Xəzər rayonunun Binə qəsəbəsi son illər xeyli böyüyüb. Qəsəbədə çoxsaylı həyət evinin tikilməsi orada əhalinin sürətlə artmasından xəbər verir.
Ölkənin müxtəlif yerlərindən Bakıya işləməyə gələnlər əsasən sözügedən qəsəbədə məskunlaşırlar. Buna səbəb Bakının digər yerlərinə baxanda Binədə torpağın nisbətən ucuz olmasıdır. Ancaq qəsəbənin plansız formada böyüməsi çoxsaylı problemin yaranmasına gətirib çıxarıb.
Son illər qəsəbə o qədər böyüyüb ki, bir hissəsi Suraxanı rayonu ərazisinə düşür. Binə qəsəbəsinin Hövsan-südçülük yaşayş massivi adlanan ərazisi digər yerlərə baxanda daha pis gündədir. Belə ki, məhəllədaxili yollar pis vəziyyətdədir. Yol boyunca zibil qutuları yoxdur. Bundan başqa, su xətti yoxdur, sakinlər su maşınlarından baha qiymətə su alırlar. Sakinlər deyirlər ki, yaşayış massivinin böyük hissəsi Suraxanı rayonunun ərazisinə düşdüyü üçün sadalanan problemlərə baxan yoxdur. Ancaq Binə qəsəbəsinin Xəzər rayonu ərazisinə düşən hissəsində vəziyyət yaxşıdır. Həm yol sarıdan, həm də digər məsələlər baxımından vəziyyət daha normaldır.
Ərəstun Abbasov: “Əvvəl suyu 5 manata alırdıqsa, indi bir ton suya 8 manat pul ödəyirik”
Sözügedən problemlərlə bağlı fikirlərini “Bakı-Xəbər”lə bölüşən qəsəbə sakini Ərəstun Abbasov deyir ki, qəsəbənin Hövsan-südçülük yaşayış massivi hamının yadından çıxıb: “Sanki burada adam yaşamır. Qəsəbənin diqqətdən kənar olan yeridir bura. Nə bələdiyyə baxır, nə də icra hakimiyyəti. Dərd odur ki, Hövsan-südçülük Suraxanı rayonu ərazisinə düşdüyü üçün buraya Xəzər rayonunun rəsmiləri baxa bilmirlər. Suraxanı Rayon İcra Hakimiyyəti isə, bir növ, buranı unudub. Yollar çox bərbad vəziyyətdədir. Qışda palçıqdan, yayda tozun əlindən tərpənmək olmur. Ən böyük problem su təchizatı ilə bağlıdır. Yaşayış massivində su xətti yoxdur. İçməli suyu biz alırıq. Əvvəl suyun bir tonu 5 manata satılırdısa, fevralın 1-dən suyun qiyməti artandan sonra bu oldu 8 manat. İndi bir ton suya 8 manat pul ödəyirik. Nəzərə alsaq ki, qarşıdan yay gəlir, suya olan tələbat artacaq, o zaman bunun nə demək olduğunu təsəvvür etmək çətin deyil. Bir çoxu həyətlərində quyu qazıb ki, bundan məişətdə istifadə etsin. Söhbət qabların yuyulmasından və digər bu kimi işlərdən gedir. İnanın, quyu suları o qədər duzludur ki, bu suyla adicə hamamda çimə bilmirik. Çimən kimi adamı qaşınma tutur. Üstəlik, həyətdə quyu varsa, mütləq yanında qidrafon motor da olmalıdır. Onsuz suyu çıxarmaq çətindir. Motor da elektrik enerjisi ilə işləyir. Bu da əlavə xərcdir. Zibil qutusu nə olan şeydir ki, onu yol qıraqlarına qoymurlar. Sakinlər məcbur olur hara gəldi zibili atırlar. Bakı da küləkli olduğu üçün zibil o başdan bu başa gedir. Maşın sürəndə bizə mane olur. Küçələr zibilin içindədir. Ancaq buradan fərqli olaraq, Binə qəsəbəsinin Xəzər rayonu ərazisinə düşən hissəsində belə acınacaqlı vəziyyət hökm sürmür. Müəyyən bir abadlıq mövcuddur. Yollarda zibil qutuları var, bəzi yeni ərazilərə su çəkilir. Bizdə isə bunların heç biri yoxdur”.
İmran Nəbiyev: “İmkanı olan heç vaxt burada yaşamaz, çünki...”
Yaşayış massivinin digər sakini İmran Nəbiyev də analoji problemlərdən gileyləndi: “Burada yaşayanların çoxu fəhlə və kasıb adamlardır. İmkanı olan heç vaxt burada yaşamaz. Çünki yaşanası yer deyil bura. Suraxanı İcra Hakimiyyəti, ümumiyyətlə, bura ilə maraqlanmır. Halbuki, bura Binə sayılsa da, Suraxanı rayonunun ərazisidir. İllər əvvəl burada məktəb problemi həll edildi. Ancaq yollar pis gündədir. Suyumuz yoxdur, dəfələrlə şikayət etsək də, baxan olmayıb”.
Məsələ ilə əlaqədar dəfələrlə Suraxanı Rayon İcra Hakimiyyətinin mövqeyini öyrənməyə çalışsaq da, bu mümkün olmadı.
Vidadi ORDAHALLI
