Vətən torpağında uğrunda can verən neçə-neçə qəhrəmanın torpağa qarışan cismindən şərəf, ləyaqət, qəhrəmanlıq, şücaət toxumu cücərir. Göz yaşı səhər şehi, həsrətli dualar isə bahar mehi olur şəhid məzarlarına.
Bir məzarın üzərində qürurla dalğalanan bayraq. O bayraq ki, şəhidin tabutu üzərində göz oxşadı. O bayraq ki, anaların, övladların göz yaşı ilə islandı. İndi neçə göz bayrağı həsrətlə seyr edir, torpağı sevdiyi kimi əzizləyir. Axı o bayraq uğrunda canından can ayrılıb,axı o torpaqda sevdiyi əbədi uyuyub. Şəhid dərdi çəkənlər açan çiçəklərdən şəhid qoxusun duyurlar. Ömrünün ən gözəl çağında vətən uğrunda solan qönçə ömürlər həyatın hər anında yer alırlar.
Maralın aldığı hər nəfəsdə Seymur can tapır. Heç bilmirəm bu sevgini hansı sözlərlə izah edim. Sevgilərinin təməli 27 sentyabr 2009-cu ildə atılan bu cütlük həyatın hər çətinliyinə birlikdə sinə gəlirdilər. Seymurla birgə həyata başladığı gün hərbçi yarının hansı çətinliyə sinə gəlməli olduğunu yaxşı bilirdi Maral. Ancaq hər çətinliyin sonunda hədiyyəsi olan bir təbəssümlə sevgilərin ən gözəlini yaşayırdı. Sevgi dolu ailə gün keçdikcə qol-budaq atırdı. Əvvəlcə qız övladları Sevincin sevincini yaşayan Seymur və Maral sonra Nihadın gətirdiyi xoşbəxtliyə qərq oldular. Bir zamanlar öz gəlişi ilə ata - anasına sevinc yaşadan Seymur özü övlad sevincinə qərq olmuşdu.
Cabbarov Seymur İlham oğlu 16 mart 1987-ci ildə Naxçıvan Muxtar Respublikasının Şərur rayonunun Çərçiboğan kəndində dünyaya göz açmışdı. Orta təhsilini 1993- 2001-ci illərdə Ramin Abbasov adına tam orta məktəbdə almağa başlamışdı. VIII sinifi bitirdikdən sonra 2001-ci ildə Heydər Əliyev adına Ali Hərbi liseyə daxil olmuşdu. 2004-cü ildə bitirmiş və elə həmin il Heydər Əliyev adına Azərbaycan Ali Hərbi məktəbinə daxil olmuşdu. 2008-ci ildə həmin məktəbi bitirdikdən sonra Müdafiə Nazirliyinin əmrinə əsasən Leytenant hərbi rütbəsi almış,Silahlı Qüvvələrin Təlim və Tədris mərkəzinin Zabit İxtisas Kursunun dinləyicisi təyin edilmişdi. 2009-cu ildə Silahlı Qüvvələrin Təlim və Tədris mərkəzinin Zabit İxtisas Kursunu bitirmişdi. Azərbaycanın Gəncə, Gədəbəy, Füzuli, Naxçıvan, Ağcabədi və Beyləqan kimi bölgələrində xidmət etmişdi. Seymur ordunun peşəkar zabitlərindən biri idi. O, ordudakı xidmətlərinə görə "Azərbaycan Silahlı Qüvvələrinin 90 illiyi" yubiley medalı, "Azərbaycan Silahlı Qüvvələrinin 95 illiyi" yubiley medalı, "Qüsursuz xidmətə görə" lll dərəcəli medalı, "Azərbaycan Ordusunun 100 illiyi" yubiley medalı ilə təltif edilmişdi. Ancaq o bunlarla kifayətlənmirdi. Seymurun bir amalı vardı. Bir gün bütün işğal altındakı torpaları azad etmək və şəhidlərin intiqamını almaq. Onun illər öncə Aprel döyüşlərində qəhrəmancasına şəhid olan mayor Rasim Məmmədov haqqında yazdığı "Mənim mərd ,cəsur, igid ,qorxmaz, qəhrəman kambatım qazi oğlu Rasim Məmmədov, sənin qisasını biz alacağıq və mən inanıram ki, sizin ruhunuz da o an bizimlə birgə vuruşacaq" sözləri onun intiqam hissi ilə yaşadığının sübutudur.
Zəfər ili kimi tarixdə silinməyən iz salan 2020 - ci ilin 27 sentyabrında Azərbaycan ordusunun bütün əsgər və zabit heyəti, bütün Azərbaycan xalqı bir "Dəmir yumruq" kimi birləşdi. Zəfərə doğru addımlayanlardan biri də Seymur Cabbarov idi. "Ölərəm dönmərəm" deyən qəhrəman son nəfəsinə qədər tarix yazdı. Ən çətin döyüşlərdən biri olan Füzuli rayonunun azad olunması zamanı yanlarına mərmi düşməsi nəticəsində qəhrəmancasına şəhid olub. Son nəfəsində su istəyən Seymura döyüş yoldaşı yağış yağması nəticəsində islanan torpağı sıxıb bir damla su verib. Qəribəsi odur ki, elə həmin zaman Seymurun oğlu Nihad da eyniylə atası kimi su istəyib. Yəqin ki, uşaq yuxuda atasının sonuncu nəfəsini hiss edib.
Ömrünün sonuna qədər sevdiyinin əlini buraxmayacağına söz verən Maral heç düşünməzdi ki, sevdiyi ilə bu qədər tez sonuncu yolçuluğa çıxar. Bir qadının 2 övladı ilə birlikdə sevdiyinin cənazəsi (hətta başqa şəhid cənazələri) ilə birlikdə bir təyyarədə getməsinin nə demək olduğunu yalnız onu yaşayan bilər. Onu izah edə biləcək cümlə yoxdu.
Cabbarov Seymur İlham oğlu 3 oktyabr 2020-ci ildə Şərur rayon Şəhidlər xiyabanında torpağa tapşırılıb. Şəhadəti ilə xalq ürəyinə adı yazılan qəhrəman Ali Baş Komandan İlham Əliyevin sərəncamı ilə "Vətən uğrunda" medalı və "Füzulinin azad olunmasına görə" medalı ilə təltif edilib.
Susuz dodaqlarında "Vətən" kəlməsi donub qalan şəhidim, sən Vətən boyda sevginə can verib, Vətən kimi müqəddəsləşdin.
Şəhid Seymur
Yatdığın torpaqdan başlayır vətən,
Vətənçün can verib vətəndə bitən,
Azadlıq toxumun vətənə səpən,
Gül açıb azadlıq nə gözəl qoxur
Adınla anılır qələbə Seymur.
Sənin şücaətin qəhrəmanlığın,
Düşmən ürəyinə çəkdiyin dağın,
Daşlara yazılan tər cavanlığın,
Düşüb dildən-dilə tez-tez duyulur
Vətən qəhrəmanı şəhidim Seymur.
Sən heç Qarabağda çəkmədin səfa,
Vətən dərdi oldu qəlbinə cəfa,
Torpağı köksünə sıxıb son dəfə,
Dedin "Vətən, canım qurbanın olur"
Cismin bütövləşdi vətənlə Seymur.
Adın qürurudur iki balanın,
Sevgin həsrətidir nazlı sonanın,
Şəhid dərdi ilə yaralananın,
Loğman da dərdinin dərmanı olmur
Yoxluğun ağır bir sınaqdı Seymur.
Manya SƏXAVƏTQIZI
