Dünyada və onun bir parçası olan Azərbaycanda COVID-19 virusu ilə mübarizə davam edir. Bu pandemiyaya qarşı bir neçə şirkət tərəfindən vaksin hazırlansa da, vaksinasiya prosesi böyük sürətlə davam etsə də, yoluxma sayında artım davam edir. Azərbaycanda hazırda koronavirusa yoluxma sayı ötən həftələrlə müqayisədə artıb.
Bu arada dünyada pandemiyanın 3-cü dalğasının yayılması ehtimalı xeyli güclənib. Buna səbəb Britaniya ştammının yayılma təhlükəsidir. Çünki koronavirusun Britaniya ştammı daha təhlükəli, sürətlə yayılan, ağır keçirilən sayılır. Avropada bir çox ölkə üçüncü dəfə qapanmaya məhz Britaniya ştammının yayılmasının qarşısını almaq məqsədilə gedib. Bununla belə, martın 19-da Nazirlər Kabineti yanında Operativ Qərargahın brifinqi gözlənir. Brifinqdə qəbul edilən sərt qərarlar barədə açıqlama veriləcəyi ehtimal edilir. Buna səbəb kimi isə Azərbaycanda koronavirusun yeni növü olan Britaniya ştammının tapılması ehtimalı qeyd edilir. Qarşıdakı Novruz bayramı ilə əlaqədar Azərbaycanda 9 gün tətil olacaq. Bununla əlaqədar olaraq isə bir çoxu regionlara getməyi planlaşdırır. Bu da, öz növbəsində, pandemiyanın və ən təhlükəli olan Britaniya ştammının yayılmasına, ölkədə acınacaqlı vəziyyətin yaranmasına səbəb ola bilər. Bunun qarşısını almaq üçün preventiv tədbirlərin görülməsi qaçılmaz zərurətə çevrilir.
Bütün bunların fonunda, sərt karantin qaydaları təxminən neçə müddət qüvvədə qalsa pandemiyanın 3-cü dalğasından salamat çıxa bilərik?
“İnsanların immun sistemini gücləndirmək lazımdır və qida məhsulları keyfiyyətli olmalıdır”
Məsələyə münasibət bildirən tanınmış həkim Aydın Əliyevin sözlərinə görə, çox şey əhalinin virusdan qorunmaq üçün qaydalara nə cür əməl edəcəyindən asılı olacaq: “Əhali virusdan qorunmaq üçün qaydalara əməl edəcəksə, o zaman pandemiyanın 3-cü dalğasından daha tez xilas olmaq mümkündür. Buna əlverişli şərait yaranacaq. Nəticədə sərtləşdirilmiş karantin qaydaları daha tez aradan qaldırılıacaq. Hökumət insanların sağlamlığını qorumaqdan ötrü bu cür qərarlar verir. Ancaq bir şeyi unutmaq olmaz ki, psixoloji mühit bəzən virusdan da qorxulu olur. Novruz bayramı yüzillərdir qeyd edilir. Əhali qaydalara son dərəcə ciddi əməl etməlidir. Qaydalara əməl edəcəklərsə, o zaman bu kimi tədbirlərin görülməsinə ehtiyac qalmaz. Qaydalara ciddi riayət edilmədiyi üçün bu kimi addımlar atılır. Problem ondadır ki, bəzən insanlar elementar qaydalara belə əməl etmirlər. Nəticədə virusun daha çox yayılmasına zəmin yaranır. Üstəlik, yaz ayında tikinti işləri artır. Bu da, istər-istəməz, əhalinin fəallığına və təmasların artmasına təsir edir. Ona görə də bütün bu amillər nəzərə alınmalıdır. Eyni zamanda, insanların immun sistemini gücləndirmək lazımdır. Qida məhsulları keyfiyyətli və yerli olmalıdır. Ən azından, kartof, soğan, ət, kök və s. yerli məhsul olmalıdır. Yoxsa, xaricdən keyfiyyətsiz məhsulların gətirilməsi ilə bu problemi həll etmək mümkün olmayacaq”.
Həkim bir daha qeyd etdi ki, əhali özünü qorumağa çalışmalıdır.
Vidadi ORDAHALLI
