Novruz bayramı ilə əlaqədar olaraq Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC tərəfindən “Kənddən şəhərə” yarmarkaları təşkil olunub. Ancaq yarmarkalarda aşağı qiymətə satılan ətin qiyməti ilə bağlı birmənalı fikir yoxdur. Bununla bağlı müəyyən şübhələr var.
Belə məlumatlar var ki, yarmarkalarda satılan heyvan əti yüksək keyfiyyət standartlarına uyğun deyil. Çünki yaşlı heyvanlar kəsimə verilir və yarmarkaya onların əti gətirilir. O cümlədən, hər hansı səbəbdən qüsurlu olan heyvanların əti birbaşa yarmarkaya çıxarılır. Bələdiyyə sədrləri, yerli icra nümayəndələrinin tapşırığı ilə qocalmış, şikəst olmuş heyvanlar əhalidən ucuz qiymətə alınır, onların kəsimi həyata keçirilir. Hətta bir neçə bala doğmuş qoyunların da kəsilərək yarmarkaya çıxarılması barədə fikirər səslənir. İddia olunur ki, məhz bu səbəbdən yarmarkalarda satılan ətin qiyməti bazardakı ətin qiyməti ilə müqayisədə ucuzdur.
Maraqlıdır, yarmarkalarda satılan ətin qiyməti ilə bağlı bu cür fikirlərin nə dərəcədə əsası var?
Aysel Fərziyeva: “Yalnız müvafiq yoxlamalardan sonra məhsul satışa buraxılır”
Məsələyə münasibət bildirən Azərbaycan Qida Təhlükəsizliyi Agentliyinin İctimaiyyətlə əlaqələr sektorunun müdiri Aysel Fərziyevanın sözlərinə görə, sözügedən yarmarkaları Kənd Təsərrüfatı Nazirliyi təşkil edir: “Onlarda yarmarkalarda satılan ətin mənşəyi barədə məlumat var. Ancaq bu cür məlumatların elə bir əsası yoxdur. Ona görə əsası yoxdur ki, məhsullar yoxlanılır. Yəni AQTA tərəfindən məhsullar yoxlanılır, sonra satışa çıxarılır. Yalnız müvafiq yoxlamalardan sonra məhsul satışa buraxılır”.
Məsələ ilə əlaqədar Kənd Təsərrüfatı Nazirliyinin mövqeyini öyrənmək mümkün olmadı.
Rəsul Cahangirli: “Yarmarkalarda satılan ətin keyfiyyətinə nəzarət artırılmalıdır”
Ekspert Rəsul Cahangirli isə hesab edir ki, bu kimi informasiyaların nə dərəcədə həqiqət olduğunu yoxlamaq lazımdır: “Dedi-qodudur, əsası yoxdur deyib üstündən keçmək də doğru olmaz. Xüsusən də keçirilən yarmarkalarda ət alan sakinlərin rəyini öyrənmək lazımdır ki, ətin keyfiyyəti necədir. Çünki, istər-istəməz, orada satılan ətin ucuz olması müəyyən söz-söhbətlərə səbəb olur. Doğrudan da yaşlı heyvanın əti satışa çıxarılırsa, bunu müəyyən etmək elə də çətin deyil. Çünki yaşlı heyvanın əti gec bişir, dadı fərqli olur və s. Müəyyən işbazlar bu amildən öz məqsədləri üçün istifadə edə bilər. Ona görə də bu kimi informasiyalar yoxlanılmalıdır. Zərurət varsa, o zaman yarmarkalarda satılan ətin keyfiyyətinə nəzarət artırılmalıdır”.
Ekspert onu da qeyd etdi ki, hər halda, müvafiq qurumlar daha diqqətli olmalıdırlar.
Vidadi ORDAHALLI
