Dünyada koronavirus pandemiyasının üçüncü dalğası kimi qiymətləndirilən Britaniya ştammı daha sürətlə yayılan, daha ağır keçirilən və daha çox öldürücülük təsiri olan koronavirus növü sayılır.
Azərbaycanda koronavirusun yeni növü olan Britaniya ştammına yoluxanlar var və son məlumatlara görə, üç nəfər koronavirusun bu ağır növünə yoluxub.
Britaniya ştammının fərqli xüsusiyyətləri, göstəriciləri nədir, koronavirusun indiyə qədər məlum olan növlərindən hansı əlamətlərinə görə seçilir və təhlükəli cəhətləri hansılardır?
Bəzi ekpertlərə görə, Britianiya ştammının yoluxduruculuq qabiliyyəti daha yüksəkdir və hətta uşaqları belə yaxalaya bilər, onlar bu virusu daha ağır keçirə bilərlər.
“Britaniya ştammına yoluxan 1 adam eyni zamanda 30 nəfəri yoluxdura bilər”
“Sağlamlığa Xidmət” İctimai Birliyinin icraçı direktoru Pərvanə Vəliyeva “Bakı-Xəbər”ə bildirdi ki, Britaniya ştammını koronavirusun başqa növlərindən fərqləndirən cəhət var: “Britaniya ştammı onunla fərqlənir ki, bu ştamm dəfələrlə artıq sürətlə yoluxma qabiliyyətinə malikdir. Əvvəlki virusla tutaq ki, həndəsi silsilə ilə bir nəfər 10 nəfəri yoluxdururdusa, Britaniya ştammına yoluxan 1 adam 30 nəfəri yoluxdura bilər. Yəni əvvəlki virusla bunu müqayisə etsək, bu cür anlaşılar. Britaniya ştammı, qeyd olunduğu kimi, Portuqaliyada, İsveçdə, Avropanın digər ölkələrində çox yayılıb, Türkiyədə də iki ay əvvəl tapılmışdı. Türkiyə vasitəsilə tranzit yolla İngiltərədən gələnlər var idi. Türkiyə ilə Azərbaycan arasında da əlaqə var və bu yolla sərhədi keçən şəxslər ölkəmizə bu ştammı gətirə bilmiş olar deyə düşünürəm. Ancaq ÜST-ün məlumatlarına istinad etsək, bu Britaniya ştammının əvvəlki “COVID-19”dan ölüm halları və yaxud ağırlaşma hallarına daha kəskin səbəb olduğu görünmür. Hazırda onun ağırlaşma verməsi, ölümə yol açması, əvvəlki virusla eyni səviyyədə olduğu qeyd edilir. Digər ştammlar da var. Braziliya ştammı, Cənubi Afrika ştammı da var. Onlar da Britaniya ştammı kimi daha sürətlə yayılma və yoluxma qabiliyyətinə malikdirlər”.
P.Vəliyevanın qeyd etdiyinə görə, Britaniya ştammının bütün Avropanı bürüyəcəyi proqnozlaşdırılırmış: “Biz bunu hazırda hiss edirik, artıq o yayılıb. Bu prosesdə peyvəndləmənin çox böyük rolu olacaq, çünki müəyyən qədər o ştammların, ağırlaşmaların qarşısını alacaq və s. Məsələn, peyvənd olunmuş şəxs Britaniya ştammı ilə kontaktda olarsa, yüngül keçirə bilər. Ona görə də maksimum dərəcədə peyvəndlənmə, peyvəndlərin istehsalı və lazım olan qədər peyvəndin ölkələrə daşınması, paylanması prosesi sürətləndirilməlidir” - deyə P.Vəliyeva vurğuladı.
İradə SARIYEVA
