bu, mərkəzləşdirilmiş şəkildə həyata keçirilən bir təcrübədir, işdir. Burada olduqca vacib məsələlərdən biri də əlaqələndirmə işləridir. Bizdə bilirsiniz ki, sərnişindaşıma ilə bir neçə şirkət məşğul olur. Yalnız "BakuBus" MMC-də xəttə buraxılan avtobusların sayını artırmaq mümkündür. Çünki bu şirkətdə əlaqələndirmə işləri yüksək səviyyədə təmin olunur. Digər şirkətlərdə müəyyən edilmiş bir qrafik var, həmin qrafik üzrə avtobuslar xəttə buraxılır. Elə marşrutlar var ki, orada, ümumiyyətlə, avtobusların sayı belə çatmır. Mən hesab edirəm ki, bu avtobusların qrafiki məsələsində Bakı Nəqliyyat Agentliyinin (BNA) üzərinə böyük iş düşür”.
Ərşad Hüseynov: “Sürücülərin məsuliyyətsizliyi, pik saatlarda gecikmələr, avtobusların qrafikdən kənara çıxması adi hallardır”
Ekspert Ərşad Hüseynov bildirdi ki, Prezident İlham Əliyev yol-nəqliyyat infrastrukturunun, sərnişindaşımanın müasir tələblərə cavab verməsi üçün mühüm qərarlar qəbul edib, böyük vəsait ayırıb və davamlı ciddi tapşırıqlar verib. Amma bu işin həvalə olunduğu Bakı Nəqliyyat Agentliyinin fəaliyyətində hələ də ətalət, çatışmazlıqlar qalmaqdadır: “Məlumdur ki, metro bağlı olduğu üçün Bakıda sərnişindaşıma yerüstü nəqliyyatın üzərinə düşüb. Hələ bəzi məhdudiyyətlər olduğu üçün vətəndaşlar marşrut avtobuslarından o qədər də çox yararlanmırlar. Yəni hələ həyat tam öz axarına düşmədiyi halda belə avtobuslarda sıxlıq müşahidə olunur, tıxaclar yaranır. Sürücülərin məsuliyyətsizliyi, pik saatlarda gecikmələr, avtobusların qrafikdən kənara çıxması adi hallardır. Bütün bunlar tədricən aradan qaldırılmalı idi. Ancaq hələ də bunu görmürük. Səbəb odur ki problemlər köklü həll olunmur, hətta bəzən ortaya fantastik iddialar qoyulur, hansı ki, həyata keçirilməsi qeyri-mümkündür. Yanlış qərarlar qəbul edilir. Bir halda ki, dövlət adından bu işlər həmin quruma tapşırılıb, o sahədə hansı problemlər varsa, ən qısa müddətdə təhlil olunub həllini tapmalı idi. Ancaq görünən mənzərə tam başqadır”.
Günel CƏLİLOVA
